އައިޓީއެފްސީން އެސްޓީއޯއަށް 175 މިލިއަން ޑޮލަރުގެ އެހީ
2019 ވަނަ އަހަރަށްފަހު އައިޓީއެފްސީން އަންނަނީ އެސްޓީއޯއަށް އެހީވަމުން
އައިޓީއެފްސީއާއި އެސްޓީއޯއާ ދެމެދު އެއްބަސްވުމުގައި ސޮއިކުރުން
އިސްލާމިކް ޓްރޭޑް ފައިނޭންސް ކޯޕަރޭޝަން (އައިޓީއެފްސީ)އިން ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އަށް 175 މިލިއަން ޑޮލަރުގެ ޓްރޭޑް ފައިނޭންސިން ދީފިއެވެ.
އައިޓީއެފްސީގެ މުރާބަހާ ޓްރޭޑް ފައިނޭންސިންގެ އެއްބަސްވުމުގައި އެންމެ ފުރަތަމަ އެސްޓީއޯއިން ސޮއިކޮށްފައިވަނީ 2019 ވަނަ އަހަރުގެ އޮކްޓޯބަރު މަހުއެވެ. 2019 ވަނަ އަހަރަށްފަހު އައިޓީއެފްސީން އަންނަނީ ކޮންމެ އަހަރަކުވެސް އެސްޓީއޯއަށް އެހީތެރިކަން ފޯރުކޮށްދެމުންނެވެ.
މި ފެސިލިޓީގެ ދަށުން މިއަހަރު 175 މިލިއަން ޑޮލަރު ރާއްޖެއަށް ދިނުމަށް އެއްބަސްވެފައިވާއިރު، މި އެއްބަސްވުމުގައި ސޮއިކޮށްފައިވަނީ މިސްރުގައި މިހާރު ކުރިއަށްދާ އައިއެސްޑީބީ 2022 އަހަރީ ބައްދަލުވުމުގެ ތެރެއިންނެވެ. އެސްޓީއޯގެ ފަރާތުން އެއްބަސްވުމުގައި ސޮއިކުރެއްވީ ސީއީއޯ އަދި މެނޭޖިންގ ޑިރެކްޓަރު ހުސެއިން އަމްރެވެ. އައިޓީއެފްސީގެ ފަރާތުން އެއްބަސްވުމުގައި ސޮއިކުރެއްވީ ސީއީއޯ ހާނީ ސާލެމް ސޮންބޮލްއެވެ. މި ރަސްމިއްޔާތުގައި ފިނޭންސް މިނިސްޓަރު އިބްރާހިމް އަމީރު ވަނީ ބައިވެރިވެވަޑައިގެންފައެވެ.
މި ޓްރޭޑް ފައިނޭންސިންގެ ތެރެއިން އެސްޓީއޯއިން ރާއްޖެއަށް ބޭނުންވާ އަސާސީ މުދާ ގެންނާނެއެވެ. މިގޮތުން ތެލާއި، އަސާސީ ކާނާގެ ބާވަތްތަކާއި، ބޭހާއި، ސިއްހީ ދާއިރާއަށް ބޭނުންވާ އެކި އާލަތްތައް ގެނައުން ހިމެނެއެވެ.
އެސްޓީއޯއިން ގެންދަނީ ރާއްޖެއަށް ކޮންމެހެން ބޭނުންވާ ތަކެތި މެދުކެނޑުމެއް ނެތި ލިބޭނެކަމުން ޔަގީންކުރަމުންނެވެ. ކޮވިޑް-19ގެ ހާލަތުގައިވެސް ރާއްޖެއަށް ބެނުންވާ ކާނާއާއި، ބޭހާއި އަދި މިނޫންވެސް ތަކެތި މެދުކެނޑުމެއް ނެތި ފޯރުކޮށްދިނުމަށް އެސްޓީއޯއިން ވަނީ މަސައްކަތްކޮށްފައެވެ.
2021 ވަނަ އަހަރު ގޮންޖެހުންތަކެއް ކުރިމަތިވިނަމަވެސް އެކުންފުނިން ވަނީ، ކުންފުނީގެ ތާރީޚުގައި ހޯދާފައި ނުވާވަރުގެ ބޮޑު ކާމިޔާބީއެއް ހޯދާފައެވެ. 2021 ވަނަ އަހަރު އެ ކުންފުންޏަށް 10.1 ބިލިއަން ރުފިޔާ ލިބިފައިވާއިރު ސާފު ފައިދާގެ ގޮތުގައި 478.5 މިލިއަން ރުފިޔާ ވަނީ ލިބިފައެވެ.
