ސްރީލަންކާގެ ރައީސް ގޮތަބަޔާ ރާޖަޕަކްސަގެ ގާބިލުކަން ނެތްކަމަށް ބުނެ އިދިކޮޅުން ހުށަހެޅި މައްސަލަ މަޖިލީހުން ބޭރުކޮށްލައިފިއެވެ.
އިދިކޮޅުން ހުށަހެޅި ހުށަހެޅުމަށް ވޯޓަށް އަހާފައިވާއިރު، ރައީސްގެ ގާބިލުކަން ނެތްކަމަށް ބުނެ ވޯޓު ދީފައިވަނީ 68 މެމްބަރުންނެވެ. 119 މެމްބަރުން ވަނީ މި ހުށަހެޅުމާ ދެކޮޅަށް ވޯޓު ދީފައެވެ. ވެރިކަން ކުރާ ޕާޓީން ވަނީ މި ވޯޓު ކާމިޔާބުކޮށްފައެވެ.
އިދިކޮޅުން މި ހުށަހެޅުން ހުށަހަޅާފައިވަނީ، އެގައުމުގެ އިގުތިސާދީ ހާލަތު މިހާރު އޮތް ގޮތަށް ރިއާޔަތްކޮށް ރައީސާ ދެކޮޅަށް އެގައުމުގައި އަޑުއުފުލަމުން ދިއުމާގުޅިގެންނެވެ.
މިއީ 1948 ވަނަ އަހަރު އިނގިރޭސިންގެ އަތްދަށުން އެގައުމުގެ ސަލާމަތްވެ މިނިވަންކަން ލިބުނު ފަހުން އެގައުމުގެ އިގްތިސާދީ ހާލަތު މިހާ ބޮޑަށް ގޯސްވެގެން ދިޔަ ފުރަތަމަ ފަހަރެވެ. ނަތީޖާއެއްގެ ގޮތުން ތެލާއި، ކާނާއާއި ބޭސް ލިބުމަށްވެސް އެގައުމަށް މިހާރު ވަނީ ދަތިވެފައެވެ.
އިދިކޮޅުން މަޖިލީހަށް ހުށަހަޅާފައިވާ މި ހުށަހެޅުމުގައި ވަނީ އެގައުމަށް ދިމާވެފައިވާ އިގުތިސާދީ ކާރިސާގެ ޒިންމާ ނަގަންޖެހޭ ފަރާތަކީ ރައީސް ގޮތަބަޔާކަމަށް ބުނެފައެވެ. މިގޮތުން ޓެކްސް ނެގުން ހުއްޓާލުމާއި، ދަނޑުވެރިކަމުގައި ކެމިކަލް ބޭނުންކުރުން މަނާކުރުން ފާހަގަކޮށްފައިވެއެވެ. އަދި ކޮވިޑް-19ގެ ހާލަތުވެސް މެނޭޖްކޮށްފައިވަނީ އެންމެ ރަނގަޅަށް ނޫންކަމަށް ބުނެފައިވެއެވެ.
ލަންކާގެ ރައީސާ ދެކޮޅަށް އެގައުމުގައި މުޒާހަރާ ކުރާތާ މިހާރު ވަނީ މަހަކަށްވުރެ ގިނަ ދުވަސް ވެފައެވެ. އެގައުމުގެ ރައްޔިތުން ބޭނުންވަނީ މުޅިން އައު ސަރުކާރެކެވެ.
