ޕޮލެންޑުގެ ޤައުމީ އެއަރލައިންގެ ދަތުރުތައް ރާއްޖެއަށް ފަށައިފި
ލޮޓް ޕޮލިޝް އެއަރލައިނުން ދަތުރުތައް ފެށީ ބުރާސްފަތި ދުވަހު
ލޮޓް ޕޮލިޝް އެއަލައިންގެ ބޯޓެއް ވެލާނާ އިންޓަނޭޝަނަލް އެއަރޕޯޓުގައި
ޕޮލެންޑުގެ ޤައުމީ އެއަރލައިން ކަމަށްވާ "ލޮޓް ޕޮލިޝް" އިން އަލުން ރާއްޖެއަށް ދަތުރުތައް ފަށައިފިއެވެ.
އެ އެއަރލައިނުން މި ދަތުރުތައް ފަށާފައިވަނީ ބުރާސްފަތި ދުވަހުއެވެ. ފުރަތަމަ ދަތުރުގައިވެސް އެ އެއަރލައިނުން ރާއްޖެއަށް 249 ފަސިންޖަރުން ޒިޔާރަތް ކުރިއެވެ.
ލޮޓް ޕޮލިޝް އެއަރލައިނުން ދަތުރުތައް ކުރާނީ ޕޮލެންޑުގެ ވެރިރަށް ވޯރސޯ އާއި ވެލާނާ އިންޓަނޭޝަނަލް އެއަރޕޯޓާ ދެމެދުއެވެ. މި ދަތުރުތަކަށް އެ އެއަރލައިނުން ބޭނުން ކުރާނީ ބޮއިންގ 787 މަރުކާގެ ބޯޓުތަކެވެ. މިއީ އެއްފަހަރާ 290 މީހުންނަށް ދަތުރު ކުރެވޭ ބޯޓުތަކެވެ.
މޯލްޑިވްސް އެއަރޕޯޓްސް ކޮމްޕެނީ (އެމްއޭސީއެލް) އިން ބުނެފައިވާ ގޮތުގައި ލޮޓް ޕޮލިޝް އެއަރލައިނުން ރާއްޖެއަށް ފަށާފައިވަނީ ޗާރޓަރު ދަތުރުތަކެއް ކަމަށެވެ. އެގޮތުން ހަފުތާއަކު އެއް ދަތުރު އެއަރލައިނުން ރާއްޖެއަށް ކުރާނެ ކަމަށް އެ ކުންފުނިން ބުނެއެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުގައި ދުނިޔޭގެ އެކި މަންޒިލްތަކުން މިހާރު ރާއްޖެއަށް 24 އެއަރލައިނަކުން ދަތުރުކުރެއެވެ. މީގެ ތެރޭގައި ޑެއިލީ ދަތުރުތައް ކުރާ އެއަަރލައިންތަކާއި ޗާޓަރު ދަތުރުތައް ކުރާ އެއަރލައިންތައް ވެސް ހިމެނެއެވެ.
ރާއްޖެއަށް އަންނަ އެއަރލައިންތައް އިތުރުވުމަކީ ރާއްޖޭގެ ފަތުރުވެރިކަމަށް އޭގެ ސަބަބުން ފައިދާވާނެ ކަމެކެވެ. އެހެންވެ، ކޮވިޑާ ގުޅިގެން ދަތުރުތައް މެދުކަނޑާލި އެއަރލައިންތަކާއި އެނޫންވެސް އިތުރު އެއަރލައިންތައް ރާއްޖެއަށް ގެނައުމަށް ސަރުކާރުގެ ކަމާ ބެހޭ އިދާރާތަކުން ދަނީ މަސައްކަތް ކުރަމުންނެވެ.
ތަފާސްހިސާބުތައް ދައްކާ ގޮތުގައި މިއަހަރުގެ މިހާތަނަށް 732،884 ފަތުރުވެރިން ވަނީ ރާއްޖެއަށް ޒިޔާރަތް ކޮށްފައެވެ. އެންމެ ގިނައިން ރާއްޖެއަށް ފަތުރުވެރިން ޒިޔާރަތް ކުރަނީ އިންޑިއާއިންނެވެ. މީގެ އިތުރުން އިނގިރޭސިވިލާތާއި ރަޝިއާ އާއި ޖަރުމަނާއި އިޓަލީ އާއި އެމެރިކާ އާއި ފްރާންސް އަދި ސްވިޒަލެންޑުންވެސް ގިނަ އަދަދެއްގެ ފަތުރުވެރިން ރާއްޖެއަށް ޒިޔާރަތް ކުރެއެވެ.
