ރައީސް އަބަދުވެސް ދެއްވާ ލަފާފުޅަކީ ރައްޔިތުންނަށް ތަކުލީފަކަށް ނުވާނެހެން އަދި ދާއީމީ ހައްލެއް ލިބޭނެހެން ޚިދުމަތްތައް ބައްޓަންކުރަން ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.
ރާއްޖެ ޓްރާންސްޕޯޓް ލިންކް (އާރްޓީއެލް)ގެ ދަށުން ހުޅުމާލެ ދެވަނަ ފިޔަވަހީގައި ބަސް ދަތުރުގެ ޚިދުމަތް ރަސްމީކޮށް ފެށުމަށް ބުދަ ދުވަހުގެ ރޭ ބޭއްވި ރަސްމިއްޔާތުގައި ވާހަކަދައްކަވަމުން އާޒިމް ވިދާޅުވީ މީގެ ކުރިން ރާއްޖޭގައި ދަތުރުފަތުރުގެ ނިޒާމު ބައްޓަންކޮށްފައިވަނީ ޕަބްލިކް ޓްރާންސްޕޯޓުގެ ވަށާޖެހޭ ފުރިހަމަ ވިސްނުމެއް ނެތި ކަމަށެވެ. އޭރު މިކަން އޮތީ އެމީހަކު ބޭނުން ގޮތަކަށް އެކަން ކުރަން ދޫކޮށްލާފައިކަމަށް އާޒިމް ވިދާޅުވިއެވެ.
އެހެންނަމަވެސް ރައްޔިތުންނަށް ޚިދުމަތްތައް ފޯރުކޮށްދިނުމުގައި މި ސަރުކާރުން ގެންގުޅޭ ވިސްނުމަކީ ރައްޔިތުންނަށް ތަކުލީފަކަށް ނުވާނެ ގޮތަކަށް އެކަން ކުރުން ކަމުގައި އާޒިމް ވިދާޅުވިއެވެ. މިއީ ރައީސުލްޖުމްހޫރިއްޔާ އިބްރާހިމް މުހައްމަދު ސާކލިހު އަބަދުވެސް ދެއްވާ އިރުޝާދެއް ކަމަށް އާޒިމް ވިދާޅުވިއެވެ.
މީގެ ކުރިން މިކަން ކުރެވިފައިވަނީ މިވެނި އެވެނި ގޮތަކަށް. މިއީ މާސްޓަރ ޕްލޭނެއް ނެތި ކުރެވެމުންދިޔަ ކަމެއްއާދަމް އާޒިމް
މީގެ ކުރިން މިކަންކަން ވާނެ ގޮތަކަށް ވާން ދޫކޮށްލާފައި އޮތް ނަމަވެސް މިހާރު މިކަންތަކަށް ދާއިމީ ހައްލެއް ހޯދައިދެއްވާފައިވާކަމަށް އާޒިމް ވިދާޅުވިއެވެ. މީގެ ކުރިން ބަސްތައް ބަހައްޓާނެ ތަނެއް، މަރާމާތުކުރާނެ ބައެއް ނެތް ނަމަވެސް މިއަދު ބަސްތައް ބަހައްޓާނެ ތަނަކާއި، މަރާމާތުކުރާނެ މެކޭނިކުންވެސް ތަމްރީނުކުރެވިފައިވާކަމަށް އާޒިމް ވިދާޅުވިއެވެ.
މިއީ ރައީސުލްޖުމްހޫރިއްޔާ ގެންގުޅުއްވާ ދުރު ވިސްނުންފުޅުގެ ތެރެއިން ފަރުމާކުރެވިފައިވާ ޒަމާނީ ޚިދުމަތެއް ކަމުގައި އާޒިމް ވިދާޅުވިއެވެ. މި ޚިދުމަތަކީ ފަހި އަދި ވަށާޖެހޭ ޚިދުމަތަކަށް ހެދުމަށް މަސައްކަތްކުރައްވާނެ ކަމަށް އާޒިމް ވިދާޅުވިއެވެ.
