މި މަހުގެ 10 ވަނަ ދުވަހު ޖަޕާނުގެ ބޯޑަރު ހުޅުވާލަނީ

ކޮވިޑާއި ގުޅިގެން ފަތުރުވެރިންނަށް ޖަޕާނުގެ ބޯޑަރުތައް ބަންދުކޮށްފައި އޮތުމަށްފަހު މި މަހުގެ 10 ވަނަ ދުވަހު ޖަޕާނުގެ ބޯޑަރުތައް ހުޅުވާލަން ނިންމައިފިއެވެ.

ދެ އަހަރުގެ ބަންދަކަށް ފަހު ޖަޕާނުގެ ބޯޑަރުތައް ފަތުރުވެރިންނަށް އަލުން ހުޅުވައިލާނީ ފޭސްތަކަކަށް ބަހާލައިގެންނެވެ. އެގޮތުން، އެ ޤައުމަށް އެތެރެވުމަށް ފުރަތަމަ ފުރުޞަތު ލިބޭނީ "ޓުއަރ ޕެކޭޖް" ތަކުގެ ދަށުން ދަތުރުކުރާ ފަތުރުވެރިންނަށެވެ.

ފަތުރުވެރިންނަށް ޤައުމު އަލުން ހުޅުވައިލަނީ ގިނަ ފިޔަވަޅުތަކަކާ އެކުގައި ކަމަށް ޖަޕާން ޓޫރިޒަމް އޭޖެންސީ (ޖޭ.ޓީ.އޭ) އިން ބުނެފައިވާއިރު، މާސްކު އެޅުމާއި، އެ ޤައުމަށް ދަތުރު ކުރެވޭނީ މެޑިކަލް އިންޝުއަރެންސް ހައްދައިގެން ކަމަށް ވެސް ވަނީ ބުނެފައެވެ. އަދި، ހުރިހާ ފަތުރުވެރިން ވެސް ޖަޕާނަށް އެތެރެވުމަށް ފަހު އުޅެން ޖެހެނީ ޓުއަރ ގައިޑެއްގެ ބެލުމުގެ ދަށުން ކަމަށް ބޭރުގެ މީޑިއާތަކުން ވަނީ ރިޕޯޓްކޮށްފައެވެ.

ޖަޕާނުން ފަތުރުވެރިންނަށް ބޯޑަރު ހުޅުވާލުމުގެ މަސައްކަތް ފަށާފައި މިވަނީ ވިޔަފާރި ވެރިންނާއި އަދި ބައިނަލްއަޤްވާމީ އެކި ފަރާތްތަކުގެ ޕްރެޝަރު ކުރުންތަކާ އެކުއެވެ. ޖަޕާނުން ޓުއަރިޒަމްއަށް އަލުން ހުޅުވާލުމަށް ފަށާ މަސައްކަތުގެ ތެރެއިން "ޓެސްޓް ޓުއަރިޒަމް" ގެ ނަމުގައި މި މެއި މަހު ކުދިކުދި ގްރޫޕް ޓުއަރ ދަތުރުތައް ވެސް ވަނީ ފަށާފައެވެ. މިވަގުތު ދީފައިވާ ލުއިތަކުގެ ދަށުން ދުވާލަކު 10 ހާސް މީހުންނަށް އެގައުމަށް އެތެރެވެވެއެވެ. ނަމަވެސް މީގެތެރޭގައި އަރާމުކުރުމަށްދާ ފަތުރުވެރިން ނުހިމެނެއެވެ. ޖަޕާނަށް އެތެރެވުމަށް މިވަގުތު ހުއްދަދެވޭ ފަރާތްތަކުގެ ތެރޭގައި ޖަޕާނުގެ ރައްޔިތުން، ޖަޕާނުގެ ވަޒަންވެރިން، ކިޔަވާ ކުދިން، ރިސަރޗް މަސައްކަތް ކުރާ ފަރާތްތައް، ވަޒަންވެރިންގެ އާއިލާ މެމްބަރުން އަދި ރަސްމީ ބޭނުންތަކަށް ދަތުރު ކުރަންޖެހޭ ފަރާތްތައް ހިމެނެއެވެ. މީގެތެރެއިންވެސް ބައެއް މީހުން ކަރަންޓީން ވާން ޖެހެއެވެ. އެއީ އެމީހުން އަންނަ ސަރަހައްދުގައި ކޮވިޑްގެ ހާލަތު ގޯސްނަމައެވެ.

ޖަޕާން އަކީ އެގައުމަށް ޚާއްސަ ޗެރީ ބްލޮސަމް ފަދަ އާދަޔާ ޚިލާފް ރީތި މާމެލާމެލީގެ ބަގީޗާތައް އެކުލެވޭ ގައުމަކަށް ވާއިރު، އެތަންތަނުގެ އިތުރުން ފަރުބަދަމަތީގެ ރީތި މަންޒަރުތަކާ އާސާރީ ބިނާތައް އަދި އެގައުމުގެ ސަގާފީ އެކި އެކި ހަރަކާތްތައް ބަލާލުމަށް ވަރަށް ގިނަ ފަތުރުވެރިން ޒިޔާރަތް ކުރާ ޤައުމެކެވެ.