ހޯމަ ދުވަހުން ފެށިގެން އެމްޕީއެލްއިން މުދާ ކްލިއާ ކުރާ ވަގުތު އާއްމު ހާލަތައް
މުދާ ކްލިއާ ކުރާ ވަގުތުތަކަށް ބަދަލު ގެނައީ ޝައްވާލު މަހުގެ ހަ ރޯދަ ނިމެންދެން
އެމްޕީއެލް ސަރަޙައްދު
މާލެ ވިޔަފާރި ބަނދަރުގައި މުދާ ކްލިއާ ކުރާ ވަގުތުތައް ހޯމަ ދުވަހުން ފެށިގެން އާއްމު ހާލަތައް ބަދަލުވާނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނެފިއެވެ.
އެ ކުންފުނިން މުދާ ކްލިއާ ކުރާ ވަގުތުތަކަށް ބަދަލު ގެނައީ ރަމަޟާން މަހާ ގުޅިގެން ރާއްޖެ ގެންނަ މުދާ އަވަހަށް ކްލިއާ ކުރުމަށެވެ. އެ ބަދަލާ އެއްގޮތަށް އަމަލު ކުރަން ނިންމީ ރަމަޟާން މަހުގެ ފުރަތަމަ ދުވަހުން ފެށިގެން ޝައްވާލު މަހުގެ ހަ ރޯދަ ނިމެންދެނެވެ.
ރޯދަމަހު މުދާ ކްލިއާ ކުރަމުން އައީ ހެނދުނު 9:00 އިން ހަވީރު 4:00 އަށެވެ. އަދި ރޭގަނޑު 9:00 އިން 1:30 އަށެވެ. މި ވަގުތުތަކުގެ އިތުރަށް ވެސް ކާބޯތަކެތީގެ ކޮންޓެއިނަރުތައް އަތުވެއްޖެ ނަމަ އެ ތަކެތި ކޮންމެ ވަގުތެއްގައި ވެސް ކްލިއާ ކުރާގޮތަށް ނިންމިއެވެ.
ކޮންމެ ރަމަޟާން މަހަކާ ގުޅުވައިގެން އެމްޕީއެލް އިން މުދާ ކްލިއާ ކުރާ ވަގުތުތަކަށް ބަދަލު ގެންނަނީ އެ މަހު ރާއްޖެއަށް ގިނަ އަދަދެއްގެ ކާބޯތަކެތި އެތެރެ ކުރާތީއެވެ. އެމްޕީއެލްގެ މި ބަދަލުތަކުގެ ސަބަބުން ނިމުނު ރަމަޟާން މަހު ރާއްޖެއަށް އެތެރެ ކުރި މުދާ ކްލިއާ ނުކުރެވި ޝަކުވާތަކެއް ނުކުރެއެވެ.
އެހެން މަސްތަކުގައި ވިޔަފާރި ބަނދަރުން މުދާ ކްލިއާ ކުރާނީ ހުކުރު ދުވަސް ފިޔަވައި އެހެން ހުރިހާ ދުވަހެއްގެ ހެނދުނު 7:30 އިން ރޭގަނޑު 11:30 އަށެވެ. އަދި ހޯމަ ދުވަހުން ފެށިގެން އެމްޕީއެލް އިން އަމަލު ކުރާނީ މި ގަޑިތަކަށެވެ.
ރަމަޟާން މަހާ ދިމާކޮށް ރާއްޖެއަށް ގިނަ އަދަދެެއްގެ ކާބޯތަކެތި އެތެރެ ކުރާއިރު އެކަމަށް ހާއްސަކޮށްގެން މި ނިމުނު ރަމަޟާން މަހު އެމްޕީއެލް އިން އިތުރު 20 މުވައްޒަފުން ވެސް ނެގިއެވެ. އަދި މުދާ ކްލިއާ ކުރުން އަވަސް ކުރުމަށް ދެ ފޯކް ލިފްޓް ވެސް ގެނައެެވެ.
