މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ އަހަރީ އާއްމު ޖަލްސާގައި ބައިވެރިވާން ރަޖިސްޓްރީވުމުގެ މުއްދަތު މިރެއަށް ހަމަވާނެއެވެ.

އެމްޓީސީސީގެ އަހަރީ އާއްމު ޖަލްސާ އޮންނާނީ މި މަހުގެ 19 ވަނަ ދުވަހުގެ ރޭ 8:30ގައި ކުރުނބާ މޯލްޑިވްސްގައެވެ. އެ ޖަލްސާގައި ބައިވެރިވާން ހިއްސާދާރުންނަށް ފުރުސަތު ހުޅުވާލާފައިވަނީ މި މަހުގެ 17 ވަނަ ދުވަހުގެ ރޭ 8:30 އާ ހަމައަށެވެ.

މިއަހަރުގެ އަހަރީ އާއްމު ޖަލްސާގައި ބައިވެރިވެވޭނީ އެމްޓީސީސީގެ ހިއްސާދާރުންގެ ތެރެއިން 2022 އޭޕްރިލް 18 ވަނަ ދުވަހުގެ ނިޔަލަށް އެ ކުންފުނީގެ ހިއްސާދާރެއްގެ ގޮތުގައި ރަޖިސްޓްރީވެފައިވާ މީހުންނަށްކަމަށް އެކުންފުނިން ބުނެއެވެ. އަދި ހިއްސާދާރުން އަމިއްލައަށް ނުވަތަ ޕްރޮކްސީ މެދުވެެރިކޮށް ވެސް މި ޖަލްސާގައި ބައިވެރިވެވޭނެކަމަށްވެސް އެކުންފުނިން ބުނެއެވެ.

މި ޖަލްސާގައި ބައިވެރިވާން ރަޖިސްޓްރީވާން ބޭނުންވާ ހިއްސާދާރުންނަށް މޯލްޑިވްސް ސެކިއުރިޓީސް ޑިޕޮޒިޓަރީގެ އިންފިނިޓީ ޕޯޓަލްhttps://www.infinity.mv/މެދުވެރިކޮށް ނުވަތަ [email protected] އީމެއިލް ކޮށްގެން ވެސް ރަޖިސްޓްރީ ކުރެވޭނެ ކަމަށާއި މި ޖަލްސާއާ ގުޅޭ ލިޔެކިޔުންތައް އެމްޓީސީސީގެ ވެބްސައިޓުން ހިއްސާދާރުންނަށް ލިބެން ހުންނާނެ ކަމަށް އެމްޓީސީސީއިން މައުލޫމާތުދެއެވެ.

އެމްޓީސީސީގެ އަހަރީ އާއްމު ޖަލްސާގައި ވޯޓު ލާނީ އިލެކްޓްރޯނިކް ކޮށެވެ. އެހެންވެ، ކޮންމެ މީހަކުވެސް ޖަލްސާއަށް ދާއިރު ފޯނު ނުވަތަ އެ ނޫންވެސް އިލެކްޓްރޯނިކް ޑިވައިސެއް ގެންދިއުމަށް އެ ކުންފުނިން އެދެއެވެ.

އެމްޓީސީސީގެ ތާރީޚުގައި ވެސް މިހާތަނަށް އެންމެ ބޮޑު ފައިދާއެއް ވީ މިދިޔަ އަހަރުއެވެ. އެގޮތުން، މިދިޔަ އަހަރު ނިމުނުއިރު އެ ކުންފުންޏަށް ސާފު ފައިދާގެ ގޮތުގައި 224.6 މިލިއަން ރުފިޔާ ލިބުނެވެ.

މިދިޔަ އަހަރު އެމްޓީސީސީގެ ފައިދާއިން ހިއްސާއަކަށް 3.50 ރުފިޔާ ބަހަން ވަނީ ހުށަހަޅައިފައެވެ.