އައިޖީއެމްއެޗުގައި އުޅޭއިރު މާސްކު އަޅަން އިލްތިމާސްކޮށްފި
14 ޖޫން 2022 | އަންގާރަ 20:38އެ ހޮސްޕިޓަލުން މިގޮތަށް އިލްތިމާސް ކުރީ ރާއްޖޭގައި ކޮވިޑުގެ ކޭސްތައް އިތުރުވާތީ
އައިޖީއެމްއެޗް
އިންދިރާ ގާންދީ މެމޯރިއަލް ހޮސްޕިޓަލުގެ ތެރޭގައި އުޅޭއިރު މާސްކު އަޅައިގެން އުޅުމަށް އެ ހޮސްޕިޓަލުން އިލްތިމާސްކޮށްފިއެވެ.
އަންގާރަ ދުވަހުގެ ރޭ އައިޖީއެމްއެޗުން ނެރުނު ބަޔާނެއްގައި ބުނީ ރާއްޖޭގައި ކޮވިޑް-19ގެ ކޭސްތައް އިތުރުވާން ފަށާފައިވާ ކަމަށް އެޗްޕީއޭއިން ބުނެފައިވާތީ، އެ ހޮސްޕިޓަލުގައި ރައްކާތެރިކަމުގެ ފިޔަވަޅުތައް ވަރުގަދަކުރަން ހަމަޖެހިފައިވާ ކަމަށެވެ. އެގޮތުން، ހޮސްޕިޓަލަށް ދާ ބަލި މީހުންނާއި އެހީތެރިންނާއި އަދި އެެހެނިހެން ފަރާތްތައް ވެސް މާސްކު އަޅައިގެން އުޅުމަށް އިލްތިމާސް ކުރާ ކަމަށެވެ.
އައިޖީއެމްއެޗުން ވަނީ މިކަމުގައި އާއްމުންގެ އެއްބާރުލުން ބޭނުންވާ ކަމަށާއި ބަލި ކޮންޓްރޯލް ކުރުމަށް އެއްބާރުލުން ލިބޭނެ ކަމަށް އުއްމީދު ކުރާ ކަމަށް ބުނެފައެވެ.
އެޗްޕީއޭއިން ހޯމަ ދުވަހު ނެރުނު ބަޔާނެއްގައި ބުނީ ފާއިތުވި ހަފުތާގައި ރާއްޖޭން ކޮވިޑް19 ގެ 142 ކޭސް ފެނިފައިވާ ކަމަށެވެ. އެއީ އޭގެ ކުރީ ހަފުތާއާ އަޅާބަލާއިރު 69 އިންސައްތައިގެ އިތުރުވުމެއްކަންވެސް ވަނީ ފާހަގަކޮށްފައެވެ. އަދި ކޮވިޑުގެ ކޭސްތައް އިތުރުވުމާއެކު ސާމްޕަލް ޕޮޒިޓިވިޓީއާއި ހޮސްޕިޓަލުގައި އެނދުމަތިކޮށްގެން ފަރުވާ ދޭ މީހުންގެ އަދަދުވެސް އިތުރުވަމުންދާކަމަށް އެޗްޕީއޭއިން ބުނެއެވެ. އެގޮތުން މެއި މަހު ކޮވިޑު ޖެހިގެން 15 މީހުން އެޑްމިޓްކުރިއިރު ޖޫންމަހުގެ 12 ވަނަ ދުވަހާއި ހަމައަށް އެކަނިވެސް 11 މީހުން އެޑްމިޓްކޮށްފައިވާ ކަމަށް އެ އިދާރާއިން ބުނެފައިވެއެވެ.
ކޮވިޑުގެ ކޭސްތައް އިތުރުވާތީ އެޗްޕީއޭއިން ވެސް ވަނީ ބައެއް ކަންކަމަށް ސަމާލުކަން ދިނުމަށް އަންގާފައެވެ. އެގޮތުން، ކޮވިޑަށް ޝައްކު ކުރެވޭނަމަ އެކަހެރިވެ ޓެސްޓް ކުރުމާއި ޕޮޒިޓިވްވެއްޖެނަމަ އެކަން ކަމާ ބެހޭ ފަރާތްތަކަށް އެންގުމާއި މާސްކު އެޅުމާއި ވެކްސިން ފުރިހަމަ ކުރުމަށް އެ އިދާރާއިން ވަނީ އިލްތިމާސްކޮށްފައެވެ.
