"ބިދޭސީންގެ މައްސަލައަށް ބަދަލެއް ފެންނާނެ"

ކުރިއަށް އޮތް އެއްމަސް ދުވަހުގެ ތެރޭގައި، ބިދޭސީންގެ މައްސަލަ ހައްލުކުރުމުގެ މަސައްކަތް އަލުން އިރާދަކުރެއްވިއްޔާ ފެށޭ ވަރަށް މަސައްކަތް ކުރިއަށް ގެންދެވޭނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙު ވިދާޅުވެއްޖެއެވެ.

ދުވަސްތަކަކަށްފަހު ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙު ނޫސްވެރިންނާއެކު ބޭއްވެވި ބައްދަލުވުމުގައި ރާއްޖެއެމްވީން ކުރި ސުވާލަކަށް ޖަވާބުދެއްވަމުން ރައީސް ވިދާޅުވީ ވެރިކަމާ ހަވާލުވެވަޑައިގެންނެވި އިރު ވެސް ބިދޭސީންގެ މައްސަލަ، ޚާއްޞަކޮށް ޤަވާއިދާ ޚިލާފަށް އުޅޭ ބިދޭސީންގެ މައްސަލައަކީ، ވަރަށް ބޮޑުވެފައި އޮތް މައްސަލައެއް ކަމަށެވެ. އެހެންކަމުން މިސަރުކާރުން ޚާއްސަ ސަމާލުކަމެއްދީގެން، އެ މަސައްކަތަށް ހައްލެއް ހޯދުން ކުރިއަށް ގެންދިޔަ ކަމަށާއި، ކޮވިޑާ އެކީގައިވެސް އެކަން ކުރިއަށްދިޔަ ކަމަށް ރައީސް ވިދާޅުވިއެވެ.

އަދި ހުއްދަނެތި ރާއްޖޭގައި އުޅޭ މީހުންގެ ތެރެއިން ވޮލަންޓިއަރ ކޮށްގެން، ގާތްގަނޑަކަށް 14000 މީހުން ފުރުވާލެވުނު ކަމަށެވެ. އަދި މަގުމަތިން، ގަވާއިދާ ޚިލާފަށް އުޅެގެން 8000 މީހުންނާއެކު، މުޅިއެކު 24000 މީހުން އެބުރުގައި ފޮނުވާލެވުނު ކަމަށް ރައީސް ވިދާޅުވިއެވެ.

މީގެއިތުރުން ރައީސް ވިދާޅުވީ ހުއްދަ ނެތި އުޅޭ ބިދޭސީން ނިސްބަތްވާ ޤައުމުތަކުގެ އެމްބަސީތަކާ ސަރުކާރުން އަލުން މަޝްވަރާތައް ކުރިއަށް ގެންދާނެކަމަށެވެ. އަދި ޕާސްޕޯޓް ނެތް މީހުންވެސް އުޅޭތީ، އެމީހުންގެ ޕާސްޕޯޓުތައް ހައްދައި، އެމީހުން ފުރުވާލުމުގެ ކަންތައްތައް ކުރިއަށްދާނެ ކަމަށް ރައީސް ވިދާޅުވިއެވެ.