ސަރުކާރުން ހިންގާ ހުރިހާ މަޝްރޫޢުތަކެއްގެ ވަށައިޖެހިފައިވާ ސިޔާސަތަކީ، އުފެއްދުންތެރި ޒުވާން ޖީލެއް ބިނާކުރުން - ރައީސް

ސަރުކާރުން ހިންގާ ހުރިހާ މަޝްރޫޢުތަކެއްގެ ވަށައިޖެހިފައިވާ ސިޔާސަތަކީ، އުފެއްދުންތެރި ޒުވާން ޖީލެއް ބިނާކުރުންކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއެވެ.

އެމަނިކުފާނު މިހެން ވިދާޅުވީ ށ.އަތޮޅު ފުނަދޫ ސްކޫލަށް 50 އަހަރު ފުރޭ ރަންޔޫބީލް މުނާޞަބާ ފާހަގަކުރުމަށް ހުކުރު ދުވަހުގެރޭ އެ ސްކޫލުގައި ބޭއްވި ޚާއްޞަ ޖަލްސާ ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ. ރައީސް ވިދާޅުވީ އުފެއްދުންތެރި ޒުވާން ޖީލެއް ބިނާކުރުމުގެ އެންމެ މުހިންމު މަސައްކަތްތައް ހިންގަނީ ތަޢުލީމީ ދާއިރާގެ ތެރެއިން ކަމަށެވެ. ސްކޫލްތަކުގެ ޢުމްރާނީ ތަރައްޤީއަށްޓަކައި، ސަރުކާރުން ރާވާފައިވާ 203 މަޝްރޫޢެއް ތަފާތު މަރުޙަލާތަކުގައި މިހާރުވެސް ހިނގަމުން ދާ ކަމަށް ރައީސް ވިދާޅުވިއެވެ.

އޭގެ ތެރޭގައި ބައެއް ރަށްރަށުގެ ސްކޫލްތަކަށް ކްލާސްރޫމްތައް އެބަ އިތުރުކުރެވޭއިރު، ބައެއް ސްކޫލްތަކުގައި ސައެންސް ލެބޯރެޓްރީތައް އެބަ ގާއިމްކޮށް، ބައެއް ސްކޫލްތަކުގައި މަލްޓިޕާޕަސް ހޯލްތައް ބިނާކުރުމުގެ މަސައްކަތްތައްވެސް އެބަ ކުރިއަށް ދާ ކަމަށް ރައީސް ވިދާޅުވިއެވެ.

ސަރުކާރުން ފަށައިގެން މިހާރު ކުރިއަށް ގެންދާ ހިލޭ ޑިގްރީ ޕްރޮގްރާމްގެ އަމާޒަކީވެސް، ތަޢުލީމް ލިބިފައިވާ މީހުން ބިނާކުރުން ކަމަށާއި، އެ ޕްރޮގްރާމްގެ ދަށުން ށ. ފުނަދޫއިން އެކަނިވެސް 110 ދަރިވަރުން މިހާރުވެސް ކިޔަމުން އަންނަ ކަމަށް ރައީސް ވިދާޅުވިއެވެ. އަދި ރާއްޖެއިން ބޭރުން މަތީ ތަޢުލީމު ހާސިލުކުރުމަށް ދޫކުރާ ލޯނު ޕްރޮގްރާމްގެ ތެރެއިން ފުނަދޫގެ 6 ދަރިވަރަކު ތަޢުލީމް ހާސިލުކުރަމުންދާ ކަމަށް ރައީސް ވިދާޅުވިއެވެ.

ފުނަދޫގެ ކަންކަމަށް ބަލާއިރު، ރަށުގައި ދިރިއުޅޭ އާބާދީ ދަނީ ދުވަހުން ދުވަހަށް އިތުރުވަމުން ކަމަށާއި، އެއާ ގުޅިގެން ރައްޔިތުންގެ ބޯހިޔާވަހި ކަމަށް ބޭނުން ވާ ކަމަށް ރައީސް ވިދާޅުވިއެވެ. އެހެންކަމުން އެ ރަށުގެ ރައްޔިތުން އެދިފައި އޮތް ގޮތަށް، ބިން ހިއްކާ ރަށްރަށުގެ ލިސްޓުގައި އިރާދަކުރެއްވިއްޔާ، އެ ރަށް ހިމަނައި، އަންނަ އަހަރުގެ ބަޖެޓުގައި ހިމަނައިގެން އެ މަސައްކަތް ފައްޓަވާނެކަމަށް ރައީސް ވިދާޅުވިއެވެ.

އަދި އޭގެ އިތުރުން މިހާރުން މިހާރަށް ގޮތްތަކެއް ހޯދަންޖެހިފައި އޮތް ކަމަކީ ރަށް ގިރުމުގެ މައްސަލައަށް ޙައްލެއް ހޯދުން ކަމަށާއި، އެއީ އަވަސް ޙައްލެއް ހޯދަން ޖެހިފައި އޮތް ކަމެއް ކަމަށް ޤަބޫލުކޮށް، ލަސްތަކެއްނުވެ ވީހާވެސް އަވަހަށް އެކަމަށް ޙައްލެއް ހޯދުމުގެ މަސައްކަތް ސަރުކާރުން ފައްޓަވައިދެއްވާނެ ކަމަށް ރައީސް ވިދާޅުވިއެވެ.

ރަށުގައި ތިބެ ޞިއްޙީ ޚިދުމަތް ކައިރިން ރަނގަޅަށް ލިބޭނެގޮތް ހޯދައިދިނުމަކީ، ސަރުކާރުގެ އަމާޒެއް ކަމަށާއި، އެ މަސައްކަތުގެ ތެރެއިން، ހޮސްޕިޓަލަށް ބޭނުންވާ އާ ޢިމާރާތް ބިނާކުރުމުގެ މަސައްކަތްވެސް އިރާދަކުރެއްވިޔާ ލަސްތަކެއްނުވެ ކުރިއަށް ގެންދާނެ ކަމަށް ރައީސް ވިދާޅުވިއެވެ.

ރަށެއްގައި ސްކޫލެއް ޢިމާރާތްކޮށް، އެ ޢިމާރާތަކުން ޚިދުމަތްދޭތާ 50 އަހަރު ފުރިގެން ދިޔުމަކީ ކުޑަކަމެއް ނޫން ކަމަށާއި، 50 އަހަރު ފުރިގެން ދާ ސްކޫލް، މެދުނުކެނޑި ރަނގަޅު ޚިދުމަތްތަކެއް ހަމަ ގައިމުވެސް ދެވިގެން ގޮސްފައި އެ އޮތީ އެ ރަށުގެ ރައްޔިތުންނާއި، އެ ސްކޫލް އުފެއްދި ބާނީންނާއި، އެ ސްކޫލަށް މިހާރުވެސް ޚިދުމަތްކުރަމުން ގެންދާ ޓީޗަރުންނާއި، މުވައްޒަފުންގެ ބުރަ މަސައްކަތުން ކަމަށް ރައީސް ވިދާޅުވިއެވެ.

ފުނަދޫ ސްކޫލްގެ ދަރިވަރުންނަށް އިލްތިމާސް ކުރައްވަނީ، އެ ކުދިންނަކީ، އިސްލާމް ދީނުގެ ޞައްޙަ ޢަޤީދާގައި ސާބިތުވެ ތިބެ، ޤައުމުގެ ޙާލަތު ރަނގަޅު ކުރުމަށް ވިސްނާ، ޤައުމަށް ވަފާތެރި، އަދި ރާއްޖޭގެ އެހެން ހުރިހާ ކިޔަވާކުދިންނަށް ރީތި ނަމޫނާއަކަށްވުމަށް ކަމަށް ރައީސް ވިދާޅުވިއެވެ.