ޔޫކްރެއިން ހަނގުރާމައާ ގުޅިގެން އެޅި ދަތިކުރުމުގެ ފިޔަވަޅުތަކުގެ ދަށުން ރަޝިޔާގެ ތެޔޮ ގަތުން އެހެން ގައުމުތަކުން ހުއްޓާލާފައިވާ މިދަނޑިވަޅުގައި ޗައިނާއިން ގިނަ އަދަދަކަށް ރަޝިޔާގެ ތެޔޮ ގަންނަން ނިންމާ، އެކަން ކުރަމުންދާކަމަށް ޚަބަރު ލިބިއްޖެއެވެ.
މިނިންމުމާއެކު ޗައިނާއަށް އެންމެ ގިނައިން ކްރޫޑް ނުވަތަ ސާފުނުކުރާ ތެޔޮ ފޯރުކޮށްދޭ ގައުމަކަށް ރަޝިޔާވަނީ ވެގެން ގޮސްފައެވެ. މީގެ އެއްއަހަރު ކުރިން ރަޝިޔާގެ ތެޔޮ ޗައިނާއަށް އިމްޕޯޓްކޮށްފައިވާ މިންވަރަށް ވުރެ މިދިޔަ މޭމަހު އިމްޕޯޓްކުރި މިންވަރު ވަނީ 55 އިންސައްތަ އިތުރުވެފައިވާ ކަމަށް ޚަބަރުތައް ބުނެއެވެ. މީގެ ކުރިން ޗައިނާއަށް އެންމެ ގިނައިން އިމްޕޯޓްކުރަނީ ސައުދީ އަރަބިއްޔާގެ ތެލެވެ.
ޔޫރަޕްގެ ބައެއް ގައުމުތަކާ އެމެރިކާއިން ރަޝިޔާގެ ތެޔޮ ގަތުން ހުއްޓާލާފައިވާ މިދަނޑިވަޅުގައި ޗައިނާގެ ސައިނޯޕެކް އަދި ދައުލަތުން ހިންގާ "ޒެންހުއާ އޮއިލް" ފަދަ ބިޔަ ތެޔޮ ކުންފުނިތަކުން ރަޝިޔާގެ ތެޔޮ ގިނަ އަދަދަކަށް ގަންނަން ނިންމީ ޑިސްކައުންޓް އަގުގައި ލިބޭތީއެވެ. އިރުމަތީ ސައިބީރިޔާ ހުރަސްކޮށް އަޅާފައިވާ ހޮޅިތަކުން ޕަންޕުކޮށްގެންނާއި ކަނޑު މަގުން މިދިޔަމަހު އެކަނިވެސް 8.42 މިލިއަން ޓަނުގެ ތެޔޮ ރަޝިޔާއިން ޗައިނާއަށް އެތެރެކޮށްފައިވާ ކަމަށް ވެއެވެ. ސައުދީ އަރަބިއްޔާއިން ޗައިނާއަށް އެތެރެ ކޮށްފައިވަނީ 7.82 މިލިއަން ޓަނެވެ.
ޔޫކްރެއިން ހަނގުރާމައާ ގުޅިގެން އެމެރިކާ އަދި އިނގިރޭސި ވިލާތުން މިދިޔަ މާރޗް މަހުވަނީ ރަޝިޔާއިން ތެޔޮ ގަތުން ހުއްޓާލާނެކަން އިއުލާންކޮށްފައެވެ. އަދި ޔޫރަޕިއަން ޔޫނިއަނުންވެސް ދަނީ ރަޝިޔާގެ ތެލަށް ބަރޯސާވެފައި ތިބި ތިބުން ނިމުމަކަށް ގެނެވޭތޯ މަސައްކަތް ކުރަމުންނެވެ. ތެލަކީ ރަޝިޔާގެ މައި ލޭނާރުކަމަށް ސިފަކުރެވޭއިރު، ތެޔޮ ގަތުން ބަންދުކުރުން ރަޝިޔާއަށް ގޮތް ހުސްވާނެ ކަމަށް އެމެރިކާ އަދި ޔޫރަޕުން ގަބޫލު ކުރެއެވެ.
ނަމަވެސް ހޯމަ ދުވަހު އާންމުކޮށްފައިވާ ތަފާސް ހިސާބުތަކުން ހާމަވެފައިވާ ގޮތުގައި ހަގުރާމައަށް ދުވާލަކު ރަޝިޔާއިން 876 މިލިއަން ޑޮލަރު ޚަރަދު ކުރާއިރު، ތެލުން ދުވާލަކު ލިބޭ އާމްދަނީ އަދިވެސް އެއަށް ވުރެ އިތުރެވެ.
ޗައިނާއިން ގިނަ އަދަދަކަށް އީރާނުގެ ތެޔޮވެސް ގަންނަމުންދާކަން ވަނީ ހާމަވެފައެވެ. މިގޮތުން މިދިޔަ ޑިސެމްބަރު މަހުން ފެށިގެން ތިން ޝިޕްމަންޓެއްގައި 260،000 ޓަނުގެ ތެޔޮ އީރާނުން ގަނެފައިވެއެވެ. އީރާނަކީވެސް ދަތިކުރުމުގެ ފިޔަވަޅުތަކެއްގެ ދަށުން ތެޔޮ ވިއްކުން މަނާކޮށްފައިވާ ގައުމެކެވެ.
