މޫސުމީ ބަދަލުތަކަށް ހޭނުމަށް ބަޖެޓުން ހަރަދު ކުރަން ޖެހެނީ ބައިނަލްއަގުވާމީ އެހީ ހޯދަން ދަތިވުމުން: ޝައުނާ
މިދިޔަ އަހަރު ރާއްޖޭގެ ބަޖެޓުން 30 އިންސައްތަ މޫސުމަށް އަންނަ ބަދަލުތަކަށް ހޭނުމަށް ޚަރަދުވި ކަމަށް މިނިސްޓަރ ލަފާ ކުރެއްވި
އެންވަޔަރަމަންޓް މިނިސްޓަރ އައިމިނަތު ޝައުނާ
މޫސުމަށް އަންނަ ބަދަލުތަކަށް ހޭނުމަށް ކުރާ މަސައްކަތްތަކަށް އަމިއްލަ ބަޖެޓުން ބޮޑު ޚަރަދުތަކެއް ކުރަން ޖެހެނީ ބައިނަލްއަގުވާމީ ގްރީން ފަންޑުން އެހީ ހޯދުމުގައި ދަތިތައް ހުރުމުން ކަމަށް އެންވަޔަރަމަންޓް މިނިސްޓަރ އައިމިނަތު ޝައުނާ ވިދާޅުވެއްޖެއެވެ.
ޝައުނާ މިހެން ވިދާޅުވީ ކްރޮސްރޯޑް މޯލްޑިވްސްގައި ބޭއްވި "ގްލާސްގޯ-ޝަރްމުއްޝައިޚް ވަރކް ޕްރޮގްރާމް އޮން ގްލޯބަލް ގޯލް އޮން އެޑޮޕްޓޭޝަން" ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. އޭނާ ވިދާޅުވީ މޫސުމަށް އަންނަ ބަދަލުތަކަށް ހޭނުމަށް އަދި އޭގެ ސަބަބުން ލިބޭ ގެއްލުމުން ސަލާމަތްވުމަށް މިހާރުން މިހާރަށް މަސައްކަތް ކުރަން ޖެހޭ ކަމަށެވެ.
ޝައުނާ ވިދާޅުވީ ރާއްޖޭގެ ކޮންމެ ރަށަކަށް ދިޔަ ނަމަވެސް އަޑު އިވޭނީ ގޮނޑުދޮށް ގިރާ ކަމުގެ ވާހަކަތަކާއި ފެން ތަޢައްޔަރު ވުމުގެ ވާހަކަތާއި ރާޅު ބޮޑުވުމުގެ ވާހަކަތައް ކަމަށެވެ. މޫސުމަށް އަންނަ ބަދަލުތަކުގެ ސަބަބުން ލިބޭ މިފަދަ ގެއްލުންތަކާއެކު އެ ބަދަލުތަކަށް ހޭނުމަށް ކުރަން ޖެހޭ ޚަރަދުތައް ވެސް އިތުރުވެފައިވާއިރު އެކަމަށް ފަންޑު ހޯދުމަކީ ވަރަށް ދަތި ކަމެއް ކަމަށް އޭނާ ފާހަގަ ކުރެއްވިއެވެ.
ބައިނަލްއަގުވާމީ ގްރީން ކްލައިމެޓް ފަންޑެއް އޮންނައިރު އެ ފަންޑަށް އެކްސެސްވުމަށް އޮތް އެންމެ ބޮޑު ހުރަހަކީ ޑޭޓާ ކަމަށް ޝައުނާ ފާހަގަ ކުރެއްވިއެވެ. އޭނާ ވިދާޅުވީ ރާއްޖެ ކަހަލަ ކުރިއަރައިގެން އަންނަ ޤައުމަކަށް އެ ޑޭޓާ ލިބުމަކީ ދަތިކަމެއް ކަމަށެވެ.
ޝައުނާ ވިދާޅުވީ ބައިނަލްއަގުވާމީ ގޮތުން ފަންޑު ލިބުމުގައި ދަތިތައް ހުރުމުން ޤައުމުގެ ބަޖެޓުން ބޮޑު ޚަރަދެއް ކުރަން ޖެހޭ ކަމަށެވެ. އެގޮތުން މިދިޔަ އަހަރު އެކަނިވެސް މޫސުމަށް އަންނަ ބަދަލުތަކަށް ހޭނުމަށް މަސައްކަތް ކުރުމަށް ޖުމްލަ ބަޖެޓުގެ 30 އިންސައްތަ ޚަރަދުވި ކަމަށް ލަފާ ކުރެވޭ ކަމަށެވެ. އަދި ރަނގަޅަށް ބަލައިފި ނަމަ ތިމާވެއްޓާ ގުޅުންހުރި ކަންކަމަށް ބަޖެޓުގެ 50 އިންސައްތައަށް ވުރެ ބޮޑު އަދަދެއް ހޭދަ ވެފައިވާނެ ކަމަށް ވެސް އޭނާ ވިދާޅުވިއެވެ.
ޝައުނާ ވަނީ ބައިނަލްއަގުވާމީ ފަންޑުތަކުން މިހާރަށްވުރެ ފަސޭހައިން ފައިސާ ލިބޭނެ ގޮތަށް އޮންނަން ޖެހޭނެ ކަމަށް ވިދާޅުވެފައެވެ. އަދި 2030 އަންނަން މާ ގިނަ ދުވަހެއް ނެތް އިރު ރާއްޖެ ފަދަ ގައުމުތަކަށް ވަގުތުން ފިޔަވަޅު އެޅުން ނޫން ހައްލެއް ނެތް ކަމަށް ވެސް މިނިސްޓަރ ފާހަގަ ކުރެއްވިއެވެ.
"ގްލާސްގޯ-ޝަރްމުއްޝައިޚް ވަރކް ޕްރޮގްރާމް އޮން ގްލޯބަލް ގޯލް އޮން އެޑޮޕްޓޭޝަން" ޕްރޮގްރާމް ކުރިޔަށްގެންދަނީ މިމަހުގެ 16 އިން 17އަށް ރާއްޖޭގެ ކްރޮސްރޯޑްސް ރިސޯޓްގައެވެ. ދުނިޔޭގެ ފިނިހޫނުމިން މައްޗަށް ދާ ރޭޓް 1.5 ޑިގްރީ ސެލްސިއަސްއަށްވުރެ ދަށުގައި ހިފެހެއްޓުމަށްޓަކައި، މޫސުމަށް އަންނަ ބަދަލުތަކުގެ ނާޒުކުކަން ކުޑަކުރުމަށް މަސައްކަތްކުރުމާއި، މޫސުމަށް އަންނަ ބަދަލުތަކަށް ހޭނުމުގެ ޤާބިލުކަން އިތުރުކުރުމަށް މަސައްކަތްކުރުމާއި މޫސުމާ ބެހޭ ކަންކަމާ ބެހޭގޮތުން ވިލުންތެރިކަން އިތުރުކުރުމަށް މަސައްކަތްކުރުމަކީ ޕެރިސް އެގްރީމަންޓުގެ މުހިންމު އަމާޒެކެވެ.
