ޗެއަރޕާސަން ބަހުސަށްފަހު ރާއްޖެޓީވީން ހުޅުވާލި ޕޯލް ފައްޔާޒު ކާމިޔާބު ކުރައްވައިފި

ޗެއަރޕާސަން ބަހުސަށްފަހު ރާއްޖެޓީވީގެ ޓްވިޓަރ އިން ހުޅުވާލި ޕޯލް، މި އިންތިޚާބުގައި ވާދަ ކުރައްވާ އިކޮނޮމިކް މިނިސްޓަރ ފައްޔާޒު އިސްމާއީލް ކާމިޔާބު ކުރައްވައިފިއެވެ.

ރާއްޖެޓީވީން ޓްވިޓަރ މެދުވެރިކޮށް ހުޅުވާލި މި ޕޯލަކީ 24 ގަޑިއިރަށް ހުޅުވާލި ޕޯލެކެވެ. މި ޕޯލްގައި ފައްޔާޒު އިންތިޚާބު ކާމިޔާބުކެރެވޭނެ ކަމަށް 65.1 އިންސައްތަ މީހުން ބުނެފައިވެއެވެ. ދެން ވާދަކުރައްވާ ކެންޑިޑޭޓް މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީއަށް އިންތިޚާބު ކާމިޔާބުރެއްވޭނެކަމަށް ބުނެފައިވަނީ 34.9 އިންސައްތަ މީހުންނެވެ.

Advertisement

ރާއްޖެޓީވީން "ޗެއަރޕާސަން ބަހުސް 2022" ގެނެސްދިނީ ބުދަ ދުވަހުގެރޭ 10:30ގައެވެ. ބަހުސްގައި ފަސް ބުރު ހިމެނުނުއިރު ދެ ބޭފުޅުންނަށްވެސް އެއް ސުވާލުތަކެއް އަމާޒު ކުރެވުނެވެ. މި ބަހުސަކީ ދެ ބޭފުޅުންގެ ތަސައްވުރު ހާމަކޮށްދިނުމުގެ މަގްސަދުގައި ގެނެސްދިން ބަހުސެކެވެ.

ބަހުސް ކުރިއަށްގެންދިޔަ ވަގުތު ފޭސްބުކް މެދުވެރިކޮށް ތޭރަ ހާހަށްވުރެ ގިނަ މީހުން ބަހުސް ބަލާފައިވެއެވެ. އަދި ޓްވިޓަރ މެދުވެރިކޮށް 1400އަށްވުރެ ގިނަ މީހުން ބަހުސް ބަލާފައިވެއެވެ.

އެމްޑީޕީގެ އެތެރޭގެ އިންތިޚާބުގެ ތެރެއިން އެންމެ ފޯރިގަދަވާނެކަމަށް ބެލެވޭ މި އިންތިޚާބުގައި ވާދަ ކުރައްވާ ދެ ކެންޑިޑޭޓުން ބަހުސް ރާއްޖެ ޓީވީން ގެނެސްދީފައިވަނީ، ދެ ކެންޑިޑޭޓުން އެއްތަނަކަށް ގެނެސް, ދެ ކެންޑިޑޭޓުންގެ ތަސައްވަރު ހާމަކޮށް, އާންމުން މިފަދަ ބަހުސްއެއް ބަލައިލަން ބޭނުންވާތީ އެ ފުރުސަތު ފަހިކޮށްދިނުމުގެ ގޮތުންނެވެ.

އިންތިޚާބު އޮންނާނީ މިމަހުގެ 14ވަނަ ދުވަހުއެވެ.