ދިވެހި ފުލުހުން މިހާރަށްވުރެ ޤާބިލްވެ، ތަހުޒީބުވާންވެއްޖެ ކަމަށް އެމްޑީޕީގެ ނައިބު ރައީސް މުޙައްމަދު ޝިފާޒް ވިދާޅުވެއްޖެއެވެ.

ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަޙުމަދު މަޚްލޫފް ޖަލުން މިނިވަންވުމުގެ އުފާ ފާޅުކުރުމަށް ހުކުރު ދުވަހުގެރޭ އެމްޑީޕީގެ ހަރުގޭގައި ކުރިއަށްގެންދިޔަ ހަރަކާތުގައި ވާހަކަދައްކަވަމުން، ޝިފާޒް ވިދާޅުވީ، ފުލުހުންނަށް ރައްޔިތުންގެ އިތުބާރު ލިބޭނެހެން، ރާއްޖޭގައި ހެދިފައިހުރި ޤާނޫނުތަކާއި ޤަވާއިދުތައް ބޭނުންކޮށްގެން ކަމެއް ކުރާތަން ނުފެންނަ ކަމަށެވެ.

ހައްޔަރު ކުރަންވީމަ މިފެންނަނީ އިންޓެލިޖެންސް ރިޕޯޓެއް. އެ ފެންނަ ރައްޔިތަކު ނޫޅޭ. އޭގަ އޮތް އެއްޗެއްވެސް އެނގޭ ރައްޔިތަކު ނޫޅޭ. ހައްޔަރުގަ ބަހައްޓަން ވީމަ ހެކި ފޮރުވަފާނެތީވެ. ނުފޫޒު ފޯރުވަފާނެތީވެ. މިޔަށްވުރެ ތަހުޒީބުވާން ވެއްޖެ

ޝިފާޒް ވިދާޅުވީ ޜާއްޖޭގައި ޤާނޫނުތަކާއި އުސޫލުތައް އެބަހުރި ކަމަށާ، ޑިމޮކްރެޓިކް ނިޒާމް އަށަގެންނެވުމަށް ސިޔާސީ ލީޑަރުން ކުރައްވާ މަސައްކަތުގައި، ދައްކާ ބިރަކަށް ފަހަތަށް ނުޖެހޭނެ ކަމަށެވެ.

ޖަލްސާގައި ޥާހަކަ ދައްކަވަމުން ޝިފާޒް އިތުރަށް ވިދާޅުވީ، ރާއްޖޭގެ ރައްޔިތުން އަނިޔާއަށާއި ހުދުމުޚުތާރު އުސޫލުތަކަށް އާނއެކޭ ބުނެގެން ގޭގައި ނުތިބޭނެ ކަމަށެވެ.

ރައީސް ޔާމީނަށް ވަރަށް ސާފުކޮށް އެނގެންވީ ހަޤީޤަތަކީ، ކިތަންމެ ވައްކަމެއް ކުރި ކަމުގެ ވާހަކަ ރައްޔިތުންގެ ތެރޭގައި ދެއްކި ކަމުގައި ވީނަމަވެސް، އަދި ކިތަންމެ ވަރަކަށް އަނިޔާވެރިކަން ކުރިމަތިކުރާ ވާހަކަ އެ ރައްޔިތުންގެ ތެރޭގައި ދެއްކި ކަމުގައި ވީނަމަވެސް، މިކަންކަން ހުއްޓުވިދާނެ ކަމަށް ހީކޮށްފާ، ތި ކުރައްވާ ކަންކަމަކުން މި ކަންކަމެއް ނުހުއްޓުވޭނެކަން. އަޅުގަނޑުމެންގެ ދުލެއް، އަޅުގަނޑުމެންގެ އަނގައެއް ބަންދެއް ނުކުރެވޭނެކަން

ޝިފާޒް އިތުރަށް ވިދާޅުވީ، މިއަދުވެސް ޖަލުގައި އެތައް ޙައްޤުތަކަކުން މަހުރޫމްކޮށްފައި މީހުން ތިބި ކަމަށާ، އޭގެން ކޮންމެ މީހަކަށްމެ ލިބެންޖެހޭ ޙައްޤުތައް ހޯދައިދިނުމަށް އިދިކޮޅު ލީޑަރުން މަސައްކަތް ކުރައްވާނެ ކަމަށެވެ.