އެސޯސިއޭޝަން ކަޕް: ކުލަބް ވޮލީ ބޯލްސް އާއި ކުލަބް އީގަލްސް ފެށީ މޮޅަކުން

ވޮލީބޯލް އެސޯސިއޭޝަނުން ކުރިއަށްގެންދާ އެސޯސިއޭޝަން ކަޕްގެ އަންހެން ޑިވިޝަންގައި ކުލަބް ވޮލީ ބޯލް އާއި ކުލަބް އީގަސްލްސް ކުޅުނު ފުރަތަމަ މެޗުން މޮޅުވެއްޖެއެވެ.

ޒުވާނުންގެ މަރުކަޒުގެ އެތެރޭ ހޯލުގައި ކުޅުނު ފުރަތަމަ މެޗުގައި ބައްދަލުކުރީ ޕޫލް އޭގެ އަލްމާ ސްޕޯޓްސް ކުލަބާއި ކުލަބް ވޮލީބޯލްއެވެ. ވާދަވެރިކޮށް ދިޔަ މެޗުގެ ފުރަތަމަ ސެޓު 24-26 ން ހޯދީ އަލްމާ ސްޕޯޓްސް ކުލަބެވެ. ނަމަވެސް ކުލަބް ވޮލީބޯލްއިން ފަހަތުން އަރައި ތިން ސެޓު ހޯދައި މެޗުން މޮޅުވެފައެވެ. އެ ތިން ސެޓު ވެސް ދިޔައީ ވަރަށް ވާދަވެރިކޮށެވެ. ކުލަބް ވޮލީބޯލްއިން ސެޓުތައް ހޯދީ 21-25، 24-16 އަދި 21-25 ންނެވެ.

ރޭގެ ދެ ވަނަ މެޗުގައި ޕޫލް ބީގެ ވޮލީބޯލް ޔޫތު ނިއު ޖެނަރޭޝަނުން ނިކުތީ ކުލަބް އީގަލްސްއާ ދެކޮޅަށެވެ. މި މެޗު ކުލަބް އީގަލްސް އިން ކާމިޔާބުކުރީ ތިން ސެޓު އެއް ސެޓުންނެވެ. މެޗުގެ ފުރަތަމަ ސެޓު 18-25 ން ހޯދީ އީގަލްސްއެވެ. ނަމަވެސް ވޮލީބޯލް ޔޫތުން ވަނީ 22-25 ން ދެވަނަ ސެޓު ހޯދާފައެވެ. ޖެހިގެން އައި ދެ ސެޓު ވެސް ހޯދީ އީގަލްސްއެވެ. އެ ދެ ސެޓު އެ ޓީމުން ހޯދީ 21-25 އަދި 17-25 ންނެވެ.

މުބާރާތުގައި 10 ޓީމު ވަނީ ބައިވެރިވެފައެވެ. ދެ ޕޫލަކަށް ބަހައިގެން ކުރިއަށްދާ މުބާރާތުގައި ކޮންމެ ޕޫލެއްގައި ހިމެނެނީ ފަސް ޓީމެވެ. މުބާރާތުގެ ސެމީއިން ޖާގަ ލިބޭނީ ކޮންމެ ގްރޫޕެއްގެ ވެސް އެއްވަނަ ޓީމާއި ދެވަނަ ޓީމަށެވެ. މުބާރާތުގައި ތިން ސެމީ ކުޅުމަށް ހަމަޖެހިފައިވެއެވެ. ފުރަތަމަ ސެމީގައި ކުޅޭނީ ޕޫލް އޭގެ އެއްވަނަ ޓީމާއި ޕޫލް ބީގެ ދެވަނަ ޓީމެވެ. މި ސެމީން މޮޅުވާ ޓީމަކަށްް ފައިނަލުން ޖާގަ ލިބޭނެއެވެ. ދެވަނަ ސެމީގައި ކުޅޭނީ ޕޫލް އޭގެ ދެވަނަ ޓީމާއި ޕޫލް ބީގެ އެއްވަނަ ޓީމެވެ. ފަހު ސެމީގައި ކުޅޭނީ ފުރަތަމަ ސެމީގައި ބަލިވި ޓީމާއި ދެވަނަ ސެމީގައި މޮޅުވި ޓީމެވެ.

މުބާރާތުގައި މިރޭ ޔޫތު ނިއު ޖެނަރޭޝަން ނިކުންނާނީ ހިންމަފުށި ވޭރިއަސް ސްޕޯޓްސް ކުލަބާ ދެކޮޅަށެވެ. ދެވަނަ މެޗުގައި ދިވެހި ސިފައިންގެ ކުލަބް ނިކުންނާނީ ކުލަބް ހާފްލިން ލިންކޭޖާ ދެކޮޅަށެވެ.