ތިން ރަށެއްގެ ސްކޫލްގެ އައު އިމާރާތް އެޅުމަށް ބަޔަކާ ހަވާލުކޮށްފި
9 ޖޫން 2022 | ބުރާސްފަތި 17:00މިމަސައްކަތްތައް ހަވާލުކޮށްފައިވަނީ 365 ދުވަހުގެތެރޭގައި ނިންމާ ގޮތަށް
ހދ. ކުޅުދުއްފުށީ އަފީފުއްދީން ސްކޫލުގެ 3 ފަންގިފިލާގެ އިމާރާތުގެ މަސައްކަތް ހަވާލުކުރުމުގެ އެއްބަސްވުމުގައި ސޮއިކުރަނީ
ތިން ރަށެއްގެ ސްކޫލްގެ އައު އިމާރާތް އެޅުމަށް ބަޔަކާ ހަވާލުކޮށްފިއެވެ.
އެގޮތުން ހަވާލުކުރި އެއް ސްކޫލަކީ ހދ. ކުޅުދުއްފުށީ އަފީފުއްދީން ސްކޫލުގެ 3 ފަންގިފިލާގެ އިމާރާތުގެ މަސައްކަތެވެ. މިމަސައްކަތުގެ އެއްބަސްވުމުގައި ސޮއިކޮށްފައިވަނީ ވެންޒާ ކޮމްޕެނީ ޕްރައިވެޓް ލިމިޓެޑާއެކުއެވެ. މި މަސައްކަތް ހަވާލުކުރީީ 365 ދުވަސް ތެރޭގައި ނިންމާގޮތަށް، 7,676,348.33ރ (ހަތް މިލިޔަން ހަ ލައްކަ ހަތްދިހަ ހަހާސް ތިންސަތޭކަ ސާޅީސް އަށްރުފިޔާ ތިރީސް ތިން ލާރި)އަށެވެ.
ނ. މާފަރު ސްކޫލުގެ 4 ކުލާސްރޫމާއި މަލްޓިޕަރޕަސް ހޯލް އިމާރާތުގެ މަސައްކަތް ހަވާލުކޮށްފައިވަނީ ސްވިފްޓް އިންޖިނިއަރިންގ ޕްރައިވެޓް ލިމިޓެޑާއެވެ. މި މަސައްކަތް ހަވާލުކުރީ 365 ދުވަސް ތެރޭގައި ނިންމާގޮތަށް، 20,538,739.46ރ (ވިހި މިލިޔަން ފަސްލައްކަ ތިރީސް އަށްހާސް ހަތްސަތޭކަ ތިރީސް ނުވަ ރުފިޔާ ސާޅީސް ހަ ލާރި)އަށެވެ.
މީގެއިތުރުން ރ. އަތޮޅު ތައުލީމީ މަރުކަޒުގެ 2 ފަންގިފިލާގެ އިމާރާތުގެ މަސައްކަތްވެސް ވަނީ ބަދަހި އިންވެސްޓްމެންޓް ޕްރައިވެޓް ލިމިޓެޑާ ހަވާލުކޮށްފައެވެ. މި މަސައްކަތް ހަވާލުކޮށްފައިވަނީ 365 ދުވަހުގެ ތެރޭގައި ނިންމާގޮތަށެވެ. އެއީ 8,338,708.36ރ (އަށް މިލިޔަން ތިންލައްކަ ތިރީސް އަށްހާސް ހަތްސަތޭކަ އަށްރުފިޔާ ތިރީސް ހަ ލާރި)އަށެވެ.
