ޗެމްޕިއަންސް ލީގު ނުލިބުނަސް، މެސީގެ ސަބަބުން ޕީއެސްޖީގެ އާމްދަނީ އިތުރުވެއްޖެ

މި ސީޒަންގައި ޕީއެސްޖީއަށް ލިއޮނެލް މެސީގެ އިތުރުން ސާޖިއޯ ރާމޯސް ގެންދިއުމުގެ އެންމެ ބޮޑު މަގުސަދަކީ ޓީމު ވަރުގަދަކޮށް ޗެމްޕިއަންސް ލީގު ކާމިޔާބުކުރުމެވެ. މި ކުޅުންތެރިން ޓީމާއި ގުޅުމުގެ އިތުރުން އެމްބާޕޭ އާއި ނޭމާ ފަދަ މޮޅެތި ކުޅުންތެރިންނާއެކު މި ސީޒަންގެ ޗެމްޕިއަންސް ލީގު ޕީއެސްޖީން ކާމިޔާބު ކުރާނެކަމަށް ގިނަ ބަޔަކު އުންމީދުކުރިއެވެ.

ނަމަވެސް އެކަން ކާމިޔާބުނުވެ، ކްލަބުގެ މެނޭޖުމެންޓާއި، ސަޕޯޓަރުން ޖެހުނީ ނާކާމިޔާބީއާއި ކުރިމަތިލާށެވެ. މުބާރާތް ކާމިޔާބު ނުވި ނަމަވެސް މެސީގެ ސަބަބުން ޕީއެސްޖީއަށް ބޮޑު ފައިދާއެއް ކުރިކަން ގައިމެވެ. މެސީ ޕީއެސްޖީއަށް ބަދަލުވުމާއެކު އެކްލަބުގެ އާމްދަނީ ބޮޑުތަނުން އިތުރުވިއެވެ.

ރިޕޯޓުތައް ބުނާ ގޮތުން ޕީއެސްޖީއަށް ވަނީ އާމްދަނީގެ ގޮތުގައި 700 މިލިއަން ޔޫރޯ ލިބިފައެވެ. މިއީ 2011 ވަނަ އަހަރު ގަތަރު ސްޕޯޓްސް އިންވެސްޓްމެންޓުން ކްލަބާއި ހަވާލުވި ފަހުން ޕީއެސްޖީއަށް އެންމެ ބޮޑު އާމްދަނީއެއް ލިބުނު ފަހަރެވެ.

ޕީއެސްޖީގެ އާމްދަނީ އިތުރުވުމުގައި އެންމެ ބޮޑު ދައުރެއް އަދާކުރީ ސްޕޮންސަރުންނެވެ. މެސީ ޕީއެސްޖީއާ ގުޅުމާއެކު ސްޕޮންސަރުން ވަނީ 13 އިންސައްތަ އިތުރުވެފައެވެ. މިއީ ގާތްގަނޑަކަށް 50 މިލިއަން ޔޫރޯއެވެ. މީގެ އިތުރުން އިޝްތިހާރު ކޮށްގެން މި ސީޒަންގައި ޕީއެސްޖީއަށް 300 މިލިއަން ޔޫރޯ ލިބޭނެއެވެ. މިއީވެސް ޓީމުގެ ތާރީޚަށް ބަލާނަމަ ރެކޯޑެކެވެ.

ދެން އޮތީ ޖާޒީ ވިއްކައިގެން ކްލަބުން ހޯދަމުން އައި އާމްދަނީއެވެ. ޕީއެސްޖީން ވިއްކާފައިވާ ޖާޒީގެ 60 އިންސައްތައަކީ މެސީގެ ޖާޒީއެވެ. ޕީއެސްޖީއަށްވުރެ ގިނައިން ޖާޒީ ވިއްކާ މިހާރު އޮތީ އެންމެ ކްލަބެކެވެ. އެއީ މެންޗެސްޓަރ ޔުނައިޓެޑްއެވެ. ޖާޒީ ވިއްކުމުގެ އިތުރުން، ޕީއެސްޖީގެ ސްޓޭޑިއަމްއަށް މެޗު ބަލަން ވަންނަ މީހުންގެ އަދަދުވެސް ވަނީ މެސީ އެޓީމަށް ދިއުމާއެކު ރެކޯޑު އަދަދަކަށް އިތުރުވެފައެވެ.

ނަމަވެސް މި ސީޒަންގެ ޗެމްޕިއަންސް ލީގުގައި ގަދަ 16ގެ މެޗުން ރެއާލް އަތުން ބަލިވުމާއެކު ޕީއެސްޖީގެ ޓީވީ ރެވެނިއު ދަށްވާނެއެވެ. މިދިޔަ ސީޒަންގެ ސެމީ ފައިނަލަށް ޓީމު ދަތުރުކޮށްފައި ވާތީ ޓީވީ ރެވެނިއުގެ ގޮތުގައި 200 މިލިއަން ޔޫރޯ އެކަލަބަށް ލިބެއެވެ. ނަމަވެސް މި ސީޒަންގައި ލިބުނު ނާކާމިޔާބީއާއެކު މި އަދަދު ގާތްގަނޑަކަށް ދެބައިކުޅަ އެއްބަޔަށް ދަށްވާނެއެވެ.