ހުޅުމާލޭގެ ހުރިހާ މަގުތަކެއް އޮކްޓޯބަރު މަހު ނިންމާލެވޭނެ: އެޗްޑީސީ
މަގުތައް ނިމޭނީ އޮކްޓޯބަރު މަހުގެ ފަހުކޮޅުކަމަށް ލަފާކުރެވޭ
ހުޅުމާލެ މަގުމަތި
ހުޅުމާލެ ފުރަތަމަ ފިޔަވައްސާއި ދެވަނަ ފިޔަވަހީގެ މަގުތައް އަންނަ އޮކްޓޯބަރު މަހުގެ ތެރޭގައި ނިންމާލެވޭނެ ކަމަށް ލަފާކުރެވޭ ކަމުގައި ހައުސިން ޑެވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.
އެ ކުންފުނިން ބުނި ގޮތުގައި މިހާރު ވެސް މަގު ހެދުމުގެ މަސައްކަތުގެ ބޮޑު ބައެއް ވަނީ ނިމިފައެވެ. އެގޮތުން، ފުރަތަމަ ފިޔަވަހީގެ ބާކީ ހުރި މަގުތަކާއި ދެވަނަ ފިޔަވަހީގެ މަގުތަކުގެ މަސައްކަތުގެ 75 އިންސައްތަ މިހާރު ނިމިފައިވާ ކަމަށް އެ ކުންފުނިން ބުނެއެވެ.
ފުރަތަމަ ފިޔަވަހީގައި 1.95 ކިލޯ މީޓަރުގެ 10 މަގެއްގެ މަސައްކަތް މިހާރު ވެސް ދަނީ ކުރަމުން ކަމަށާއި ދެވަނަ ފިޔަވަހީގެ 6.15 ކިލޯ މީޓަރުގެ 33 މަގެއްގެ މަސައްކަތް ކުރަމުންދާ ކަމަށް އެޗްޑީސީއިން ބުނެއެވެ.
އެޗްޑީސީން ލަފާ ކުރާ ގޮތުގައި މި މަސައްކަތް ނިންމާލެވޭނީ އަންނަ އޮކްޓޯބަރު މަހުގެ ފަހުކޮޅުގައެވެ.
ހުޅުމާލޭގެ މަގުތައް މަރާމާތު ކުރުމުގެ މަސައްކަތް ކުރަމުންދާއިރު މި މަސައްކަތް ކުރުމަށް ހުޅުމާލޭގައި ޓްރެފިކް ދުއްވުމުގައި މިދިޔަ އޭޕްރިލް މަހުން ފެށިގެން ބަދަލުތަކެއްވެސް ވަނީ ގެނެސްފައެވެ.
