މަހާނަތައް ޒީނަތްތެރިކުރުން ހުއްޓުވަން، އިސްލާމިކް މިނިސްޓްރީން ސިޓީ ކައުންސިލަށް އަންގައިފި
މަހާނަތައް ޒީނަތްތެރިކުރާ މައްސަލަ ވަނީ ބޮޑުވެފައި
ޒީނަތްތެރިކޮށްފައި ހުރި މަހާނައެއް
މަހާނަކުގެ މަތީގައި ރޭނުމާއި މަހާނަތައް ޒީނަތްތެރިކުރާތީ އެކަންކަން ހައްލުކުރުމަށް އިސްލާމިކް މިނިސްޓްރީން މާލެ ސިޓީ ކައުންސިލަށް އަންގައިފިއެވެ.
ބުރާސްފަތި ދުވަހު އިސްލާމިކް މިނިސްޓްރީން ސިޓީ ކައުންސިލަށް ފޮނުވި ސިޓީގައި ވަނީ, ގަބުރުސްތާނުތަކުގައި މަހާނަތައް ޒީނަތްތެރިކުރުމާއި މަހާނަތަކުގައި ގާފޮޅު ޖެހުމާއި ރާނާ ހަދާކަމުގެ ޝަކުވާ މިނިސްޓްރީއަށް ލިބެމުންދާކަމަށެވެ. އަދި ގަބުރުސްތާނުތަކަކީ އިސްލާމީ ޝަރީއަތުގައި ވަރަށް ބޮޑަށް ހުރުމަތްތެރި ކުރައްވާފައިވާ ތަނެއް ކަމަށާއި، މަހާނަތަކަށް އިހުމާލުވެ ހުރުމަތް ކެނޑޭފަދަ އެއްވެސް ކަމެއް ކުރުމަކީ ހުއްދަވެގެންވާ ކަމެއް ނޫންކަމަށްވެސް މިނިސްޓްރީން ފާހަގަ ކުރެއްވިއެވެ.
މިނިސްޓްރީން ބުނީ މަހާނަތައް ރާނައި ހެދުމަކީ އިސްލާމް ދީނުގައި އޮންނަ ކަމެއް ނޫންކަމަށެވެ.
މާލޭގެ ގަބުރުސްތާނުތަކުގެ މަހާނަތައް ޒީނަތްތެރިކުރާ ކަމުގެ ޝަކުވާތައް އެންމެ ބޮޑުވެފައިވަނީ އާސަހަރާގެއެވެ. އެ ސަހަރާގައި ހުރި ބައެއް މަހާނަތަކުގެ މަތި ވަނީ ވަރަށް ބޮޑަށް ޒީނަތްތެރިކޮށްފައެވެ. އެގޮތުން، މަހާނަތަކުގެ މަތީގައި ރާނައި މުށި ވެސް ވަނީ ޖަހައިފައެވެ.
