އިސްލާމް ދީނާ މެދު ނަފްރަތު އުފައްދަން އުޅުނު ކޮލެޖް ޕްރޮފެސަރަކު އިންޑިއާގައި ހައްޔަރުކޮށްފި

އިސްލާމް ދީނާމެދު ނަފްރަތު އުފައްދަން ޚިޔާލު ފާޅުކުރި އިންޑިއާގެ ކޮލެޖެއްގެ ޕްރޮފެސަރަކު ހައްޔަރުކޮށްފިއެވެ.

އެ މައްސަލައިގައި ހުކުރު ދުވަހު ހައްޔަރު ކޮށްފައިވަނީ އިންޑިއާގެ ވެރިރަށް ދިއްލީގެ ޔުނިިވަރސިޓީގެ ހިންދޫ ކޮލެޖުގެ ޕްރޮފެސަރެއްގެ ގޮތުގައި މަސައްކަތް ކުރަމުން އަންނަ ރަތަން ލާލް ނަމަކަށްކިޔާ މީހެކެވެ. އޭނާ ހައްޔަރު ކުރީ އެ ގައުމުގެ ވަރަނަސީގައި ހުރި މިސްކިތަކާމެދު ކޮށްފައިވާ ޕޯސްޓަކާ ގުޅިގެން ކަމަށް އިންޑިއާގެ ނޫސްތަކުގައި ވަނީ ރިޕޯޓްކޮށްފައެވެ.

އޭނާ ކުރި ޕޯސްޓުގައި ބުނީ އެ މިސްކިތުގެ ތެރެއިން ހިންދޫ ދީނުގެ މީހުން އަޅުކަން ކުރާ ބުދެއް ފެނުނުކަމަށް ބުނެއެވެ. އެއީ ތަފާތު ދީންތަކުގެ މެދުގައި ހަމަނުޖެހުން އުފައްދަން ހިންގި އަމަލެއް ކަމަށް ތުހުމަތުކޮށް، ހޮނިހިރު ދުވަހު އޭނާ ކޯޓަށް ހާޒިރުކުރަން ވަނީ ތާވަލު ކޮށްފައެވެ.

ރަތަން ލާލް ހައްޔަރު ކުރުމާ ގުޅިގެން އެ ގައުމުގެ ހިންދޫ ދީނުގެ މީހުން ދަނީ ނުރުހުން ފާޅުކުރަމުންނެވެ. އަދި އޭނާ ދޫކޮށްލަން ގޮވާލައި ބައެއް ސަރަހައްދުތަކުގައި ދަނީ މުޒާހަރާތައް ވެސް ކުރަމުންނެވެ.