ހޮޅުދޫގައި ކުރިއަށްދާ ބާފާ ސޮކަރ ކަޕްގައި ނ.ހެނބަދޫ ޑީޓޫ ސްޕޯރޓްސް ކްލަބުން ފުރަތަމަ މޮޅު ހޯދައިފިއެވެ. ޑީޓޫ ސްޕޯރޓްސް ކްލަބުން ފުރަތަމަ މޮޅު ހޯދީ މައި ޗޮއިސް އިޒް ފުޓްބޯލްއާ ވާދަކޮށް 2-1 ން މެޗު ކާމިޔާބުކޮށްގެންނެވެ.

ޑީޓޫ ސްޕޯރޓްސްއަށް މެޗުގައި ކުރި ހޯދައިދިނީ 19 ވަނަ މިނިޓްގައި އަލީ ފާއިޒުއެވެ. އެކަމަކު މެޗުގެ ފަހު ފަސް މިނިޓްގެ ތެރޭގައި އައްޒާމް އަބުދުالله ލަނޑެއް ޖަހާ މެޗުގެ ނަތީޖާ ހަމަހަމަކުރިއެވެ. މެޗު އެއްވަރުވެގެން ނިމޭނެކަމަށް ބެލެވިފައި ވަނިކޮށް, މެޗުގެ އިތުރު ވަގުތުގައި ޑީޓޫ ސްޕޯރޓްސް ކްލަބް މޮޅުކޮށްދިނީ އަހުމަދު އަބުދުއްރަހުމާނެވެ. މެޗުގެ މޮޅު ކުޅުންތެރިއަކީވެސް އޭނާއެވެ.

މިމޮޅާއެކު ޑީޓޫ ސްޕޯރޓްސް ކްލަބް ވަނީ ތިން މެޗުން 4 ޕޮއިންޓް ހޯދައިގެން ތިންވަނައަށް ޖެހިލާފައެވެ. ކުރިން ތިންވަނައިގައި އޮތް މައި ޗޮއިސް އިޒް ފުޓްބޯލް ތިން މެޗުން ތިން ޕޮއިންޓާއެކު އޮތީ ހަތަރު ވަނައިގައެވެ. މުބާރާތުގައި ހޯމަ ދުވަހު ވާދަކުރާނީ މަގޫދޫ ފުޓްބޯޅަ ޓީމާއި, ހޮޅުދޫ ދަ ސިޓީއެވެ.