21 މިލިއަން ރުފިޔާގެ ކޮކެއިން އެތެރެ ކުރަން އުޅުނު ދެ މީހަކު ހައްޔަރުކޮށްފި
9 މެއި 2022 | ހޯމަ 04:14ޑްރަގްސް ފެނިފައިވަނީ ފަތުރުވެރިއެއްގެ ލަގެޖުން
ކަސްޓަމްސް އިން އަތުލައިގަތް މަސްތުވާތަކެތި
ރާއްޖެއަށް މަސްތުވާތަކެތި އެތެރެ ކުރަން އުޅުނު ފަތުރުވެރިޔަކާއި ދިވެއްސަކު ހައްޔަރުކޮށްފިއެވެ.
މަސްތުވާތަކެތި އެތެރެ ކުރަން އުޅުނު ފަތުރުވެރިޔަކު ވެލާނާ އިންޓަނޭޝަނަލް އެއާޕޯޓުން ހައްޔަރު ކުރީ މިދިޔަ އަންގާރަ ދުވަހުއެވެ. އެ މައްސަލައިގައި ކަސްޓަމްސްއިން ހައްޔަރު ކޮށްފައިވަނީ ފިރިހެނެކެވެ.
ކަސްޓަމްސް އިން ބުނި ގޮތުގައި އެ ފަތުރުވެރިޔާގެ ލަގެޖު ބަލައި ފާސް ކުރިއިރު ޝައްކު ކުރެވޭ އެއްޗެއް ހުރެގެން އިތުރަށް ބެލި އިރު މަސްތުވާތަކެތި ފެނިފައިވާ ކަމަށެވެ.
ފުލުހުން ބުނީ، މި މައްސަލާގައި އެ ޓޫރިސްޓު ފިރިހެން މީހާގެ އިތުރަށް ދިވެހި ފިރިހެނަކު ވެސް ހައްޔަަރު ކޮށްފައިވާ ކަމަށެވެ. އަދި އެ މީހުންގެ ބަންދަށް ކްރިމިނަލް ކޯޓުން 15 ދުވަހުގެ މުއްދަތެއް ޖަހާފައިވާ ކަމަށް ވެސް ފުލުހުން ބުނެއެވެ.
ކަސްޓަމްސް އިން ފަތުރުވެރިޔާ އަތުން އަތުލައިގަތް ތަކެތި ތަހުލީލު ކުރިއިރު، މަސްތުވާތަކެތީގެ ނުރައްކާތެރި ބާވަތެއް ކަމަށްވާ ކޮކެއިންއަށް ވަނީ ޕޮޒިޓިވް ވެފަ އެވެ. މި ތަކެތީގެ ބަރުދަން 4.226 ކިލޯއަށް އަރާއިރު، އޭގެ މަގުމަތީ އަގު 21 މިލިއަން ރުފިޔާއަށް އަރާނެ ކަމަށް ކަސްޓަމްސް އިން ބުނެއެވެ.
އަތުލައިގަނެވުނު މަސްތުވާތަކެތި ކަސްޓަމްސް އިން ވަނީ ފުލުހުންނާ ހަވާލުކޮށްފައެވެ.
