ޒަކިއްޔާގެ މަރަށް އެއް އަހަރު: ތަހުގީގު އަވަސްކުރުމަށް ގޮވާލައި އިހުތިޖާޖު ކޮށްފި
12 ސެޕްޓެމްބަރު 2025 | ހުކުރު 18:27ފުލުހުން މައްސަލައިގެ ތަހުގީގުގައި އިހުމާލުވެފައިވާ ކަމަށް އެންއައިސީން ބުނެ ދައުވާ ކުރުމަށް މަޝްވަރާކުރި
ޒަކިއްޔާ މޫސާގެ މަރުގެ ތަހުގީގު އަވަސް ކުރުމަށް ގޮވާލަމުން ހޮލްހޫދޫގައި ބޭއްވި އިހުތިޖާޖު
ނ. ހޮޅުދޫގައި މިދިޔަ އަހަރުގެ ސެޕްޓެމްބަރު މަހުގައި ބޮޑެތި ޒަޚަމްތަކާއެކު މަރާލާފައި އޮއްވާ ފެނުނު ޒަކިއްޔާ މޫސާގެ މަރަށް އަހަރެއް ފުރުނު ނަމަވެސް، އިންސާފު ނުލިބޭތީ އެ ރަށުގެ ރައްޔިތުން މިއަދު އިހުތިޖާޖަށް ނިކުމެ، ތަހުގީގު އަވަސްކުރުމަށް ގޮވާލައިފި އެވެ.
ހޮޅުދޫގެ ރައްޔިތުން ހުކުރު ދުވަހު ކުރިއަށްގެންދިޔަ މި އިހުތިޖާޖުގައި، ޒަކިއްޔާގެ މަރުގެ މައްސަލައިގައި އިންސާފު ލިބޭނީ ކޮން އިރަކުންތޯ ސުވާލު އުފައްދައި، ޤާތިލުން ހައްޔަރު ކުރުމަށް ވެސް ވަނީ ގޮވާލައިފަ އެވެ.
އެރަށުގެ ރައްޔިތުން ދެކޭގޮތުގައި ޒަކިއްޔާ މަރުވީ އަމިއްލައަކަށް ނޫނެވެ. އެ އިހްތިޖާޖުގައިވެސް ބުނަމުން ދިޔައީ އޭނާ މަރާލީ ކަމަށެވެ. މި އިހުތިޖާޖުގައި ޒަކިއްޔާގެ މަރުގެ އިހުމާލުވި ފަރާތްތައް ހައްޔަރުކުރުމަށްވެސް އެއްވުމުގެ ބައިވެރިން ގޮވާލިއެވެ.
އެއްވުމުގައި ބައިވެރިވި ފަރާތްތަކުން ފާހަގަކުރި ގޮތުގައި، މައްސަލައިގެ ފެށުނީއްސުރެ ފުލުހުންގެ ތަހުގީގުގައި އިހުމާލު އެބަހުއްޓެވެ. އަދި މިކަން ހޯމް މިނިސްޓަރު އަލީ އިހުސާން ވެސް ވަނީ ޤަބޫލުފުޅުކުރައްވާފައެވެ. މި މައްސަލައިގައި ފުލުހުންގެ ވާހަކަތައް ދިމާނުވާކަން ވެސް ރައްޔިތުން ފާހަގަކުރިއެވެ.
މީގެ އިތުރުން ޒަކިއްޔާގެ މަރުގެ މައްސަލައިގައި ފުލުހުން އިހުމާލުވެފައިވާކަމަށް ނޭޝަނަލް އިންޓެގްރިޓީ ކޮމިޝަން (އެންއައިސީ) އިން ޤަބޫލުކުރާތީ، ފުލުހުންނާ މެދު ދަޢުވާކުރުމާ މެދު ޕްރޮސެކިއުޓަރ ޖެނެރަލްގެ އޮފީހުން ވަނީ މަޝްވަރާ ވެސް ކޮށްފައެވެ. އެންއައިސީން ފުލުހުންނަށް ކުރާ ތުހުމަތުތަކުގެ ތެރޭގައި ރަސްމީ ވާޖިބު އަދާކުރުމުގައި އެކަށީގެންނުވާ އަމަލުތައް ހިންގުމާއި، ނުފޫޒު ބޭނުންކުރުމާއި، އަދުލު އިންސާފު ޤާއިމްކުރުމަށް ހުރަސްއެޅުން ހިމެނެއެވެ.
މި މައްސަލައިގައި އެމެރިކާގެ އެފްބީއައި ވެސް ބައިވެރިކޮށްފައިވީ ނަމަވެސް، ތަހުގީގުތަކުގެ މާ ގިނަ މަޢުލޫމާތެއް ފުލުހުން ހާމަކޮށްފައެއް ނުވެއެވެ. ނަމަވެސް ރައީސުލްޖުމްހޫރިއްޔާ ވަނީ މި މައްސަލައިގައި އިންސާފު ޤާއިމުކުރުމަށް ކުރެވެންހުރި ހުރިހާ ކަމެއް ކުރައްވާނެކަމުގެ ޔަޤީންކަން ދެއްވާފައެވެ.
