މިސީޒަންގެ އިނގިރޭސި ޕްރިމިއަރ ލީގުގެ ފަހު މެޗުގައި އެސްޓަންވިލާ ކޮޅަށް ފަސް މިނެޓުގެ ތެރޭގައި ތިން ލަނޑު ޖަހައިގެން މޮޅުވެ, މެންޗެސްޓަރ ސިޓީން ލީގު ދިފާއުކޮށްފިއެވެ. ފަހު މެޗަށްދިޔައިރު ސިޓީގެ އިތުރުން ލިވަޕޫލަށްވެސް ލީގު ހޯދުމުގެ ފުރުޞަތު އޮތެވެ.

ސިޓީ ބަލިވެއްޖެ ނަމަ ލިވަޕޫލަށް ލީގު ހޯދުމުގެ ފުރުޞަތު ފަހިވެފައިވަނިކޮށް, ސިޓީ ވަނީ 76 ވަނަ މިނެޓާ ހަމައަށް ކޮޅަށް ދެ ގޯލް ވަދެ ޕްރެޝަރަށް ގޮސްފައެވެ. އެކަމަކު ފަސް މިނެޓުގެ ތެރޭގައި ތިން ލަނޑު ޖަހައިގެން އެސްޓަން ވިލާ ބަލިކޮށް, ސިޓީން ލީގު ދިފާއުކުރިއެވެ. ސިޓީން ޖެހި ތިން ލަނޑުގެ ތެރެއިން ފުރަތަމަ ލަނޑާއި ފަހު ލަނޑު ޖެހީ ބަދަލު ކުޅުންތެރިއެއްގެ ގޮތުގައި ނިކުތް ގުންޑޮގާންއެވެ. ދެވަނަ ލަނޑު ޖެހީ ރޮޑްރީއެވެ. މެޗުގައި ގުންޑޮގާން ކުޅެން ނިކުތީ 69 ވަނަ މިނެޓުގައި ބާނާޑީ ސިލްވާގެ ބަދަލުގައެވެ. އޭނާ ސިޓީގެ ފުރަތަމަ ލަނޑު ޖަހައިދިނީ 76 ވަނަ މިނެޓުގައެވެ. ލިވަޕޫލްވެސް މެޗު ކާމިޔާބުކުރީ ފަހަތުން އަރައެވެ. ވުލްވުސްއިން ފުރަތަމަ ލަނޑު ޖަހާ ކުރި ހޯދާފައިވަނިކޮށް ހާފް ނިމުމުގެ ކުރިން މާނޭ ނަތީޖާ ހަމަހަމަކޮށްދިނެވެ. ލިވަޕޫލުން ކުރި ހޯދީ 84 ވަނަ މިނެޓުގައި ސަލާހު ޖެހި ލަނޑުންނެވެ. ލިވަޕޫލުން ތިންވަނަ ލަނޑު ޖެހީ 89 ވަނަ މިނެޓުގައި ރޮބާޓްސަންއެވެ.

ސިޓީން ލީގު ދިފާއުކުރީ ޕޮއިންޓެއްގެ ފަރަޤަކުންނެވެ. އެއީ 93 ޕޮއިންޓާއެކުއެވެ. ލިވަޕޫލަށް ލިބުނީ 92 ޕޮއިންޓެވެ.