6 މޭ 2021 ދުވަހުގެ ރޭ ރައީސް މުޙައްމަދު ނަޝީދަށް އަމާޒުކޮށްދިން ހަމަލާއާއި ގުޅިގެން ހިންގި ތަހުގީގުތަކަށްފަހު، ޓެރަރިޒަމާއި ގުޅޭ ދައުވާތަކެއް އުފުލާފައިވާ އއ މާޅޮސް، އަސަރީގެ މުޙައްމަދު ނާޒިމްގެ މައްޗަށް ކުރާ ދައުވާއެއްގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ޙަސަން ސައީދެވެ.

މި މައްސަލައިގައި މީގެ ކުރިން ބޭއްވި އަޑުއެހުމެއްގައި ނާޒިމަށް ދައުވާ އިއްވައި، އޭނާ ވަނީ ދައުވާއަށް އިންކާރުކޮށްފައެވެ. އެހެންނަމަވެސް އެ އަޑުއެހުން ކުރިއަށް ދިޔައީ ވަކީލަކާ ނުލައެވެ.

މިހާރު އޭނާގެ ފަރާތުން ވަކީލަކު އައްޔަނުވެފައިވާއިރު، ބުރާސްފަތި ދުވަހުގެ އަޑުއެހުމުގައި ވަނީ އޭނާގެ މައްޗަށް ދައުލަތުން ކުރާ ދައުވާ އިއްވާފައެވެ. އެގޮތުން އޭނާގެ މައްޗަށް ކުރަނީ ޓެރަރިސްޓް ޖަމާއަތަކަށް ތާއީދުކުރާފަދަ ލިއުމެއް ނުވަތަ ކުރެހުމެއް ނުވަތަ ފޮޓޯއެއް ގެންގުޅުމުގެ ކުށުގެ ދައުވާއެވެ.

ދައުލަތުން ބުނާ ގޮތުގައި އޭނާގެ ގެ ބަލައި ފާސްކުރިއިރު ގެއިން ފެނުނު ދަބަހެއްގެ ތެރޭގައި އޮތް ޕެންޑްރައިވްއަކުން އައިސިސް ޖަމާއަތަށް ތާއީދުކުރާކަމަށް ބެލެވޭފަދަ ލިޔެކިޔުންތަކެއް ވަނީ ފެނިފައެވެ.

ނާޒިމް ވަނީ ދައުވާއަށް އިންކާރު ކޮށްފައެވެ. ނާޒިމްގެ ވަކީލު ޙަމްޒާ ލަތީފް ވިދާޅުވި ގޮތުގައި ތުހުމަތު ކުރެވޭ ލިޔުންތަކަކީ ނާޒިމް ހޯދާފައިވާ އަދި އޭނާ ގެންގުޅެފައިވާ ލިޔުންތަކެއް ނޫނެވެ.

ނާޒިމް ދައުވާއަށް އިންކާރު ކުރުމުން ދައުލަތުން ވަނީ ހެކި ހުށައަޅާފައެވެ. އެއަށްފަހު ގާޒީ ވަނީ މިއީ މަދަނީ މިންގަނޑުން ކުރިއަށް ގެންދެވޭނެ ދައުވާއެއްކަމަށް ކަނޑައަޅުއްވާފައެވެ.

މި މައްސަލަ ބައްލަވާ ގާޒީ ޙަސަން ސައީދު ވަނީ ދިފާއީ ހެކި ހުށައެޅުމަށް 10 ދުވަހުގެ މުއްދަތެއް ދެއްވާފައެވެ. އަދި ޝަރީއަތުގެ ކުރީގެ ހުށައެޅުންތަކަށް އިތުރު 10 ދުވަސް ގާޒީ ދެއްވިއެވެ.

ދެން މި މައްސަލައިގެ އަޑުއެހުމެއް އޮންނާނީ 24 އޯގަސްޓުގެ 11:30 ގައެވެ.