އެފްސީ ބޭސްސިޓީ ފައިނަލަށް، ދަ ސިޓީއާއި ޑީޓޫ ސްޕޯރޓްސް ޕްލޭއޮފަށް!
10 މެއި 2022 | އަންގާރަ 14:46ބޭސްސިޓީ މެޗަކުން ބައްޔެއް ނުވޭ
ބޭސްސިޓީ ކުޅުންތެރިން ފައިނަލްގެ ޖާގަ ލިބުމުން އުފާފާޅުކުރަނީ
ނ. ހޮޅުދޫ ބާފާ ޖަމްއިއްޔާއިން ކުރިއަށްގެންދާ ބާފާ ސޮކަރ ކަޕްގެ ފައިނަލްގެ ސީދާ ޖާގަ އެފްސީ ބޭސްސިޓީން ހޯދައިފިއެވެ. އެޓީމް ފައިނަލްގެ ޖާގަ ހޯދީ ލީގު ބުރު ނިމުނުއިރު 10 ޕޮއިންޓާއެކު އެއްވަނަ ހޯދައިގެންނެވެ.
އެއްވަނަ ޔަގީންކުރީ ލީގުބުރުގައި އެޓީމް ކުޅުނު ފަހު މެޗުގައި މިއަދު މައި ޗޮއިސް އިޒް ފުޓްބޯލް ބަލިކޮށްގެންނެވެ. މެޗު ބޭސްސިޓީން ކާމިޔާބުކުރީ 2-1ންނެވެ. މެޗުގެ ދެވަނަ މިނިޓްގައި ބޭސްސިޓީން ލީޑް ނެގީ އަހުމަދު ހުނެއިފް ޖެހި ލަނޑުންނެވެ. އޭގެ ހަ މިނިޓް ފަހުން ސަމްދޫހު މުހައްމަދު ލަނޑު ޖަހައި ބޭސްސިޓީއަށް ލީޑް ފުޅާކޮށްދިނެވެ. މައި ޗޮއިސް އިޒް ފުޓްބޯލްގެ ހަމައެކަނި ލަނޑު އިޝާން އިބްރާހީމް (ސައްޓު) ޖެހީ 12 ވަނަ މިނިޓްގައެވެ. މިބައްޔާއެކު މައި ޗޮއިސް އިޒް ފުޓްބޯލްއަށް ފައިނަލްގެ ފުރުސަތު ބަންދުވީއެވެ.
ފައިނަލްގެ ދެވަނަ ޖާގައަށް ވާދަކުރާނީ ދެވަނާގައި އޮތް ދަ ސިޓީއާއި ހެނބަދޫ ޑީޓޫ ސްޕޯރޓްސް ކްލަބެވެ. ޕްލޭއޮފް މެޗުގެ ކުރިން މަގޫދޫ ފުޓްބޯޅަ ޓީމާ ދެކޮޅަށް ލީގު ބުރުގެ ފަހު މެޗުގައި ޑީޓޫ ސްޕޯރޓްސް ނުކުންނާނެއެވެ. އެމެޗު ކުޅޭނީ ބުދަ ދުވަހުއެވެ.
