12 ކިލޯގެ މަސްތުވާތަކެތީގެ މައްސަލައިގައި ދެ މީހެއްގެ މައްޗަށް ދައުވާކުރަނީ، އެކަކު ޑީޕޯޓް
20 މެއި 2022 | ހުކުރު 02:10ސްމޭޝް ކޭއޭ ކްރިޝްޓަންގެ މައްޗަށް ކެނަބިސް ޓްރެފިކް ކުރުމާއި މަސްތުވާތަކެތި ބޭނުންކުރުމުގެ ދައުވާ ވަނީ ކޮށްފައި
12 ކިލޯ މަސްތުވާތަކެތީގައި ހިމެނޭ މީހުން
ފުލުހުން އަތުލައިގަތް 12 ކިލޯގެ މަސްތުވާތަކެތީގެ މައްސަލައިގައި ހިމެނޭ 2 މީހަކަށް ދައުވާކުރަން ނިންމައި، އެކަކު ޑީޕޯޓްކުރަން އަދި އެކެއްގެ މައްސަލަ އިތުރަށް ތަހުޤީޤުކުރުމަށް ޕްރޮސިކިއުޓަރ ޖެނެރަލްގެ އޮފީހުން ފުލުހުންނަށް ލަފާދީފިއެވެ.
ޕީޖީން އާއްމު ކޮށްފައިވާ ބަޔާނެއްގައި ބުނެފައިވަނީ، ބަންގްލަދޭޝްގެ ރައްޔިތެއްކަމަށްވާ ކަވްސަރު އަލަމްއާއި ނ.ވެލިދޫ، މަރިޔާޒް، މުހައްމަދު ޢަބްދުއްލަޠީފާއި، އިންޑިޔާ ރައްޔިތެއްކަމަށްވާ ސުމޭޝް ކޭއޭ ކްރިޝްނަން ކުޓީއާއި ގ. ޕާކަރހައުސް ހުސައިން ސަބާހް 14 މާރިޗު 2022 ވަނަ ދުވަހު ދިވެހިރާއްޖެއަށް ބަރުދަނުގައި 12 ކިލޯ ހުންނަ މަސްތުވާތަކެތި އެތެރެކޮށް އެތަކެތި ޓްރެފިކް ކުރާކަމަށާއި، މަސްތުވާތަކެތި ބޭނުންކުރާކަމަށް ތުހުމަތުކުރެވުނު މައްސަލައިިގައި ބައެއް ފިޔަވަޅުތައް އެޅުމަށް ނިންމާފައިވާ ކަމަށެވެ.
ޕީޖީ އޮފީހުން ބުނީ، އެމައްސަލައިގައި ހައްޔަރުކޮށްފައިވާ ސްމޭޝް ކޭއޭ ކްރިޝްޓަންގެ މައްޗަށް ކެނަބިސް ޓްރެފިކް ކުރުމާއި މަސްތުވާތަކެތި ބޭނުންކުރުމުގެ ދައުވާ ކޮށްފައިވާ ކަމަށެވެ. އަދި މުހައްމަދު އަބްދުއްލަތީފުގެ މައްޗަށް ޑައިމޯފިން ބޭނުން ކުރުމުގެ ކުށުގެ ދައުވާ ކޮށްފައިވާ ކަމަށެވެ.
އޭގެ އިތުރުން ބަންގްލަދޭޝްގެ ރައްޔިތެއްކަމަށްވާ ކަވްސަރު އަލަމްގެ މައްޗަށް ޖިނާއީ ދައުވާއެއްކޮށް ކުށް ސާބިތުކުރެވޭ މިންވަރަށް ހެއްކާއި ޤަރީނާ ލިބިފައިވާކަމަށް ނުފެންނާތީ، އޭނާގެ ބައި އަނބުރާ ފޮނުވާލައި، އޭނާ ދިވެހިރާއްޖެ ނާދެވޭ ގޮތަށް ޑީޕޯޓްކޮށްލުމަށް މޯލްޑިވްސް އިމިގްރޭޝަންގައި ދެންނެވުމަށް ދިވެހި ފުލުހުންގެ ޚިދުމަތަށް ލަފާދީފައިވާ ކަމަށްވެސް ޕީޖީ އޮފީހުން ވަނީ ބުނެފައެވެ.
މިމީހުންގެ ތެރެއިން ސްމޭޝް ކޭއޭ ކްރިޝްޓަން ކުޓީގެ ބަންދާމެދު ގޮތެއް ނިންމަން ކްރިމިނަލް ކޯޓަށް ހާޒިރުކުރުމުން ކޯޓުންވަނީ އޭނާގެ ބަންދަށް 15 ދުވަސް އިތުރުކޮށްދީފައެވެ. އަދި ދެން ތިބި ދެމީހުން ކޯޓަށް ހާޒިރުކުރުމެއް ނެތި ފުލުހުންގެ ބަންދުން ވަނީ ދޫކޮށްލާފައެވެ.
އަދި މިމައްސަލައިގަ ހިމެނޭ ގ. ޕާކަރުހައުސް ހުސައިން ސަބާހުގެ ބައި އިތުރަށް ތަހުޤީޤުކުރުމަށް ދިވެހި ފުލުހުންގެ ޚިދުމަތަށް ލަފާދީފައިވާ ކަމަށްވެސް ޕްރޮސެކިއުޓަރ ޖެނެރަލްގެ އޮފީހުން ވަނީ ބުނެފައެވެ.
ކަނޑުމަގުން ރާއްޖެއަށް މަސްތުވާތަކެތި އެތެރެކުރަން އުޅޭކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން، ކައުންޓާ ނާކޮޓިކްސް އިންޓެލިޖެންސް ޑިޕާޓްމަންޓާއި، ޑްރަގް އެންފޯސްމަންޓް ޑިޕާޓްމެންޓް (ޑީއީޑީ) އަދި މެރިން ޕޮލިސް ގުޅިގެން މިދިޔަ މާޗުމަހުގެ 14 ވަނަ ދުވަހު ހިންގި އޮޕަރޭޝަންގައި ވަނީ 12.6 ކިލޯގެ މަސްތުވާތަކެތި އަތުލައިގަނެފައެވެ.
މިމައްސަލާގައި މީގެ ކުރިންވެސް ހައްޔަރަށް ނުވާގޮތަށް ހަތަރު ގަޑިއިރު ފުލުހުންގެ ބެލުމުގެ ދަށަށް ސަބާހް ގެންގޮސްފައިވެއެވެ.
