ދުނިޔޭގެ އެންމެ އުސް ފަރުބަދައިގެ ރެކޯޑް އޮންނަ ނޭޕާލަށް، ދުނިޔޭގެ އެންމެ ކުރު ޒުވާނާގެ ރެކޯޑް އަނެއްކާވެސް ލިބިއްޖެއެވެ.

ނޭޕާލްގެ އުމުރުން 18 އަހަރުގެ، ޑޯރް ބަހާދުރް މިވަނީ މިހާރު ދުނިޔޭގައި ހުރި އެންމެ ކުރު ޒުވާނާގެ ޖާގަ ގިނިސް ވޯރލްޑް ރެކޯޑް ފޮތުން ހޯދާފައެވެ. މެއި 24 ވަނަ ދުވަހު ނޭޕާލްގެ ޓޫރިޒަމް ބޯޑުންވަނީ އެކަން ފާހަގަކޮށް އޭނާއަށް ސެޓްފިކެޓް ދީފައެވެ.

ބަހާދުރްގެ އިސްކޮޅުގައި ހުންނަނީ 73.43 ސެންޓިމީޓަރ (2 ފޫޓު 4.9އިންޗި)އެވެ. އޭނާ އުފަންވެފައިވަނީ 2004ވަނަ އަހަރުގެ މާޗް މަހުގެ ނޮވެމްބަރ މަހުގެ 14ވަނަ ދުވަހުއެވެ. ބަހާދުރް ކިޔަވަމުން އަންނަނީ ގްރޭޑް 1 ގައެވެ.

"އަހަރެން ވަރަށް ދެރަވޭ އޭނަގެ އުމުރާ އެއްވަރަށް އިސްކޮޅު ދިގު ނުވާތީ، އެކަމަކު މިހާރު ވަރަށް އުފާވޭ ވޯރލްޑް ރެކޯޑް ފޮތުން ޖާގަ ލިބުމުން" ބަހާދުރްގެ ބޭބެ ނަރާ ބަހާދުރް ބުންޏެވެ.

މީގެ ކުރިންވެސް އެންމެ ކުރު ޒުވާނާގެ ރެކޯޑް އޮތީ ނޭޕާލްގައެވެ. 2010ވަނަ އަހަރު ނޭޕާލްގެ ޚަގެންދަރު ތަޕާ މަގަރް ރެކޯޑް ފޮތުން ޖާގަހޯދިއިރު އޭނާގެ އިސްކޮޅުގައި ހުންނަނީ 67.08 ސެންޓިމީޓަރެވެ. މަގަރް މަރުވީ މީގެ ދެ އަހަރު ކުރިންނެވެ.