ރާއްޖެއަށް މަސްތުވާތަކެތި އެތެރެކުރި މައްސަލައާ ގުޅިގެން ޖަލަށްލާފައިވާ ފަރާތެއް މޯލްޑިވްސް ކަރެކްޝަނަލް ސަރވިސްގެ އުސޫލުތަކާއި ގަވާއިދުތަކާ ޚިލާފަށް ރާއްޖެއިން ބޭރަށް ފޮނުވި މައްސަލާގައި ދައުލަތުން އުފުލާފައިވާ ދައުވާގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

އުސޫލުތަކާއި ގަވާއިދުތަކާއި ޚިލާފަށް އެ ފަރާތް ރާއްޖެއިން ބޭރަށް ފޮނުވި މައްސަލައިގައި ދައުލަތުން ދައުވާކޮށްފައި ވަނީ، ކުރީގެ ކޮމިޝަނަރ އޮފް ޕްރިޒަންސް މޫސާ އާޒިމް އާއި ހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރު މުހައްމަދު ހާނިމްގެ މައްޗަށެވެ.

ބޭސްފަރުވާ ކުރުމަށް ކަމަށް ބުނެ އޭނާ ރާއްޖެއިން ބޭރަށް ފޮނުވީ 2014 ވަނަ އަހަރުގެ ފެބްރުއަރީ 5 ވަނަ ދުވަހުއެވެ. އޭނާ އަނބުރާ ރާއްޖެ ގެނެސްފައި ވަނީ 2014 ވަނަ އަހަރުގެ މެއި މަހުގެ ތެރޭގައެވެ.

ނަމަވެސް އޭނާގެ މައްޗަށް ކުށް ސާބިތެއް ނުވެއެވެ.

އޭނާ އޭރު ފުރުވާލި މައްސަލައިގައި ހާނިމާއި އާޒިމްގެ މައްޗަށް އުފުލާފައިވަނީ، މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދާދިނުމުގެ ކުށުގެ ދައުވާއެވެ.

ކްރިމިނަލް ކޯޓުގައި މި މައްސަލަ ބައްލަވަނީ އެ ކޯޓުގެ އިސްގާޒީ އަހުމަދު ޝަކީލެވެ.

މި މައްސަލައިގެ އިބްތިދާއީ އަޑުއެހުންތައް ނިންމާލާފައިވަނީ 12 ޖެނުއަރީ 2021 ގައެވެ. ވުމާއެކު، ހޯމަ ދުވަހުގެ އަޑުއެހުމަކީ މި މައްސަލައިގެ ޝަރީއަތް ފެށުމަށް ބޭއްވި އަޑުއެހުމެކެވެ.

މި އަޑުއެހުމުގައި ދައުލަތުން ވަނީ މައްސަލައިގެ އިފްތިތާޙީ ބަޔާން އިއްވާފައެވެ.

އެއަށްފަހު މޫސާ އާޒިމްގެ ފަރާތުން ވަނީ އިފްތިތާޙީ ބަޔާން އިއްވާފައެވެ. އޭނާގެ ވަކީލު ވިދާޅުވެފައިވާ ގޮތުގައި އޭނާ މަޤާމުގެ މަސްއޫލިއްޔަތުގެ ތެރެއިން އެއްވެސް މީހަކަށް ނުޙައްޤު މަންފާއެއް ހޯދައިދީފައެއް ނުވާނެއެވެ. އެކަންކަން ސާބިތުކޮށްދިނުމަށް ދިފާއީ ހެކި ހުށައަޅާފައިވާނެކަންވެސް ވަކީލު ފާހަގަ ކުރެއްވިއެވެ.

ހެކީގެ ގޮތުގައި ކުރީގެ ހޯމް މިނިސްޓަރ އުމަރު ނަސީރުވެސް ހުށައަޅުއްވާކަން އޭނާ ފާހަގަކުރެއްވިއެވެ.

އެއަށްފަހު ހާނިމްގެ ފަރާތުން އޭނާގެ ވަކީލު އަހުމަދު ޔާމީން ވަނީ އިފްތިތާޙީ ބަޔާން އިއްވާފައެވެ. އެގޮތުން ކޮރަޕްޝަން ހުއްޓުވުމާއި މަނާ ކުރުމުގެ ޤާނޫނުގައި ބަޔާންކުރާ ނާޖާއިޒު ފައިދާއެއް ނުވަތަ މަންފާއަކީ ކޮބައިކަން ދައުލަތުން ހުށައަޅާފައިވާ ލިއެކިއުންތަކުން ނޭނގޭކަން ވަކީލު ފާހަގަ ކުރެއްވިއެވެ.

ދައުލަތުން ދައުވާކުރަނީ އެ ޤާނޫނުގެ 12 ވަނަ މާއްދާގެ (ހ) ގެ ދަށުންކަމަށްވާއިރު، އެ ޤާނޫނުގައި މާނަކޮށްދީފައިވާ ފަދަ ނާޖާއިޒު ފައިދާއެއް ތުހުމަތު ކުރާ ފަރާތުން ލިއްބައިދީފައިވާކަން ނުވަތަ ލިއްބައިދިން މަންފާއެއް ދައުލަތުން ހުށައެޅި ލިއެކިއުންތަކުން އެނގެން ނެތްކަމަށް އޭނާ ވިދާޅުވިއެވެ.

ވަކީލު ވިދާޅުވީ، މި މައްސަލައިގައި ފުރުވާލިކަމަށް ބުނާ ފަރާތް ފުރުވާލީ ސިއްޙީ ބޭނުމަށް ކަމަށާއި، ސިއްޙީ ބޭނުމަކަށް ފުރުވާލުމަކީ އެ ޤާނޫނުގައި ބުނާ ފަދަ މަންފާއެއްތޯ ބަލަންޖެހޭ ކަމަށެވެ.

މި މައްސަލައިގައި ދިފާއީ ހެއްކެއް ހުށައަޅާފައި ނުވާނެކަންވެސް ޔާމީން ފާހަގަކުރެއްވިއެވެ. ސަބަބަކީ ޤާނޫނީ އިމުގެ ތެރެއިން ދިފާއު ބިނާ ކުރުމަށް ދައުލަތުގެ ހެކިތައް ފުދޭތީކަން އޭނާ ފާހަގަ ކުރެއްވިއެވެ.

މި މައްސަލައިގައި ދެން އޮންނާނީ ހެކިބަސް ނެގުމުގެ މަރުޙަލާއެވެ. މައްސަލަ ބައްލަވާ އިސްގާޒީ އަހުމަދު ޝަކީލް ވަނީ މައްސަލަ ކުރިއަށް ގެންދަވާނެ ގޮތުގެ ތާވަލެއް ހިއްސާ ކުރައްވާފައެވެ.

އިސްގާޒީ ޝަކީލު ވިދާޅުވީ، މި މަހުގެ 26 ވަނަ ދުވަހުގެ 14:00 ގައި އަދި 29 ވަނަ ދުވަހުގެ 14:00 ގައި ހެކިބަސް ނެގުމަށް އަޑުއެހުންތަކެއް ބާއްވަވާނެ ކަމަށެވެ.

އެއަށްފަހު އޯގަސްޓު މަހުގެ ތެރޭގައިވެސް 3 އަޑުއެހުމެއް ވަނީ ތާވަލު ކުރައްވާފައެވެ.

މި މައްސަލައިގެ ދިފާއީ ވަކީލުން ވަނީ އޯގަސްޓު މަހުގެ ތެރޭގައި މި މައްސަލައިގެ ދެން ހުރި އަޑުއެހުންތައް ކުރިއަށް ގެންދެވުމަށް އެދިލައްވާފައެވެ.

އެކަމާ ގުޅޭގޮތުން އިސްގާޒީ ޝަކީލު ވިދާޅުވީ، ކޯޓުގެ ބެކްލޮގް ހުސްކުރުމަށް ހުރިހާ ގާޒީންވެސް އަވަދިނެތި މަސައްކަތް ކުރައްވަމުން ގެންދަވާ ކަމަށާއި، މި މައްސަލަވެސް ތާވަލު އެކުލަވާލެއްވީ ގިނަ ކަންތައްތަކަށް ބެއްލެވުމަށް ފަހު ކަމަށެވެ.

އިސްގާޒީ ޝަކީލް ވަނީ މި މައްސަލަ އަވަހަށް ނިންމެވުމަށް މަސައްކަތް ކުރައްވަމުން ގެންދަވާކަން ފާހަގަކުރައްވާފައެވެ.