ރާއްޖެ ޕްލަސްގެ ލައިސަންސް ބާތިލްކޮށްފައިވަނީ ގާނޫނާ ހިލާފަށްކަމަށް ބުނެ، އެ ނިންމުން މުރާޖާކުރަން ހުށަހަޅައިފި
30 އޮކްޓޯބަރު 2017 | ހޯމަ 20:09ނިންމުން އަލުން މުރާޖާކުރަން ހުށަހެޅީ ބުދަ ދުވަހު
ރާއްޖެ ޕްލަސް ލޯންޗްކުރުމުގެ ތެރެއިން
ރާއްޖެ ޕްލަސްގެ ނަމުގައި ހިންގަމުން އައި ޗެނެލްގެ ލައިސަންސް ބާތިލް ކޮށްފައިވަނީ، ގާނޫނާ އަމަލު ކުރަމުންދާ އުސޫލްތަކާ ހިލާފަށް ކަމަށް ސާބިތު ކުރެވޭނެ ހެކި ހުރުމާއެކު އެ ނިންމުން އަލުން މުރާޖާ ކޮށްދިނުމަށް އެދި ހުށަހަޅައިފިއެވެ.
އާރް ޕްރޮޑަކްޝަނުން ނެރުނު ބަޔާނެއްގައި ބުނީ އާރް ޕްރޮޑަކްޝަންގެ ބްރޯޑްކާސްޓިން ލައިސަންސް ބާތިލްކުރީ ކަނޑައެޅިފައިވާ މުއްދަތު ތެރޭގައި ހިދުމަތް ފަށާފައިނުވާތީކަމަށް ބްރޮޑްކާސްޓިން ކޮމިޝަނުން ހާމަކުރިނަމަވެސް އެއީ ކަނޑައެޅިގެން ހަގީގަތާ ހިލާފު ވާހަކައެއްކަމަށެވެ. އާރް ޕްރޮޑަކްޝަނުން ބުނީ އެ ކުންފުނީގެ މިލްކުވެރިކަން ބަދަލު ކުރި ލައިސަންސަކީ، ކުރިން ޖޯޓެކް ޕްރައިވެޓް ލިމިޓެޑަށް ދޫކުރައްވާފައިވާ ލައިސަންސެއް ކަމަށާއި، އެ ލައިސަންސްގެ ދަށުން ޖޯޓެކުން "ވައި ޓީވީ" ނަމުގައި ވަނީ ޗެނެލް އެއް ހިންގާފައިކަމަށެވެ. އެގޮތުން އާރް ޕްރޮޑަކްޝަން އަށް ވައި ޓީވީގެ ލައިސަންސްގެ ހައްގުތައް ބަދަލުކުރުމުގެ މާކުރިން، ވައި ޓީވީގެ ނަމުގައި އެ ލައިސަންސްގެ ދަށުން ދިޔައީ ބްރޯޑްކާސްޓް ކުރަމުންކަން ސާބިތު ކުރެވޭކަމަށެވެ.
މީގެއިތުރުން ބަޔާނުގައި ބުނެފައިވަނީ ވައި ޓީވީގެ ނަމުގައި ދިގު މުއްދަތަކަށް ހިދުމަތް ދީފައިވާ ލައިސަންސްއެއް، މުއްދަތުގައި ހިދުމަތް ފަށާފައި ނުވާކަމަށް ކޮމިޝަނުން ވިދާޅުވުމަކީ އެއްވެސް ހަމަޔަކުން ގަބޫލުކުރެވޭނެ ކަމެއް ނޫންކަމަށާއި، "ރާއްޖެ ޕްލަސް"ގެ ނަމުގައި ދައްކަމުން ދިޔައީ އެ ލައިސަންސްގެ ދަށުން ދެމުން ދިޔަ ހިދުމަތެއްގެ ގޮތުގައިކަން ރާއްޖޭގެ ބްރޯޑްކާސްޓިންގް ދާއިރާ މޮނިޓަރ ކޮށް ބެލެހެއްޓެވުމުގެ ޒިންމާ ހަވާލު ކުރެވިފައިވާ މުއައްސަސާގެ ހައިސިއްޔަތުން ބްރޯޑްކާސްޓިންގް ކޮމިޝަނަށް، ރަނގަޅަށް އެނގިފައި އޮންނަންޖެހޭނެ ކަމެއް ކަމަށްވެސް އެ ކުންފުނިން ދެކޭކަމަށެވެ.
އާރް ޕްރޮޑަކްޝަންގެ ލައިސަންސްގެ ހިދުމަތް ދީފައި ނުވާކަމަށް ނިންމެވި ކަމަށް ވިދާޅުވެ ކޮމިޝަނުން ފާހަގަ ކޮށްފައިވާ ހަމައެކަނި ނުކުތާއަކީ، އައިޕީ ޓީވީ މެދުވެރިކޮށް ހިދުމަތް ދިނުމަކީ، ބްރޯޑްކާސްޓް ކުރުމަށް އާރް ޕްރޮޑަކްޝަން އަށް ދޫކޮށްފައިވާ ލައިސަންސްގައި ބަޔާން ކޮށްފައިވާ "ސެޓެލައިޓް" މެދުވެރިކޮށް ހިދުމަތް ފެށުން ކަމަށް ގަބޫލު ނުކުރާތީ ކަމަށް ވިދާޅުވި ނަމަވެސް ބްރޯޑްކާސްޓް ކުރުމުގެ ގާނޫނުގެ (30) ވަނަ މާއްދާގައި އަދި ބްރޯޑްކާސްޓް ކުރުމުގެ ގަވައިދުގެ (19) ވަނަ މާއްދާގައި ބުނެފައިވަނީ، ލައިސަންސް ލިބޭ ފަރާތުން 12 މަސް ދުވަހުގެ ތެރޭގައި ބްރޯޑްކާސްޓް ކުރަން ފަށަން ވާނެ ކަމަށެވެ. އަދި އެ ހިދުމަތެއް ފަށާފައި ނުވާނަމަ، ލައިސަންސް ބާތިލްވާނެ ކަމަށެވެ. އެހެންނަމަވެސް ގާނޫނުގައިވެސް އަދި ގަވައިދުގައިވެސް ހިދުމަތް ފަށަން ޖެހޭނީ ވަކި ވަސީލަތަކުން ކަން ކަނޑައަޅާ ބަޔާން ކޮށްފައި ނުވާކަމަށް އެ ކުންފުނިން ބުނެއެވެ.
އާރް ޕްރޮޑަކްޝަންގެ ޗެނަލުން ބްރޯޑްކާސްޓް ކުރުމުގެ ހިދުމަތް މުއްދަތުގެ ތެރޭގައި ފަށާފައިވާކަން ދެފަރާތުން ބަދަލު ކުރެވިފައިވާ ލިޔެކިޔުން ތަކުން އެނގެން އޮތްއިރު، އަދި ސެޓެލައިޓް ނޫން ވަސީލަތަކުން ބްރޯޑްކާސްޓް ކުރުމަކީ، ލައިސަންސްގެ ޝަރުތަކަށް ކަމަށް ބެއްލެވި ނަމަވެސް، ލައިސަންސްގެ ޝަރުތަކާ ހިލާފް ވުމަކީ ގާނޫނީ އެއްވެސް ހަމަޔަކުން ލައިސަންސް ބާތިލް ކުރެވޭނެ ކަމެއް ނޫން ކަމަށް އާރް ޕްރޮޑަކްޝަނުން ބުނެއެވެ. އެގޮތުން ޝަރުތަކާ ހިލާފް ވުމަކީ ލައިސަންސް ބާތިލް ކުރެވޭނެ ކުށެއް ކަމަށް ކަނޑައަޅާ ގާނޫނެއްގައި އަދި ގަވައިދެއްގައިވެސް ބަޔާން ކޮށްފައެއް ނުވާ ކަމަށާއި، ބްރޯޑްކާސްޓިންގް ގާނޫނުގައި ލައިސަންސްގެ ޝަރުތަކާ ޚިލާފް ވެއްޖެނަމަ އަޅަން ޖެހޭ ފިޔަވަޅުތައް ވަރަށް ސާފުކޮށް ވަނީ ބަޔާން ކޮށްފައިކަމަށެވެ. އެގޮތުން އެ ގާނޫނުގައި އަދި އެ ގާނޫނުގެ ދަށުން ހަދާފައިވާ ގަވައިދުގައިވެސް ލައިސަންސްގެ ޝަރުތަކާ ޚިލާފް ވުމުން ލައިސަންސް ބާތިލް ވުން ކަނޑައަޅާފައެއް ނުވާކަމަށެވެ.
މީގެ އިތުރުން، ލައިސަންސްގެ ޝަރުތުގެ ތެރޭގައި ސެޓަލައިޓް ޖަހާފައި އިނަސް، އެއީ އިދާރީ ގޮތުން ބޭނުން ވަގުތެއްގައި ބަދަލު ކުރެވޭނެ ކަމެއް ކަމަށް ކޮމިޝަންގެ އިދާރީ މުވައްޒަފުން ވިދާޅުވެފައެވެ. މީގެ ހެއްކެއްގެ ގޮތުން، ސެޓްލައިޓުން ހިދުމަތް ދިނުމަށް ޝަރުތުކޮށްފައިވާ ބައެއް އެހެން ޗެނަލްތަކުން މޮބައިލް އެޕްލިކޭޝަނެއް މެދުވެރިކޮށް ބްރޯޑްކާސްޓްކުރުމުގެ ހުއްދަ ބްރޯޑްކާސްޓިން ކޮމިޝަނުން މިފަހަރު ވެސް އޮތީ ދީފައިކަމަށްވެސް އެ ކުންފުނިން ބުނެއެވެ. އަދި އެ ޗެނަލްތަކުގެ ބްރޯޑްކާސްޓްކުރާ ވަސީލަތް ބަދަލުކުރުމަށް ރަސްމީކޮށް މުއާމަލާތްކޮށްފައި ހުރިކަން އެ ކުންފުންޏަށް ކަށަވަރުވާކަމަށް ބަޔާނުގައި ވަނީ ބުނެފައެވެ. އެހެންނަމަވެސް ރާއްޖެ ޕްލަސްގެ ނަމުގައި ހިނގަމުން އައި ޗެނެލްގެ ލައިސަންސް ބާތިލް ކުރެއްވީ، ހަމަ މިމޭރުމުން މިކަން ބަދަލު ކުރުމަށް ކޮމިޝަނުގެ އިދާރީ މުވައްޒަފުންނާ މަޝްވަރާކޮށް އެވާހަކަ ސިޓީއަކުން ކޮމިޝަނުގައި ދަންނަވާފައިވަނިކޮށް ކުއްލިއަކަށެވެ. އެގޮތުން އެއް ބާވަތެއްގެ ކަންކަމުގައި އެކި ފަރާތްތަކަށް ތަފާތުކޮށް ފިޔަވަޅު އެޅުއްވުމަކީ، ގާނޫނު އަސާސީގެ (20) ވަނަ މާއްދާގައި ބުނާ "ހަމަހަމަކަން"، މި ހައްގު އާރް ޕްރޮޑަކްޝަން އަށް ގެއްލިގެން ދިޔަ ކަމެއް ކަމުގައި އާރް ޕްރޮޑަކްޝަނުން ވަނީ ބުނެފައެވެ.
އާރް ޕްރޮޑަކްޝަންއަށް ދޫކޮށްފައިވާ ބްރޯޑްކާސްޓިން ލައިސަންސް ކެންސަލްވި ކަމަށް ކަނޑައެޅުމުގައި ގާނޫނީ އެތައް މައްސަލަތަކެއް ހުރިއިރު، ކޮމިޝަންގެ އެ ނިންމުމުގެ ސަބަބުން އެ ކުންފުންޏަށް މާލީ ގޮތުން ވެސް ބޮޑެތި ގެއްލުންތަކެއް ވަނީ ކުރިމަތިވެފައި ކަމަށާއި، އެގޮތުން މޯލްޑިވްސް ބްރޯޑްކާސްޓިން ކޮމިޝަންގެ އެ ނިންމުން އަލުން މުރާޖައާ ކޮށްދިނުމަށް، އާރް ޕްރޮޑަކްޝަންގެ ފަރާތުން ވަނީ ބުދަ ދުވަހު އެ ކޮމިޝަނަށް ހުށަހަޅާފައެވެ.
