ނިމިގެންދިޔަ 2021/22 ސީޒަނަކީ ރެއާލް މެޑްރިޑްގެ ކޯޗު ކާލޯ އަންޗެލޯޓީއަށް ޚާއްސަ ސީޒަނެކެވެ. މި ސީޒަންގައި އޭނާ ވަނީ ރެއާލްއަށް ގިނަ ކާމިޔާބީތަކެއް ހޯދައިދީފައެވެ. ސްޕެނިޝް ލީގު ރެއާލްއަށް ކާމިޔާބުކޮށްދިނެވެ. އަދި ޔުއެފާ ޗެމްޕިއަންސް ލީގުގެ ފައިނަލުގައި ހޮނިހިރު ދުވަހުގެރޭ ލިވަޕޫލް ބަލިކޮށް އޭނާ ވަނީ ރެއާލްއަށް ޗެމްޕިއަންސް ލީގުވެސް ހޯދައިދީފައެވެ.
މި ސީޒަންގެ ޗެމްޕިއަންސް ލީގު ކާމިޔާބު ކުރުމާއެކު އަންޗެލޯޓީ ފާހަގަ ކުރެވިފައި ވަނީ މުބާރާތުގެ އެންމެ ކާމިޔާބު ކޯޗުގެ ގޮތުގައެވެ. އަންޗެލޯޓީ ވަނީ ކޯޗެއްގެ ގޮތުގައި ހަތަރު ފަހަރަށް ޗެމްޕިއަންސް ލީގުގެ ތަށި އުފުލާލާފައެވެ. އެއީ ރެއާލް މެޑްރިޑުގައި ދެފަހަރު އަދި އޭސީ މިލާންއާއެކު ދެ ފަހަރު މި މުބާރާތް ކާމިޔާބު ކޮށްގެންނެވެ. މީގެ އިތުރުން ކުޅުންތެރިއެއްގެ ގޮތުގައިވެސް އަންޗެލޯޓީ ވަނީ އޭސީ މިލާނާއެކު މިތަށި ދެ ފަހަރު އުފުލާލާފައެވެ.
އަންޗެލޯޓީ މި މުބާރާތް ހަތަރު ފަހަރު ކާމިޔާބު ކުރިއިރު، އޭނާއާ އެންމެ ގާތްކުރާ އަދަދަކަށް ޗެމްޕިއަންސް ލީގު ކާމިޔާބުކޮށްފައި ވަނީ ޒިދާންއާ ބޮބް ޕެއިސްލީއެވެ. މި ދެކޯޗުންވެސް މުބާރާތް ތިން ފަހަރު ކާމިޔާބުކުރިއެވެ.
އަންޗެލޯޓީއަށް މި ސީޒަން ޚާއްސަވާ އެހެން ސަބަބެއްވެސް އެބައޮތެވެ. މި ސީޒަންގެ ސްޕެނިޝް ލީގު ރެއާލްއަށް ކާމިޔާބު ކޮށްދީގެން އޭނާ ވަނީ ޔޫރަޕުގެ ގަދަ ފަސް ލީގު ކާމިޔާބުކުރި ހަމައެކަނި ކޯޗުގެ ޝަރަފު ލިބިގަނެފައެވެ. އަންޗެލޯޓީ ވަނީ ލަލީގާގެ އިތުރުން އިނގިރޭސި ޕްރިމިއަރ ލީގު، ބުންޑެސްލީގާ، ފްރާންސް ލީގު އަދި އިޓާލިއަން ލީގުވެސް ކާމިޔާބުކޮށްފައެވެ.
އަންޗެލޯޓީ އިޓާލިއަން ލީގު ކާމިޔާބު ކުރީ އޭސީ މިލާންއާއިއެކުއެވެ. ޗެލްސީއާއެކު އިނގިރޭސި ޕްރިމިއަރ ލީގު ކާމިޔާބު ކުރިއިރު، ބުންޑެސްލީގާ ނެގީ ބަޔާން މިއުނިކްއާއިއެކުގައެވެ. އަދި އޭނާ ވަނީ ޕީއެސްޖީއަށް ފްރާންސް ލީގު ކާމިޔާބުކޮށްދީފައެވެ. މީގެ އިތުރުން އަންޗެލޯޓީ ވަނީ ތިން ޗެމްޕިއަންސް ލީގުވެސް ކާމިޔާބު ކޮށްފައެވެ.
މީގެ ކުރިންވެސް ރެއާލްއަށް ކޯޗުކޮށްދިން އަންޗެލޯޓީ އެނބުރި އެޓީމާއި ގުޅުނީ މިސީޒަނަށެވެ. އޭނާއަކީ ޓީމުގެ ކުޅުންތެރިންނާއި ސަޕޯޓަރުންގެ ލޯބި ލިބިފައިވާ ކޯޗެކެވެ. އަންޗެލޯޓީއަކީ ރެއާލްގެ ތާރީޚުގައިވެސް ޓީމް މޮޅުކޮށްދިނުމުގެ ޕަސެންޓޭޖު އެންމެ މަތީ ކޯޗެވެ.
