ޔޫއެސް ހައުސް ސްޕީކަރު ނޭންސީ ޕެލޯސީގެ ފިރިކަލުން ހައްޔަރުކޮށްފި

އެމެރިކާގެ ޤާނޫނު ހަދާ މަޖިލީހުގެ ތިރީގެ، ޔޫއެސް ހައުސް އޮފް ރެޕްރެޒެންޓެޓިވްސްގެ ރައީސް ނޭންސީ ޕެލޯސީގެ ފިރިކަލުން ޕޯލް ޕެލޯސީ ހައްޔަރުކޮށްފިއެވެ.

ހޮނިހިރު ދުވަހުގެ ރޭ އޭނާ ހައްޔަރުކޮށްފައިވަނީ މަސްތުގެ ހާލަތުގައި ހުރެ ކާރު ދުއްވި ކަމުގެ ތުހުމަތުގައެވެ. އޭނާ ހައްޔަރު ކުރީ އެމެރިކާގެ ކެލިފޯނިއާއިންނެވެ.

ރޮއިޓާސް އިން ރިޕޯޓްކޮށްފައިވާ ގޮތުގައި އޭނާގެ މައްޗަށް ތުހުމަތެއް ކުރިއެވެ. ބެއިލްގެ ގޮތުގައި 5000 ޑޮލަރު ދެއްކުމުން އާދީއްތަ ދުވަހުގެ ހެނދުނު އޭނާ ދޫކޮށްލާފައިވާ ކަމަށް ވެސް ރިޕޯޓުތައް ދައްކައެވެ.

ޕެލޯސީގެ ފިރިކަލުން ހައްޔަރުކުރި އިރު އޭނާ ހުންނެވީ އެމެރިކާގެ ރޯޑް އައިލެންޑުގެ ޔުނިވާސިޓީއެއްގެ ހަފްލާއަކަށް ވައިޑައިގެންނެވެ. އެ މައްސަލާގައި ޕެލޯސީ އެއްވެސް އެއްޗެއް ވިދާޅުވަން ބެނުންފުޅު ނުވާ ކަމަށް އޭނާގެ ތަރުޖަމާނާ ހަވާލާދީ ރޮއިޓާސް އިން ވަނީ ރިޕޯޓްކޮށްފައެވެ.

ނޭންސީ ޕެލޯސީ އާއި ޕޯލް ޕެލޯސީ ކައިވެނި ބައްލަވައިގަތީ 1963ގައެވެ.