މަސްތުވާތަކެއްޗާއެކު ރިސޯޓަކުން 3 މީހުން ހައްޔަރުކޮށްފި
ހައްޔަރު ކުރި ތިން މީހުން އަތުން 90 ސެލޯފިން ކޮޅާއި ބަނގުރާ ފުޅިއަކާއި ފިލްމު ހުސްކުރި ދެ ދަޅު އަތުލައިގަތް
ރިސޯޓުން ހައްޔަރު ކުރި މީހުން އަތުން އަތުލައިގަތް މަސްތުވާތަކެތި
އދ. އަތޮޅުގެ ރިސޯޓަކުން މަސްތުވާތަކެއްޗާއެކު 3 މީހަކު ހައްޔަރުކޮށްފިއެވެ.
ފުލުހުން ބުނީ އެ މައްސަލާގައި ހައްޔަރު ކޮށްފައިވަނީ 22 އަހަރާއި 23 އަހަރާއި 24 އަހަރުގެ ދިވެހި ތިން ފިރިހެނުން ކަމަށެވެ. އެ މީހުން ހައްޔަރުކޮށްފައިވަނީ ބުދަ ދުވަހު ހިންގި އޮޕަރޭޝަނެއްގައެވެ.
އެ މީހުން ހައްޔަރު ކުރީ އދ. އަތޮޅުގެ ރިސޯޓަކަށް މަސްތުވާތަކެތި އެތެރެ ކުރަން އުޅޭ ކަމަށް ފުލުހުންގެ އިންޓެލިޖެންސަށް މައުލޫމާތު ލިބިގެން ހިންގި އޮޕަރޭޝަނެއްގައި ރިސޯޓުގެ ބަނދަރުމަތިން ހުއްޓުވައި ފާސްކުރިއިރު މަސްތުވާތަކެތި ފެނިގެންނެވެ. އެގޮތުން މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި 90 ސެލޯފިން ކޮޅާއި ބަނގުރާ ފުޅިއަކާއި ފިލްމު ހުސްކުރި ދެ ދަޅު އެ މީހުން އަތުން ފެނިފައިވާ ކަމަށް ފުލުހުން ބުނެއެވެ.
އެ މީހުން އަތުލައިގަތީ އދ. މާމިގިލީގައި މަސައްކަތް ކުރާ ފުލުހުންނާއި އެ އަތޮޅު ފެންފުށީގައި މަސައްކަތް ކުރާ ފުލުހުންނާއި އިންޓެލިޖެންސް ގުޅިގެންނެވެ.
މި މައްސަލަ މާމިގިލީ ޕޮލިސްޓޭޝަނުން މިހާރު ދަނީ ތަހުގީގު ކުރަމުންނެވެ.
