މިސްކިތްތައް ސާފުކުރުމުގެ މަސައްކަތް ހަވާލު ކުރަނީ ތާޑް ޕާޓިއަކާ ކަމަށާއި ނަމަވެސް ގޯތި ތެރެ ސާފުނުކޮށް ހުންނަ ނަމަ މީގެ ފަހުން ސިޓީ ކައުންސިލުން އެތަންތަން ސާފު ކުރާނެ ކަމަށް މާލެ ސިޓީ ކައުންސިލްގެ މޭޔަރު ޑރ. މުޙައްމަދު މުއިއްޒު ވިދާޅުވެއްޖެއެވެ.

މޭޔަރު މިހެން ވިދާޅުވީ މާލޭގެ ބައެއް މިސްކިތްތަކުގެ ގޯތި ތެރެ ސާފުނުކޮށް ހުރުމުން އާއްމުންނަށް ދަތިވާތީ އެކަން "ރާއްޖެ އެމްވީ" އިން ރިޕޯޓް ކުރުމާ ގުޅިގެންނެވެ. "ރާއްޖެ އެމްވީ" އަށް މައުލޫމާތު ދެއްވަމުން މޭޔަރު ވިދާޅުވީ ކައުންސިލުން ސާފު ކުރަނީ މަގުމަތި އެކަނި ކަމަށެވެ. އަދި މިސްކިތްތަކުގެ ގޯތިތެރެއާ އެެތެރެ ސާފުކުރުމުގެ މަސައްކަތް އެހެން ބަޔަކާ ހަވާލުކޮށްފައިވާ ކަމަށް ވެސް ވިދާޅުވިއެވެ.

މޭޔަރު ވިދާޅުވީ މިހާތަނަށް އެގޮތަށް ކަންކަން ކުރިއަށްދިޔަ ނަމަވެސް މީގެ ފަހުން ކައުންސިލްގެ މުވައްޒަފުން މަގުމަތި ކުނިކަހާއިރު މިސްކިތްތަކުގެ ގޯތި ތެރޭގައި ކުނި ހުންނަ ނަމަ އެ ކުނި ނަގާނެ ކަމަށެވެ.

މީގެ އިތުރުން މިސްކިތްތަކުގެ ކަންކަމަށް ހާއްސަ އިސްކަމެއް ދެއްވާނެ ކަމަށާއި ތަނެއް ނުވަތަ އެއްޗެއް ހަލާކުވިޔަސް ވަގުތުން އެކަމެއް ރަނގަޅު ކުރުމަށް މަސައްކަތް ކުރައްވާނެ ކަމަށް މޭޔަރު ވިދާޅުވިއެވެ.

މާލޭގެ ބައެއް މިސްކިތްތަކުގެ ގޯތި ތެރޭގައި ކުނި ގިނަވާތީ އާއްމުންގެ ބަޔަކު އަމިއްލައަށް އިސްނަގައިގެން އެކަން ހައްލު ކުރުމަށް ކައުންސިލުގައި ވަނީ އެދިފައެވެ. ނަމަވެސް ކައުންސިލުން އެދެވޭ ޖަވާބެއް ނުދޭ ކަމަށް އެ ފަރާތްތަކުން ބުނެއެވެ.

"ރާއްޖެ އެމްވީއަށް" މައުލޫމާތު ލިބިފައިވާ ގޮތުގައި ބައެއް މިސްކިތްތަކުގައި ސާފުކުރަނީ ހަމައެކަނި މިސްކިތުގެ އެތެރެއެވެ. ގޯތި ތެރެ ހަފްތާއަކު އެއްފަހަރު ސާފުކުރާއިރު ޕްލާސްޓިކް ކުންޏާއި ޓިޝޫ ފަދަ ތަކެތި އަޅާފައި ހުންނަނީ ގޯތި ތެރޭގައި ހައްދާފައި ހުންނަ ގަސްތަކުގެ ތެރެއަށެވެ.

ކޮންމެ މިސްކިތެއްގައި ވެސް ސާފުކޮށް ބަލަހައްޓާ މީހުން ބައިތިއްބާފައި ތިބޭއިރު ބައެއް މީހުންނަށް އަދިވެސް މުސާރަ ނުލިބޭ ކަމުގެ ޝަކުވާތައް ވެސް ލިބެއެވެ. އެކަން ސަމާލުކަމަށް އައިސްފައިވާ ކަމަށާއި މުސާރަ ދިނުމުގައި ބައެއް ފަހަރު ޑިލޭތަކެއް އުޅޭ ކަމަށްވެސް މޭޔަރު މުއިއްޒު ފާހަގަ ކުރެއްވިއެވެ.

މޭޔަރު ވިދާޅުވީ މުސާރައިގެ ޑިލޭތަކެއް އުޅޭ މައްސަލަ ހައްލު ކުރަން މަސައްކަތް ކުރައްވާނެ ކަމަށެވެ.