މިލިބުނީ ފައިނަލަށް ދިޔުމަށް ވަރަށް ބޮޑު މޮޅެއް: ނިޒާރު

އެސޯސިއޭޝަން ކަޕްގައި ޕޮލިސް ކުލަބް ބަލިކޮށް ސެމީ ފައިނަލުން ޖާގަ ލިބުމަކީ, ފައިނަލަށް ދިޔުމަށް ލިބުނު މޮޅެއްކަމަށް ކުލަބް ވެމްކޯގެ ކޯޗު އިބްރާހިމް ނިޒާރު (ބޮޑޭ) ބުނެފިއެވެ.

މުބާރާތުގައި ހޮނިހިރު ދުވަހުގެ ރޭ ފަހަތުން އަރައި ޕޮލިސް ބަލިކޮށް ވެމްކޯއިން ވަނީ ސެމީގެ ޖާގައެއް ޔަގީންކޮށްފައެވެ. ވެމްކޯއާއެކު ސެމީގައި ދެން ކުޅޭނެ ޓީމެއް ކަށަވަރުވާނީ މިރޭ ދިވެހި ސިފައިންގެ ކުލަބާއި، ގުޑީސް ސްޕޯޓްސް ކުލަބް ބައްދަލުކުރާ މެޗަށްފަހުއެވެ. ސެމީގެ ދެ ވަނަ ޖާގައަށް ވާދަކުރަނީ ޕޮލިހާއި ސިފައިންނެވެ.

މެޗަށްފަހު ބޮޑޭ ބުނީ ވެމްކޯއަކީ މި މުބާރާތަށް ވަރަށް ބޮޑަށް ތައްޔާރުވެފައި އޮތް ޓީމެއް ކަމަށެވެ. އޭނާ ބުނީ ޕްރެލިމިނަރީ ބުރުން ފެށިގެން މިހާ ހިސާބަށް އައި އިރު ޓީމު ވަރުގަދަ ކުރަން ބައިވަރު ކަންކަން ކުރެވިއްޖެކަމަށެވެ. މީގެ އިތުރުން އެ ޓީމަށް ލިބުނު ބިދޭސީ ކުޅުންތެރިންގެ ތެރެއިން އެކަކު އަނިޔާގައި ހުރުމަކީ ޓީމަށް ލިބުނު ފޫ ނުބެއްދޭވަރުގެ ގެއްލުމެއް ކަމަށް ބޮޑޭ ބުންޏެވެ. ނަމަވެސް ކުޅުންތެރިން ކުރާ މަސައްކަތާއި، މޮޅުވާން ބޭނުންވެފައި ތިބޭވަރުން ޓީމަށް ހިތްވަރު ލިބޭ ކަމަށް ބޮޑޭ ބުންޏެވެ.

ބޮޑޭ ބުނީ މެޗުގެ ފުރަތަމަ ކޮޅު ދަށްކޮށް ދިޔައީ، ކުޅުންތެރިން މޮޅުވުމަށް މާބޮޑަށް ހިފާލުމުން ޓީމު ޕްރެޝަރަށް ގޮސްގެންކަމަށެވެ.

މީގެ އިތުުރުން ބޮޑޭ ބުނީ އެ ޓީމުގެ ބިދޭސީ ކުޅުންތެރިޔާ މުބާރާތް ނުކުޅެވޭ ވަރުގެ އަނިޔާގެއްގައި ހުރުމާއި، އެ ޓީމުގެ ދިވެހި އެޓޭކަރު އިސްމާއިލް ސާޖިދު (ކުޑަކާއްޓެ) އަނިޔާގައި ހުރެ ވެސް، އެ ޓީމުން މުބާރާތުގައި ދެއްކި ކުޅުމާމެދު ވަރަށް ބޮޑަށް ހިތްހަމަ ޖެހޭކަމަށެވެ. ބޮޑޭ ބުނީ އެ ކުޅުންތެރިން މިހާރު އަނިޔާއިން ރަނގަޅުވަމުން އަންނަކަމަށެވެ.