އެމް.ޓީ.ސީ.ސީ.އަކީ ރައްޔިތުންގެ އިތުބާރު ހޯދާފައިވާ ކުންފުންޏެއް ކަމަށާއި، ހަވާލުކުރެވޭ މަސައްކަތްތައް ވަގުތުން ވަގުތަށް ނިންމައި، އޭގެ ކޮލިޓީއާއެކީގައި ރައްޔިތުން ބޭނުންވާގޮތަށް، އަދި ސަރުކާރުން ބޭނުންވާ ދުވަހަށް ނިންމާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ، "އެއްގަމު ދަތުރުފަތުރުގެ ދާއިމީ ހައްލު، ހުޅުމާލެ 2 ވަނަ ފިޔަވަހީގެ ރަށްވެހިންނަށް" ރާއްޖެ ޓްރާންސްޕޯޓް ލިންކުގެ ބަސްތައް ތައާރަފްކުރުމުގެ ހަފްލާގައި ވާހަކަފުޅު ދައްކަވަމުންނެވެ.

ރައީސް ވިދާޅުވީ، ސަރުކާރު ހިންގުމާ ހަވާލުވިއިރު، ހުޅުމާލޭގެ ޓްރާންސްޕޯޓް ޚިދުމަތް އޭރު ހަވާލުކޮށްފައި އޮތީ އެމް.ޕީ.އެލްއާ ކަމަށެވެ. އޭރު މި ޚިދުމަތް އެންމެ ރަނގަޅަށް ދެވޭނީ އެމް.ޕީ.އެލްއަށް ކަމަށް ދެކެވަޑައިނުގަންނަވާ ކަމަށާއި، އެކަމަށް އެކަށީގެންވާ ކުންފުންޏެއް އޭރުވެސް ސަރުކާރުގައި އޮތްކަމަށެވެ. އެމް.ޓީ.ސީ.ސީ އަދި ޓްރާންސްޕޯޓް މިނިސްޓަރު އެކަމަށް އިސްނަންގަވައި، ވަޒީރުންގެ މަޖިލީހުގައި މިކަމާ މަޝްވަރާކުރުމަށްފަހު، ހުޅުމާލޭގެ ޓްރާންސްޕޯޓުގެ ހުރިހާ ކަމެއް އެމް.ޓީ.ސީ.ސީއާ ހަވާލުކުރެއްވިކަމަށް ރައީސް ވިދާޅުވިއެވެ. އަދި މުޅި ރާއްޖޭގެ ދަތުރުފަތުރުގެ ނިޒާމު ތަރައްގީކޮށް، އަވަސްކޮށް، ހަލުވިކޮށް، ފަސޭހައިން އެ ޚިދުމަތް ލިބޭނެގޮތް އިންތިޒާމުކުރުމަށްޓަކައި އެމް.ޓީ.ސީ.ސީއާ ހަވާލުކުރެއްވިކަމަށް ރައީސް ވިދާޅުވިއެވެ.

ރައީސް ވިދާޅުވީ، އާދަމް އާޒިމް އެމް.ޓީ.ސީ.ސީއާ ހަވާލުވިއިރު އެތަނުގައި ތިބީ 1400 މުވައްޒަފުން ކަމަށެވެ. އޭރު އެކަށީގެންވާ ޕްރޮޖެކްޓްތަކެއް ނުހިނގާކަމަށާއި، ނަމަވެސް މިއަދު ރާއްޖޭގައި މިހިނގާ 300ށްވުރެ ގިނަ ޕްރޮޖެކްޓްތައް ހިނގަމުންދާއިރު، އޭގެ ބޮޑުބައި އެމް.ޓީ.ސީ.ސީން ހިންގަމުންދާއިރު، 3700ށްވުރެ ގިނަ މުވައްޒަފުން އެމް.ޓީ.ސީ.ސީގައި މިއަދު އެބަ މަސައްކަތްކުރާކަމަށެވެ. އަދި އެމަނިކުފާނަށް އެނގިވަޑައިގެންފައި އޮތްގޮތުންނަމަ، މި އަހަރު ނިމޭއިރު، 4000ށްވުރެ ގިނަ މުވައްޒަފުން، އެމް.ޓީ.ސީ.ސީގައި އެކިއެކި މަސައްކަތްތަކުގައި އަމަލީގޮތުން ބައިވެރިވާނެކަމަށެވެ. މިއީވެސް ރާއްޖެއަށް ލިބިގެންދާ ވަރަށްބޮޑު ކުރިއެރުމެއްކަމުގައި ދެކެވަޑައިގަންނަވާކަމަށް ރައީސް ވިދާޅުވިއެވެ.

ރައީސް ވިދާޅުވީ ހުޅުމާލެ ފޭސް 2 ތަރައްގީކުރުމުގައި އަދިވެސް ކުރަންޖެހޭ ބައިވަރު ކަންތައްތައް ހުރިކަމަށެވެ. އެތަނުގައި ދިރިއުޅޭ ރައްޔިތުންނަށް، އެ ސަރަހައްދުގެ ބީޗް ހިތްފަސޭހަކަމާއެކު ބޭނުންކުރެވޭނެ ގޮތަކަށް ބަދަލުކުރަންޖެހޭ ކަމަށާއި، އެމް.ޓީ.ސީ.ސީގެ ފަރާތުން މިހާރު އެތަން ތައްޔާރުކުރުމުގައި ޕްލޭނެއް އެކުލަވައިލައި، އަގުތައް ހޯދައި، އަމަލީގޮތުން މަސައްކަތް ފެށުމަށް ތައްޔާރުވެފައިވާކަމަށް ރައީސް ވިދާޅުވިއެވެ.

އެގޮތުން، ސްވިމިންގ ޓްރެކަކާއި، ހަޓްތަކާއި، އަދި ޕަބްލިކް ޓޮއިލެޓާއި، އާއިލާއާ އެކީގައި ގޮސް، ގޮނޑުދޮށުގައި ހަމަޖެހިލައިގެން ތިބެ ޗުއްޓީ ހޭދަކޮށްލެވޭ އިންތިޒާމުތަކެއް ރާވަމުންގެންދާކަމަށެވެ. މިއީ ހުޅުމާލޭ ފޭސް 2ގައި މިހާރު ދިރިއުޅެމުންދާ ރައްޔިތުންނަށް، އަދި އަންނަން ތިބި ރައްޔިތުންނަށް ލިބިގެންދާނެ ވަރަށްބޮޑު ފަސޭހައަކާއި އުފަލެއްކަމަށް ވެގެންދާނެކަމަށް އެމަނިކުފާނު ވިދާޅުވިއެވެ.

ރައީސް ވިދާޅުވީ، އެމް.ޓީ.ސީ.ސީން ރާއްޖޭގެ ތަރައްގީއަށްޓަކައި މިހާރުވެސް ހިންގަމުންގެންދާ ބިޔަ ބޮޑެތި ޕްރޮޖެކްޓްތައް (އެއީ މަގުހެދުން ކަމަށް ވިޔަސް، ބަނދަރު ހެދުން ކަމަށް ވިޔަސް، އެއަރޕޯޓުތައް ތަރައްގީކުރުން ކަމަށް ވިޔަސް، ގޮނޑުދޮށްތައް ހިމާޔަތް ކުރުން ކަމަށް ވިޔަސް) މިއިން ކޮންމެ ޕްރޮޖެކްޓެއް ހަލުވި ސްޕީޑްގައި ކުރިއަށް ގެންގޮސް، ބޭނުންވާގޮތަށް ނިންމުމަށް ޓީމެއްގެ ގޮތުގައި ކުރާ މަސައްކަތަށްޓަކައި ހުރިހާ މުވައްޒަފުންނަށް، ޚާއްސަކޮށް ސީ.އީ.އޯއާއި ޗެއަރމަން އަދި ހުރިހާ މުވައްޒަފުންނަށް ޝުކުރުއަދާކުރައްވާ ކަމަށެވެ.