މެއި މަހުގެ 18 ވަނަދުވަހަކީ މެރިޓައިމް ސިނާއަތުގައި މަސައްކަތްކުރާ އަންހެނުންނަށް ޚާއްސަ ދުވަހެއްގެ ގޮތުގައި ކަނޑައަޅައިފި
މި ސިނާއަތުގައި އަންހެނުން ކުރަމުންދާ މަސައްކަތުގެ އަގުވަޒަންކުރުމަށް ޓްރާންސްޕޯޓް މިނިސްޓްރީން އެންމެހާ ފަރާތްތަކަށް ވަނީ ގޮވާލާފައި
ޓްރާންސް މޯލްޑިވިއަންގެ ސީޕްލޭންގައި މަސައްކަތްކުރާ ޒުވާން އަންހެންކުއްޖެއް
މެއި މަހުގެ 18 ވަނަދުވަހަކީ މެރިޓައިމް ސިނާއަތުގައި މަސައްކަތްކުރާ އަންހެނުންނަށް ޚާއްސަ ދުވަހެއްގެ ގޮތުގައި ކަނޑައަޅައިފިއެވެ.
އައި.އެމް.އޯގެ 31 ވަނަ ޖަލްސާއިން ފާސްކުރެވުނު "2019 ވަނަ އަހަރަށް ކަނޑައަޅާފައިވާ ވޯލްޑް މެރިޓައިމް ތީމްގެ ލެގަސީ ކުރިއަރުވައި، މެރިޓައިމް ދާއިރާއިން އަންހެނުންނަށް ހުރަހެއްނެތް މަސައްކަތުގެ މާހައުލެއް ހޯދައިދިނުން" ގަރާރާ ގުޅިގެން އައި.އެމް.އޯގެ 32 ވަނަޖަލްސާގައި ވަނީ މެރިޓައިމް ދާއިރާގައި މަސައްކަތް ކުރާ އަންހެނުންގެ އަގު ވަޒަންކުރުމުގެ ގޮތުން، ކޮންމެ އަހަރެއްގެ މެއި މަހުގެ 18 ވަނަދުވަހަކީ "މެރިޓައިމް ދާއިރާއިން ބައިނަލްއަގުވާމީ ގޮތުން ފާހަގަކުރާ އަންހެނުންގެ ދުވަހެއް"ގެ ގޮތުގައި ކަނޑައަޅާފައެވެ. މެރިޓައިމްދާއިރާގައި އަންހެނުން ބައިވެރިކުރުމާއެކު، މިންތީގެ ހަމަހަމަކަން ގާއިމްކުރުމަށްވެސް އައި.އެމް.އޯއިން ދަނީ މަސައްކަތް ކުރަމުންނެވެ.
މެރިޓައިމް ދާއިރާއިން އަންހެނުންނާގުޅޭ ދުވަސް ބައިނަލްއަގުވާމީގޮތުން ފާހަގަކުރުން، 18 މޭ 2022 ވަނަ ދުވަހު އިފްތިތާހުކުރާއިރު، މި ސިނާއަތުގައި އަންހެނުން ކުރަމުންދާ މަސައްކަތުގެ އަގުވަޒަންކުރުމަށް ޓްރާންސްޕޯޓް މިނިސްޓްރީން އެންމެހާ ފަރާތްތަކަށް ވަނީ ގޮވާލާފައެވެ.
އަދި މެރިޓައިމްދާއިރާއަށް އަންހެނުން ރެކްރޫޓްކުރުމާއި، ދާއިރާގައި މަސައްކަތުގައި ދެމިތިބުމަށް ހިތްވަރު ދިނުމާއި، ދެމެހެއްޓެނިވި ގޮތެއްގައި ވަޒީފާ އަދާކުރުމާއި، އަދި މެރިޓައިމް ދާއިރާގައި މިހާރު އޮތް ޖެންޑަރ އިމްބެލެންސް ހައްލުކުރުމަށާއި އަންހެނުންގެ ބައިވެރިވުން މި ދާއިރާގައި އިތުރުކުރުމަށް ސަރުކާރުން މަސައްކަތް ކުރަމުންދާއިރު، ސަރުކާރުން އެކުލަވާލާ މިދާއިރާއާ ގުޅޭކަންކަމުގައި އަންހެނުންނަށް އިސްކަންދިނުމަށް މަސައްކަތް ކުރަމުންދާކަމަށް ވެސް މިނިސްޓްރީން ބުނެއެވެ.
ޓްރާންސްޕޯޓް މިނިސްޓްރީން ބުނީ އެ މިނިސްޓްރީގެ އަމާޒަކީ މެރިޓައިމް ސިނާއަތުގައި ޖެންޑަރ އިމްބެލެންސް ނައްތާލައި މެރިޓައިމް ސިނާއަތަކީ އެންމެންނަށް ހަމަހަމަފުރުސަތު ލިބިގެންދާނެ ދާއިރާއަކަށް ހެދުން ކަމަށެވެ. މެރިޓައިމް ކޮމިއުނިޓީއާއި، ބޯޓުފަހަރުގައި އަންހެނުން މިހާރަށްވުރެ ހާމަކަން ބޮޑުގޮތެއްގައި މަސައްކަތް ކުރުމުގެ މުހިންމުކަމުގެ މައްޗަށް އަލިއަޅުވާލައްވައި، އަދި ކަންކަން ނިންމާ ފެންވަރުގައި އަންހެނުން ފުޅާ ދާއިރާއެއްގައި ތަމްސީލުކުރުމާ ގުޅޭގޮތުން "ޓްރެއިނިންގ-ވިސިބިލިޓީ ރިކޮގްނިޝަން: ސަޕޯޓިންގ އަ ބެރިއަރ ފްރީ ވޯކިންގ އެންވަޔަރަންމަންޓް" ޝިއާރުގެ ދަށުން ވަރޗުއަލް ސިމްޕޯސިއަމެއް ބޭއްވުމަށް ވަނީ ހަމަޖެހިފައެވެ. އަދި މިފުރުސަތުގައި އަންހެނުންނަށް މިދާއިރާގައި ހުރި ހުރަސްތައް ގިރާކޮށް، މެރިޓައިމް ކޮމިއުނިޓީގައި އެންމެންގެ ބައިވެރިވުން ހިމެނޭގޮތަށް މަސައްކަތް ކުރުމުގެ މާހައުލެއް ގާއިމުކޮށްދީ، އަންހެނުންނަށް ފަހި ފުރުސަތުތަކެއް މި ދާއިރާގައި ހޯދައިދިނުމަށް މި ސިނާއަތުގެ ހުރިހާ ބައިވެރިންނަށް މިނިސްޓްރީން ވަނީ ގޮވާލާފައެވެ.
