ކައުންސިލްތަކުގެ އޮނިގަނޑުގައި ހިމެނޭ މަގާމުތަކަށް މުވައްޒަފުން ހޯދުމަށް އިއުލާނުކުރަން، ހުއްދަ ހޯދާކަށް ނުޖެހޭނެ: ސީއެސްސީ
ކައުންސިލް އިދާރާތަކުގެ އިދާރީ އޮނިގަނޑު އެކުލަވާލާނެ އުސޫލެއް، ކޮމިޝަނާއި ލޯކަލް ގަވަރމަންޓް އޮތޯރިޓީ ގުޅިގެން އެކުލަވާލައި އާންމުކޮށްފައިވާނެ
ސިވިލް ސަރވިސް ކޮމިޝަންގެ ބައްދަލުވުމެއްގެ ތެރެއިން
ކައުންސިލްތަކުގެ އޮނިގަނޑުގައި ހިމެނޭ މަގާމުތަކަށް މުވައްޒަފުން ހޯދުމަށް އިއުލާނުކުރުމުގެ ކުރިން ސިވިލް ސަރވިސް ކޮމިޝަނުން އެއްވެސް ހުއްދައެއް ހޯދަން ނުޖެހޭނެކަން ކައުންސިލު އިދާރާތަކަށް ވާނީ އަންގާފައިކަމަށް އެކޮމިޝަނުން ބުނެފިއެވެ.
އެކޮމިޝަނުން މިހެން ބުނީ ސިޓީ، އަތޮޅު އަދި ރަށު ކައުންސިލު އިދާރާތަކުގެ އިދާރީ އޮނިގަނޑުތަކާ ގުޅޭގޮތުންނާއި، އެ އިދާރާތަކަށް ބޭނުންވާ މަގާމުތަކަށް މުވައްޒަފުން ނެގުމަށް ހުއްދަ ނުދޭކަމަށްބުނެ، މިކަމުގައި ކޮމިޝަނުން އަމަލުކުރަމުންދާ މިންގަނޑު އޮޅުންއަރާފަދަ ގޮތަކަށް މިފަހަކަށް އައިސް މައުލޫމާތު ފެތުރެމުންދާކަމަށް ކޮމިޝަނަށް ފާހަގަވާކަމަށް ބުނެ ނެރެފައިވާ ނޫސްބަޔާނުގައެވެ.
މިނޫސްބަޔާނުގައި ސީއެސްސީން ބުނީ، އިދާރީ އޮނިގަނޑުގައިވާ ހުސް މަގާމުތަކަށް މިނިސްޓްރީ އޮފް ފިނޭންސްގެ ހުއްދައާއެކު މުވައްޒަފުން ހޯދުމަކީ އެއިދާރާގެ ޒިންމާއެއްކަމަށެވެ. ކައުންސިލްތަކުގެ އިދާރީ އޮނިގަނޑުގެ ބޭރުން ވަކި ޕްރޮޖެކްޓަކަށް ނުވަތަ ކޮންޓްރެކްޓް އުސޫލުން މުވައްޒަފެއް ނެގުމަށް ކައުންސިލަކުން ބޭނުންވާނަމަ، ކަމާގުޅޭ މައުލޫމާތު ކޮމިޝަނަށް ފޮނުވުމުން އެމަގާމުތަކަށް ކަނޑައެޅިފައިވާ ގަވާއިދާއި އުސޫލުތަކުގެ ތެރެއިން ކޮމިޝަނުން ދަނީ ހުއްދަދެމުން ކަމަށެވެ. އަދި ކައުންސިލް އިދާރާތަކުގެ އިދާރީ އޮނިގަނޑު އެކުލަވާލާނެ އުސޫލެއް، ކޮމިޝަނާއި ލޯކަލް ގަވަރމަންޓް އޮތޯރިޓީ ގުޅިގެން އެކުލަވާލައި އާންމުކޮށްފައި ވާނެކަމަށެވެ.
ސީއެސްސީން ބުނީ އެއުސޫލުގެ ތެރެއިން ކައުންސިލުތަކުގެ އިދާރީ އޮނިގަނޑު އެކުލަވާލުމަކީ ކައުންސިލް އިދާރާތަކުގެ ޒިންމާއެއްކަމަށެވެ. އޮނިގަނޑު ފާސްނުވިނަމަވެސް، ކައުންސިލް އިދާރާތަކަށް ކޮންމެހެން ބޭނުންވާ ވަޒީފާތަކަށް މީހުން ހޯދުމަށް އެ ކައުންސިލު އިދާރާގެ ބަޖެޓުން ޚަރަދުކުރެވެން ހުރިނަމަ، ކަނޑައަޅާފައިވާ ގަވާއިދާ އުސޫލުތަކުގެ ތެރެއިން ކޮމިޝަނުން ދަނީ ހުއްދަދެމުންކަމަށްވެސް ސީއެސްސީން ބުނެއެވެ.
