އިތުރު 3 ޤައުމަކުން މުޅިން އަލަށް މަންކީޕޮކްސްގެ ކޭސްތަކެއް ފެނިފައިވާ ކަމަށް ރިޕޯޓްކޮށްފިއެވެ.

މި ބަލި ފެނިފައިވާ ކަމަށް އެންމެ ފަހުން ރިޕޯޓް ކޮށްފައިވަނީ ޔުނައިޓެޑް އަރަބް އެމިރޭޓްސް (ޔޫއޭއީ) އާއި ޗެކް ރިޕަބްލިކް އާއި ސްލޮވީނިއާއެވެ. މިއާއެކު މަންކީޕޮކްސް ފެނުނު ޤައުމުތަކުގެ އަދަދު މިވަނީ 21 އަށް އަރައިފައެވެ.

ޔޫއޭއީ އިން ރިޕޯޓް ކޮށްފައިވާ ގޮތުގައި އެ ޤައުމުން މަންކީޕޮކްސް ފެނިފައިވަނީ ދާދި ފަހުން އެފްރިކާއަށް ދަތުރު ކުރި މީހެއްގެ ގައިން ކަމަށެވެ. އެ ޤައުމަކީ ގަލްފް ޤައުމުތަކުގެ ތެރެއިން އެންމެ ފުރަތަމަ މި ބަލި ފެނުނު ޤައުމެވެ. އެ ބަލީގެ އައުޓްބްރޭކަކަށް ޤައުމު ތައްޔާރަށް އޮތް ކަމަށް ވެސް ޔޫއޭއީން ވަނީ ބުނެފައެވެ.

މިހާތަނަށް އައިއިރު، މަންކީ ޕޮކްސްގެ ކޭސްތައް ފެނިފައިވާ ގައުމުތަކުގެ ތެރޭގައި ޔޫރަޕްގެ ގައުމުތައް ހިމެނެއެވެ. އަދި އެމެރިކާގެ އިތުރުން ކެނެޑާ އަދި އޮސްޓްރޭލިއާ ވެސް ހިމެނެއެވެ. އެގޮތުން މިހާތަނަށް 237 ކޭސް ފެނިފައިވާ ކަމަށް ޑަބްލިއުއެޗްއޯއިން ރިޕޯޓު ކުރެއެވެ.

މަންކީޕޮކްސް އާންމުކޮށް ފެނިފައިވަނީ އެކަހެރިކޮށް ހުރި މެދު އަދި ހުޅަނގު އެފްރިކާގެ ސަރަހައްދުތަކުންނެވެ. މަންކީ ޕޮކްސް އަކީ މަދުން ފެންނަ އަދި އޭގެ ނުރައްކާ ކުޑަ ވައިރަހަކުން ޖެހޭ ބައްޔެކެވެ. މަންކީޕޮކްސް ޖެހޭ މީހުން އާންމު ގޮތެއްގައި ހަފްތާއެއްގެ ތެރޭގައި ބަލިން ފަސޭހަވާ ކަމަށް އިނގިރޭސިވިލާތުގެ ނެޝަނަލް ހެލްތް ސަރވިސްއިން ވަނީ ބުނެފައެވެ. މީގެ އިތުރުން ވައިރަސް އެހާ ފަސޭހައިން މީހުންގެ ތެރޭގައި ނުފެތުރޭ ކަމަށާއި، އަދި އާންމުންގެ ތެރޭގައި ފެތުރުމުގެ ނުރައްކާ ކުޑަކަމަށް ވެސް ވަނީ ބުނެފައެވެ.

މި ބަލީގެ އަލާމާތްތަކުގެ ތެރޭގައި ހުން އައުމާއި ހަމުން ފިތް ނެގުން ހިމެނެއެވެ.

މަންކީޕޮކްސްއަށް ވަކި ވެކްސިނެއް އުފައްދާފައެއް ނުވެއެވެ. ނަމަވެސް ސްމޯލްޕޮކްސް ނުވަތަ ހިމަ ބިހި އެއީ މަންކީޕޮކްސްއާއި އެއްގޮތް ވައިރަހަކުންޖެހޭ ބައްޔަކަށް ވުމުން، ސްމޯކްޕޮކްސްއަށް އުފައްދާފައިވާ ވެކްސިން ޖެހުމުން 85 އިންސައްތަ ރައްކާތެރިކަން ލިބެއެވެ.