މެއި މަހު ދައުލަތަށް 1.28 ބިލިއަން ރުފިޔާ ލިބިއްޖެ
މިއަހަރު ލިބުނު އާމްދަނީ ފާއިތުވި އަހަރަށްވުރެ 63 އިންސައްތަ އިތުރު
މޯލްޑިވްސް އިންލެންޑް ރެވެނިއު އޮތޯރިޓީ (މީރާ)
މިދިޔަ މެއި މަހު މީރާއަށް 1.28 ބިލިއަން ރުފިޔާ ބަލައިގަނެފައިވާކަމަށް އެ އިދާރާއިން ހާމަކޮށްފިއެވެ.
މީރާއިން ބުނާގޮތުގައި މި އަދަދަކީ ވޭތުވެދިޔަ އަހަރުގެ މި މުއްދަތުގައި ލިބުނު އާމްދަނީއަށްވުރެ 63 އިންސައްތަ އިތުރު އަދަދެކެވެ. އަދި، މެއި 2022 ގައި ލިބޭނެކަމަށް އަންދާޒާކޮށްފައިވާ އަދަދަށްވުރެ 12.8 އިންސައްތަ އިތުރު އަދަދެކެވެ.
މިދިޔަ އަހަރުގެ މެއި މަހު ލިބުނު އާމްދަނީއަށްވުރެ މިއަހަރުގެ މެއި މަހު ލިބުނު އާމްދަނީ އިތުރުވެފައިވަނީ މިއަހަރު ރާއްޖެ ޒިޔާރަތްކުރި ފަތުރުވެރިން އިތުރުވުމުން ކަމަށް މީރާއިން ބުނެފައިވެއެވެ. އެއާއެކު ފަތުރުވެރިކަމުގެ ދާއިރާއާ ގުޅުންހުރި ޓެކްސްތަކުން ލިބުނު އާމްދަނީ އިތުރުވެފައިވާކަމަށް މީރާއިން ބުނެފައިވެއެވެ.
ފަތުރުވެރިކަމުގެ އިތުރަށް އެއަރޕޯޓް ޓެކުހާއި ފީ ނެގުމުގެ ގާނޫނަށް ގެނައި އިސްލާހާއެކުވެސް އާމްދަނީއަށް ކުރިއެރުމެއް ލިބިފައިވާކަމަށާއި، މީގެ އިތުރުން ޖީޖީއެސްޓީ އަދި ނަން-ރެޒިޑެންޓް ވިތްހޯލްޑިންގ ޓެކްސްގެ ގޮތުގައި ވެސް ބޮޑު އާމްދަނީއެއް ލިބިފައިވާކަމަށް މީރާއިން ބުނެފައިވެއެވެ.
މެއި 2022 ގައި މީރާއަށް ބަލައިގަތް އާމްދަނީގެ އެންމެ ބޮޑު ބައެއް ހިއްސާކުރަނީ ޖީ.އެސް.ޓީއެވެ. އެއީ 64.7 އިންސައްތަ ނުވަތަ 829.44 މިލިއަން ރުފިޔާއެވެ. ދެން އެންމެ ބޮޑު އާމްދަނީއެއް ލިބިފައިވަނީ އިންކަމް ޓެކްސް އިންނެވެ. އެއީ 8.3 އިންސައްތަ ނުވަތަ 105.85 މިލިއަން ރުފިޔާއެވެ. މީގެ އިތުރުން، ގްރީން ޓެކްސްގެ ގޮތުގައި 96.58 މިލިއަން ރުފިޔާ ލިބިފައިވާއިރު، އެއަރޕޯޓް ޑިވެލޮޕްމަންޓް ފީގެ ގޮތުގައި 60.61 މިލިއަން ރުފިޔާ މީރާއަށް ލިބިފައިވެއެވެ. އެއަރޕޯޓް ސަރވިސް ޗާޖްގެ ގޮތުގައި 59.80 މިލިއަން ރުފިޔާ އަދި އެހެނިހެން ޓެކުހާއި ފީގެ ގޮތުގައި 129.81 މިލިއަން ރުފިޔާ ލިބިފައިވާކަމަށް މީރާއިން ހާމަކުރެއެވެ.
މެއި 2022 ގައި ބަލައިގަނެފައިވާ އާމްދަނީގެ ތެރޭގައި 53.47 މިލިއަން އެމެރިކާ ޑޮލަރު ހިމެނެއެވެ.
