އިސްލާމީ 5 ގައުމަކަށް ސައޫދީ އަރަބިއްޔާއިން "މައްކާ ރޯޑް" ހުޅުވާލައިފި
މައްކާރޯޑްގައި ބައިވެރިކޮށްފައިވަނީ މުސްލިމުން އެންމެ ގިނަ ގައުމުތައް
ހައްޖު 1443
1443 ވަނަ އަހަރުގެ ހައްޖުގެ އަޅުކަމަށްޓަކައި އިސްލާމީ ފަސްގައުމަކަށް ޚާއްސަ ކޮށްގެން ސައޫދީ އަރަބިއްޔާއިން "މައްކާ ރޯޑް", ނުވަތަ މައްކާއަށް ދެވޭ މަގުގެ ނަމުގައި ކުރިއަށް ގެންދާ އެހީތެރިކަމުގެ ޚާއްސަ ޕްރޮގްރާމް މިއަހަރުވެސްފަށަފިއެވެ. 2019 ވަނަ އަހަރު މިކަން ފެށިފަހުން މިއީ މައްކާރޯޑްގެ ކަންތައްތައް ކުރިއަށްގެންދާ ހަތަރުވަނަ ފަހަރެވެ.
މައްކާ ރޯޑް އިނީޝިއޭޓިވްގެ ދަށުން، ސައޫދީގެ ކަމާބެހޭ އިދާރާތައް ގުޅިގެން 5 ގައުމަކުން ހައްޖަށްދާ ހައްޖާޖީންގެ ދަތުރުގެ ކަންތައް ފަސޭހަކޮށްދިނުމަށް މަސައްކަތްކުރާނެއެވެ. މި 5 ގައުމަކީ ޕާކިސްތާން މެލޭޝިޔާ އިންޑޮނީޝިޔާ މޮރޯކޯ އަދި ބަންގްލަދޭޝްއެވެ.
މިހަރަކާތުގެ ދަށުން، މި 5 ގައުމުގެ ހައްޖާޖީންގެ ހުރިހާ ކަމެއް އެމީހުންގެ ގައުމާހަމައިން ފެށިގެން ސައޫދީ ސަރުކާރުން ބަލަމުން ގެންދާނެކަމަށްވެއެވެ. މިގޮތުން އޮންލައިންކޮން ވިސާ ދިނުމާއި ޕާސްޕޯޓްގެ މުއްދަތުހަމަވެފައިވޭތޯ ބެލުމާއި ވެކްސިންތަކާއި އެހެންވެސް ސިއްހީގޮތުން ބަލަންޖެހޭ ކަންކަން ބެލުން ހިމެނެއެވެ. އެންމެ ޚާއްސަކަމެއްގެގޮތުގައި ހައްޖާޖީން ސައޫދީއަށް ދިއުމުން އެމީހުން ބަލައިދިއުމާއި ތިބެން ހަމަޖެހިފައިވާ ހޮޓަލަށް ގެންދިއުމުގެ ޚިދުމަށް ވެސް ދޭނެކަމަށްވެއެވެ. މިގޮތުން އެމީހުންގެ ފޮށިތަންމައްޗާއި އެހެންވެސް ލަގެޖަށް ޚާއްސަ ކޯޑް ތަކެއްދީ، ފޮށިތަންމަތި ހައްޖާޖީން ހޮޓަލަށް ދާންވާއިރަށް ހޮޓަލަށް ގެންގޮސްދޭނެކަމަށްވެއެވެ. ކުރިންދެންނެވުނު ފަސް ގައުމުގެ ހައްޖާޖީން ސައޫދީއަށް ދިއުމާއެކު، ވަކި ޚާއްސަ ބަސްތަކެއްގައި، މައްކާއާއި މަދީނާގައި އެމީހުން ތިބެން ހަމަޖެހިފައިވާ ހޮޓާތަކަށް ގެންދެވޭނެއެވެ. އަދި ހައްޖުގެ އަޅުކަން ފުރިހަމަކުރުމުގައިވެސް ޚާއްސަ އެހީތެރިކަން ފޯރުކޮށްދޭނެކަމަށްވެއެވެ.
"މައްކާ ރޯޑް" ހަރަކާތް ކުރިޔަށް ގެންދަނީ ސައޫދީ އަރަބިއްޔާގެ މިނިސްޓްރީ އޮފް ފޮރިންއެފެއަރޒް، ހެލްތު، ހައްޖު އެންޑް އުމްރާ އޮފީސް، ސިވިލް އެވިއޭޝަން، ޒަކާތު އޮފީސް، ކަސްޓަމްސް އޮތޯރިޓީ އަދި ސައޫދީ ޑޭޓާ އެންޑް އާޓިފިޝަލް އިންޓެލިޖަންސް އޮތޯރިޓީ ގުޅިގެންނެވެ.
