ކުނި އުކާލަން ގެންނަ ބަދަލަށް އަހުލުވެރިވާން އުނދަގުލެއް ނުވާނެ: ވެމްކޯ
ކުނި އުކާލުމުގެ އައު އުސޫލަށް އަމަލު ކުރަން ފަށާނީ ޖޫން މަހުން ފެށިގެން
ވެމްކޯގެ ސީނިއަރ ޕަބްލިކް ރިލޭޝަންސް އޮފިސަރު އަހުމަދު އާޒިމް
އުކާލާ ކުނި ވަކިކުރަން އަންގައި ގެންނަ ބަދަލަށް އަހުލުވެރިވާން އުނދަގުލެއް ނުވާނެ ކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ބުނެފިއެވެ.
ވެމްކޯގެ ޚިދުމަތްތަކާ ގުޅޭ ގޮތުން ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން އެ ކުންފުނީގެ ސީނިއަރ ޕަބްލިކް ރިލޭޝަންސް އޮފިސަރު އަހުމަދު އާޒިމް ވިދާޅުވީ ތިމާވެއްޓާ ރައްޓެހި އަދި ދެމެހެއްޓެނިވި ގޮތެއްގައި ޚިދުމަތްތައް ފަރުމާ ކުރުމަކީ ކުންފުނީގެ މެންޑޭޓުގައި ހިމެނޭ ކަމަކަށްވާއިރު ޖޫން މަހުން ފެށިގެން ގެންނަ ބަދަލަކީ އެކަމަށް ވަރަށް މުހިންމު ބަދަލެއް ކަމަށެވެ. އަދި 2019 ވަނަ އަހަރުން ފެށިގެން ސާވޭތައް ހަދައި ރާއްޖޭގެ އެކި ސަރަހައްދުތަކުގައި އެންމެ ގިނައިން އުފެދޭ ކުނިތައް ބަލާފައިވާނެ ކަމަށާއި ކުނި ވަކިކުރަން ކެޓަގަރީތައް ކަނޑައަޅާފައިވަނީ އެ ދިރާސާތަކަށް ބިނާކޮށް ކަމަށް ވެސް އޭނާ ވިދާޅުވިއެވެ.
އާޒިމް ވިދާޅުވީ ކުނި އުކާލުމަށް ގެނައި ބަދަލާއެކު ރައްޔިތުންގެ ކަންބޮޑުވުންތައް ހުންނާނެ ކަމަށާއި ނަމަވެސް ނޭނގި ތިބެ ގިނަ ގެތަކުން މިހާރުވެސް ކުނި ނެރެނީ ވަކި ކުރުމަށްފަހު ކަމަށެވެ. އަދި ރައްޔިތުން މިބަދަލާއެކު މާބޮޑު އިންވެސްޓްމަންޓެއް ކުރަން ނުޖެހޭނެ ކަމަށް ވެސް އާޒިމް ވިދާޅުވިއެވެ.
ޖޫން މަހުން ފެށިގެން ވެމްކޯއިން ގެންނަ ބަދަލާއެކު މާލެ ސަރަހައްދުގެ ގޭބިސީތަކުން އުކާލަން ނެރޭ ކުނި 3 ކެޓަގަރީއަކަށް ބަހަން ޖެހޭނެއެވެ. އެއީ ކުނިވާ ޒާތުގެ ކުންޏާއި އަމިއްލައަށް ފަނާވާޒާތުގެ ކުނީގެ ކެޓަގަރީއަކާއި ޕްލާސްޓިކް ފުޅި އަދި އެހެނިހެން ކުންޏެވެ.
ވެމްކޯއިން ބުނީ ކުނިވާ ޒާތުގެ ކުންޏާއި އަމިއްލައަށް ފަނާވާ ޒާތުގެ ކުންޏަކީ ބަދިގޭގައި އުފެދޭ ކުނި ކަމަށެވެ. އަދި ޕްލާސްޓިކް ފުޅި ނޫން ޕްލާސްޓިކްގެ އެހެނިހެން ތަކެތި ހިމެނޭނީ އެހެނިހެން ކުނީގެ ކެޓަގަރީގައި ކަމަށެވެ.
އުކާލާ ކުނި ވަކިކުރަން ވެމްކޯއިން އަންގާފައިވަނީ އަންނަ ޖޫން މަހުގެ އެއްވަނަ ދުވަހުން ފެށިގެންނެވެ. އަމިއްލައަށް ކުނި އުކާލާ ފަރާތްތަކުންވެސް ކުނި ވަކިކުރުމަށް ވެމްކޯއިން ވަނީ އިލްތިމާސްކޮށްފައެވެ.
