ތަމަޅަ ޓައިގަރުން ދޭން އުޅޭކަމަށް ބުނާ ހަމަލާ ލަންކާގެ ޑިފެންސް މިނިސްޓްރީން ތަހުގީގު ކުރަނީ

ތަމަޅަ ޓައިގަރުން ސްރީލަންކާގައި ދޭން އުޅޭ ކަމަށް ބުނާ ހަމަލާ އެ ގައުމުން ތަހުގީގު ކުރާނެ ކަމަށް ލަންކާގެ ޑިފެންސް މިނިސްޓްރީ އިން ބުނެފިއެވެ.

އެ މިނިސްޓްރީ އިން އާދީއްތަ ދުވަހު ނެރުނު ބަޔާނެއްގައި މިހެން ބުނީ އެ ގައުމުގައި ތަމަޅަ ޓައިގަރުން 18 މެއި ވާ ބުދަ ދުވަހު ހަމަލާއެއް ދޭން އުޅޭކަމަށް އިންޑިއާގެ އިންޓެލިޖެންސަށް މައުލޫމާތު ލިބުމާ ގުޅިގެންނެވެ. އިންޑިއާއިން ވަނީ އެކަން ލަންކާއަށް އަންގައި އެކަން ތަހުގީގު ކުރާނެ ކަމަށް ވެސް ބުނެފައެވެ.

އިންޑިއާގެ ނޫސްތަކުގައި ބުނެފައިވާ ގޮތުގައި 2009 ވަނަ އަހަރު ލަންކާ ސިފައިން ބަލިކޮށްލި ތަމަޅަ ޓައިގަރުން އަނެއްކާވެސް ދަނީ އެއްވަމުންނެވެ. އެ މީހުން އެއްވެ ބުދަ ދުވަހު ހަމަލާއެއް ދޭން ރާވާކަމުގެ މައުލޫމާތު އިންޑިއާއަށް ލިބިފައިވާ ކަމަށާއި އެކަން އިންޑިއާއިން ލަންކާއަށް އަންގާފައިވާ ކަމަށް ވެސް ވަނީ ރިޕޯޓް ކޮށްފައެވެ.

ތަމަޅަ ޓައިގަރުން ހަމަލާދޭން އުޅޭ ދުވަހަކީ 2009 ވަނަ އަހަރު ލަންކާގެ ދާޚިލީ ހަނގުރާމަ ހުއްޓުމަކަށް އައި ދުވަހެވެ.

ލަންކާގައި ތަމަޅަ ޓައިގަރުން އަނެއްކާވެސް ހަމަލަތައް ދޭން ފަށަން އުޅޭކަން އިންޑިއާއިން ރިޕޯޓް ކުރުމުން ލަންކާއިން ފުރަތަމަ ވަނީ އިންޓެލިޖެންސް މައުލޫމާތު ލިބުނު ކަމަށް އިންކާރުކޮށްފައެވެ. އަދި އެއީ ލަންކާ މިހާރު އޮތް ހާލަތަށް ބަލާއިރު ފަތުރަން ނުރައްކާތެރި ޚަބަރެއް ކަމަށް ވެސް އެ ގައުމުގެ ސިޔާސީ އިސް ބައެއް ފަރާތްތަކުން ވަނީ ބުނެފައެވެ.

އިންޑިއާގެ ނޫހެއް ކަަމަށްވާ "ދަ ހިންދޫ" ގައި ރިޕޯޓް ކޮށްފައިވާ ގޮތުގައި ތަމަޅަ ޓައިގަރުން ލަންކާގައި ހަމަލާއެއް ދޭން އުޅެނީ މިހާރު އެ ގައުމުގައި ކުރިއަށްދާ ހަމަނުޖެހުންތަކުގެ ތެރެއިން ކަމަށެެވެ. އަދި އެއީ ތަމަޅަ ޓައިގަރުން ބަލިވި ދުވަހުގެ އިތުރުން އެ ޖަމާއަތުގެ ލީޑަރު ވެލުޕިއްލައި ޕްރަބަކަރަން އާއި އެ ޖަމާއަތުގައި ތިބެގެން ހަނގުރާމަ ކުރަމުންދަނިކޮށް މަރުވި މީހުންގެ ބަދަލުހިފުމުގެ ގޮތުން ދޭ ހަމަލާއެއް ކަމަށް އިންޑިއާގެ އިންޓެލިޖެންސަށް މައުލޫމާތު ލިބިފައިވާ ކަމަށް ވެސް ވަނީ ރިޕޯޓް ކޮށްފައެވެ.