ކްރިމިނަލް ކޯޓުގައި ނުނިމިހުރި މައްސަލަތައް ނިންމައި، އެ ކޯޓުގެ "ބެކްލޮގް" ސާފުކުރުމަށްޓަކައި ކޯޓުގެ މަސައްކަތު ގަޑި އިތުރުކޮށްފިއެވެ.

އެކަމާ ގުޅޭގޮތުން ކްރިމިނަލް ކޯޓުން ބުނީ، މިހާރު މަސައްކަތް ކުރާ ރަސްމީ ގަޑީގެ އިތުރުން، މެންދުރު ފަހު 14:00ން ހަވީރު 05:00ށް މައްސަލަތައް ތާވަލު ކުރުމަށް ކޯޓުން ނިންމާފައިވާ ކަމަށެވެ. އެގޮތަށް މަސައްކަތް ކުރުމަށް ހަމަޖެހިފައިވަނީ 1 ޖޫންއިން ފެށިގެން 3 މަސް ދުވަހުގެ މުއްދަތަކަށެވެ.

މި ބަދަލަކީ ޖުޑީޝަލް ސަރވިސް ކޮމިޝަން (ޖޭއެސްސީ) އިން ކްރިމިނަލް ކޯޓުގެ ފަނޑިޔާރުންނާއި މަޝްވަރާ ކުރުމަށްފަހު ރައްޔިތުންގެ މަޖިލީހުގެ ޖުޑީޝަރީ ކޮމިޓީގައިވެސް އެކަންކަމާއި ގުޅިގެން މަޝްވަރާ ކުރެވިފައިވާ ބަދަލެކެވެ. އެގޮތުން 16 ފެބްރުއަރީ ގައި ބޭއްވުނު ޖުޑީޝަރީ ކޮމިޓީގައި މިކަމާ ގުޅޭގޮތުން ފުޅާ ދާއިރާއެއްގައި މަޝްވަރާ ކުރެވިފައިވެއެވެ.

މިހާރު ހުރި ވަސީލަތްތަކާއެކު މަސައްކަތް ކުރާނަމަ، ކޯޓުގެ ބެކްލޮގް ސާފު ކުރުމަށް 16 އަހަރު ނަގާނެ ކަމަށާއި، ވުމާއެކު އެހެން ވިސްނުމަކަށް ދާން ޖެހޭކަމަށް އެ ދުވަހު ޖޭއެސްސީން ވަނީ ބުނެފައެވެ.

2019 ވަނަ އަހަރު ފެށިގެން ދިޔައިރު ކޯޓުގެ ބެކްލޮގްގައި 2022 މައްސަލަ އޮތެވެ. އަހަރަކު އެ ކޯޓަށް އެވްރެޖްކޮށް 900 މައްސަލަ ހުށައެޅޭއިރު، ބެކްލޮގާއެކު ކޯޓުން ގިނަ މަސައްކަތްތަކެއް ކުރަންޖެހެއެވެ. އަދި 2020 ވަނަ އަހަރާއި 2021 ވަނަ އަހަރު ކޮވިޑުގެ ޙާލަތާއި ގުޅިގެންވެސް އެ މަސައްކަތްތަކަށް މަޑުޖެހުމެއް އައިސްފައިވެއެވެ.

ޖިނާއީ އިޖުރާއަތުގެ ތަސައްވުރަކީ ކޯޓަށް ހުށައެޅޭ ހިސާބުން 6 މަސް ދުވަހުގެ ތެރޭގައި މައްސަލަތައް ނިންމާލުމެވެ. އެވްރެޖްކޮށް މައްސަލައެއް ނިންމަން 10 އަޑުއެހުން ބޭނުންވާއިރު، އެކަންކަން ޙާސިލު ކުރުމަށް ހުށައަޅާފައިވާ ހުށައެޅުންތައް އޭރު ޖޭއެސްސީން ވަނީ ކްރިމިނަލް ކޯޓުގެ ފަނޑިޔާރުންނާ މަޝްވަރާކޮށް ކޮމިޓީއަށް ހުށައަޅާފައެވެ. އޭގެ ތެރޭގައި މަސައްކަތުގެ ގަޑި 05:00ށް އިތުރު ކުރުންވެސް ހިމެނިފައިވެއެވެ.

އޭގެ އިތުރުން،  ކްރިމިނަލް ކޯޓަށް 10 ޕެރަ ލީގަލް އޮފިސަރުން ނެގުމަށްވެސް ހުށައެޅިއެވެ. ރާއްޖެއެމްވީއަށް މައުލޫމާތު ލިބިފައިވާ ގޮތުގައި މިހާރު ޕެރަ ލީގަލް އޮފިސަރުންތަކެއްވެސް ވަނީ ކޯޓުގެ މަސައްކަތާ ގުޅިފައެވެ.

ބެކްލޮގް ސާފު ކުރަން މަސައްކަތްކުރާ ގަޑީގައި (2-5) ކޯޓާއި ޕީޖީ އޮފީހުގެ މުވައްޒަފުންނަށް އޯޓީގެ އިތުރުން އެލަވަންސެއް ދިނުމަށްވެސް އޭރު ހުށައެޅިއެވެ. ރާއްޖެއެމްވީން ސުވާލުކޮށްލުމުން ޖޭއެސްސީން ބުނީ، އިތުރު ގަޑީގެ އިތުރުން އެލަވަންސްވެސް ދޭނެ ކަމަށެވެ. އެގޮތުން އެލަވަންސް ދެނީ ހަމައެކަނި ކޯޓުގެ މުވައްޒަފުންނަށް ކަމަށް ޖޭއެސްސީން މައުލޫމާތު ދެއެވެ.

ބެކްލޮގް އެލަވަންސްއެއް ދިނުމަށް ވިސްނާއިރު، ދައުލަތުން އިތުރަށް ކުރަންޖެހޭ ޚަރަދަކީ އަހަރެއްގެ މައްޗަށް 3.3 މިލިއަން ރުފިޔާ ކަމަށް ޖޭއެސްސީން ބުނެއެވެ. ނަމަވެސް މި ބަދަލުތަކާއެކުވެސް  ސާފުވެއްޖެނަމަ ކޯޓުގެ ގާޒީއަކަށް އެވްރެޖްކޮށް އަހަރެއްގެ މައްޗަށް ބައްލަވަން ޖެހިވަޑައިގަންނަވާނީ ގިނަވެގެން 80 މައްސަލަކަމަށް ޖޭއެސްސީން ވަނީ ބުނެފައެވެ.