ޣަރަގުވިތާ 3 ގަރުނަށްވުރެ ގިނަ ދުވަސްވީ މަނަވަރެއްގެ ވާހަކަތައް ލޮނުގަނޑުން މައްޗަށް!
އެއީ 1682 ވަނަ އަހަރު ޣަރަގުވި ޝާހީ އަސްކަރީ މަނަވަރެއް ކަމަށްވާ ދަ ގްލޮސްޓާ
ދަ ގްލޮސްޓާ - އެއީ 1682 ވަނަ އަހަރު ޣަރަގުވި ޝާހީ އަސްކަރީ މަނަވަރެއް
އިންގްލަންޑްގައި ވެރިކަން ކުރައްވާނެ ރަސްކަލަކު ގޮވައިގެން ދަތުރު ކުރަމުން ދަނިކޮށް ބްރިޓްންގެ އިރުމަތީ އައްސޭރިފަށުން ކަނޑުގެ ސަރަހައްދަށް، 1682 ވަނަ އަހަރު ޣަރަގުވި ޝާހީ އަސްކަރީ މަނަވަރުގެ ވާހަކަތައް، އަހަރުތަކެއް ވަންދެން ސިއްރު ކޮށްފައި ބޭއްވުމަށްފަހު، ހުކުރު ދުވަހު އާންމު ކޮށްފިއެވެ.
މީގެ އެތައް ސަތޭކެ އަހަރެއް ކުރިން ޣަރަގުވި މަނަވަރުގެ މައުލޫމާތު، 15 ވަރަކަށް އަހަރު ދުވަސް ވަންދެން ސިއްރު ކޮށްފައި އޮތީ، އެފަދަ ތަކެތިން ވައްކަން ކޮށް އުޅޭ ވަގުންގެ ހަމަލާތަކުން ސަލާމަތް ވުމަށެވެ.
އެއީ މީގެ 340 އަހަރު ކުރިއެވެ. "ދަ ގްލޮސްޓާ"ގެ ނަން ދީފައިވާ މަނަވަރުގައި، އޭރުގެ ޑިއުކް އޮފް ޔޯކް، ކިންގް ޖޭމްސް 2 ވަނަ ދަތުރުފުޅު ކުރައްވަމުން ގެންދެވިއެވެ. ފެތެމުން ދިޔަ މަނަވަރުން އޭނާއަށް ސަލާމަތްވެވަޑައިގެންނެވުނީ ހަމަ ކިރިޔާއެވެ. ރަސްގެފާނުގެ ލަގަބު، އޭރުގެ ޑިއުކް އޮފް ޔޯކްއަށް ލިބިވަޑައިގަތީ އޭގެ 3 އަހަރު ފަހުންނެވެ.
މަނަވަރު ޣަރަގުވި ސީދާ ސަރަހައްދު އޮތީ ދާދި ފަހަކާ ޖެހެންދެންވެސް ވީ ނުވީއެއް ނޭނގިއެވެ. އެ ސަރަހައްދު ހޯދީ ޑައިވް ކުރުމުގައި ހަރަކާތްތެރިވާ ދެބެން ކަމަށް ވާ، ޖޫލިއަންއާއި ލިންކަން ބާންވެލްއެވެ. 4 އަހަރު ދުވަހުގެ މަސައްކަތް، އެ ސަރަހައްދުގައި ފެށީ 2007 ވަނަ އަހަރުއެވެ.
ތާރީހީ ކިތަންމެ އާސާރެއް، މަނަވަރު ޣަރަގުވި ސަރަހައްދުން ވަނީ ފެނިފައެވެ. އޭގެ ތެރޭގައި އެމެރިކާގެ ރައީސް ޖޯޖް ވޮޝިންގްޓަންގެ އާއިލީ ނަސަބުގެ ގޮތުން ތާރީހުގެ ތެރެއަށް ވަދެގެންދާ އެއްޗެހިވެސް ހުއްޓެވެ.
މަނަވަރުން ފެނުނު ބައެއް ސަމާނުގެ ތެރޭގައި، ނިޔަމި ކަމުގެ އަލާތްތަކާއި، ޒާތީ ގުޅުންހުރި ތަކެއްޗާއި އަންނައުނު ފަދަ ތަކެތި ހިމެނެއެވެ.
ޕްރޮފެސާ އޮފް ރެނޮސާންސް ސްޓަޑީޒް، ކްލެއާ ޖޮވިޓް ވިދާޅުވި ގޮތުގައި، މަނަވަރު ޣަރަގު ވަމުން ދިޔަލެއް އަވަސް ކަމުން، މުދާ ސަލާމަތް ކުރުމަށް އެއްވެސް މީހަކަށް ފުރުސަތު ނުލިބޭނެ ކަމަށެވެ.
ލިންކަން ބާންވެލް އަމާޒު ކަނޑައަޅައިގެން ހުރީ "ދަ ގްލޮސްޓާ"ގެ އިތުރު ހޯދުންތައް ހޯދާށެވެ. އޭނާ ގަބޫލު ކުރާ ގޮތުގައި ރަނުން ޖަރީކޮށްފައި ވާ މަނަވަރުގެ ހުންގާނު ވަނީ، ކަނޑުގެ ސަތަހާގައި އުފެދިފައިވާ ވެލީގެ ފަރުބަދައިގެ ތެރޭގައި ވަޅުޖެހިފައެވެ.
"ދަ ގްލޮސްޓާ" ޣަރަގުވި ހާދިސާގައި 130 އާއި 250 އާ ދެމެދު އަދަދެއްގެ މީހުންގެ ފުރާނަ ގެއްލިފައިވުން އެކަށީގެން ވާ ކަމަށް، ޔުނިވާސިޓީ އޮފް އީސްޓް އެންގްލިއާގެ ދިރާސީ ބައިވެރިން ވަނީ ލަފާ ކުރައްވާފައެވެ.
"ދަ ގްލޮސްޓާ" މަނަވަރު ހޯދުމުގައި ހަރަކާތްތެރިވި ޖޫލިއަން ބާންވެލް ބުނާ ގޮތުގައި ނިޔަމި ކަމުގެ ތާރީހަކީ، އަޅާ ނުލާ ދޫކޮށްލެވިފައި އޮންނަ ތަރިކައެކެވެ. އިންސާނެއްގެ ހަށިގަނޑާ އަޅާ ކިޔަނީނަމަ، އަދި މިހާތަނަށް ދިރާސާ ކުރެވިފައި ވަނީ މީހެއްގެ އަތުގެ ކުޑަވައި އިނގިލިހާ މިންވަރުގެ ތަރިކަ ކަމަށާ، ހަށިގަނޑުގެ ބާކީ ބައި އަދި އޮތީ ކަމަށް ޖޫލިއަން ބާންވެލް ވަނީ ސިފަ ކޮށްފައެވެ.
