އެކްސްޕްލޯ އިން މޯލްޑިވްސް ޓްރެވަލް އެޖެންސީގެ އޮޕަރޭޓިންގް ލައިސަންސް ޓޫރިޒަމް މިނިސްޓްރީން ސަސްޕެންޑްކޮށްފިއެވެ.
މިކަން ހާމަކޮށް ބުދަ ދުވަހު އެ މިނިސްޓްރީން ވަނީ ޓުވީޓެއް ވެސް ކޮށްފައެވެ. އެ ޓުވީޓުގައި ބުނެފައިވަނީ އެ އެޖެންސީން ޓްރެވެލް އެޖެންސީ ޤަވާއިދުތަކާއި ޚިލާފުވެފައިވާ ކަމަށެވެ.
ރާއްޖެއެމްވީއަށް މައުލޫމާތު ދެއްވަމުން ޓޫރިޒަމް މިނިސްޓްރީގެ އެގްޒެކްޓިވް ޑިރެކްޓަރ އަބްދުﷲ ޝަރީފް ވިދާޅުވީ އެ އެޖެންސީ ސަސްޕެންޑްކޮށްފައިވަނީ ލިބުނު ޝަކުވާތަކާއި ގުޅިގެން ޖަވާބުދާރީވާން ފުރުސަތު ދިނުމަށްފަހު އެއްވެސް ވަރަކަށް ޖަވާބު ނުލިބުމުން ކަމަށެވެ. އަދި ފޯނާއި އީމެއިލް މެދުވެރިކޮށް އެ އެޖެންސީއަށް މިއަހަރުގެ ޖެނުއަރީ މަހުން ފެށިގެން ގުޅާ ޖަވާބެއް ހޯދަން މަސައްކަތް ކުރި ކަމަށާއި އެހެންނަމަވެސް މިއަދާ ހަމައަށް އައިރުވެސް ޖަވާބެއް ލިބިފައިނުވާ ކަމަށެވެ.
އަބްދުﷲ ވިދާޅުވީ ހަތަރު ވަރަކަށް ޝަކުވާ ލިބިފައިވާ ކަމަށެވެ. މިގޮތުން ބައެއް ކްލައިންޓުން އަތުން ބުކިންގ ފީ ނެގުމަށްފަހު އެމީހުން ރިސޯޓުތަކަށް ނުފޮނުވުމާއި ފަތުރުވެރިން އަމިއްލައަށް އައިސް އެކޮމަންޑޭޝަން ހަމަޖައްސަން ޖެހުމުގެ ޝަކުވާތައް ވެސް ލިބިފައިވާ ކަމަށެވެ.
އަބްދުﷲ ވިދާޅުވީ އެގޮތަށް ދިމާވި ހުރިހާ ކްލައިންޓުންގެ މައްސަލަތައް މިހާރު ފުލުހަށް ހުށަހަޅާފައިވާ ކަމަށެވެ.
