މި މަހުގެ 14 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ޗެއަރޕަރސަންގެ އިންތިޚާބުގައި ވާދަކުރައްވާ މާފަންނު އުތުރު ދާއިރާގެ މެމްބަރު އިމްތިޔާޒު ފަހްމީ (އިންތި)އާއި އިކޮނޮމިކް މިނިސްޓަރ ފައްޔާޒު އިސްމާއީލްގެ ބަހުސެއް ރާއްޖެޓީވީން ބާއްވަން ނިންމައިފިއެވެ.

މި ބަހުސް ބޭއްވުމަށްޓަކައި ވާންޖެހޭ ތައްޔާރީތައް މިހާރު އަންނަނީ ވަމުންނެވެ. މި ބަހުސް ބޭއްވުމަށްޓަކައި, މި މަގާމަށް ވާދަކުރައްވާ 2 ކެންޑިޑޭޓުންނަށް ވަނީ ދައުވަތު އަރުވާފައެވެ. އަދި 2 ކެންޑިޑޭޓުން ވަނީ ދައުވަތު ގަބޫލުކުރައްވާފައެވެ. މިއީ 2 ކެންޑިޑޭޓުންގެ މެދުގައި މިފަދަ ބަހުސްއެއް ޓީވީ ސްޓޭޝަނަކުން ބާއްވާ ފުރަތަމަ ފަހަރެވެ.

އެމްޑީޕީގެ އެތެރޭގެ އިންތިޚާބުގެ ތެރެއިން އެންމެ ފޯރިގަދަވާނެކަމަށް ބެލެވޭ މި އިންތިޚާބުގައި ވާދަ ކުރައްވާ ދެ ކެންޑިޑޭޓުން ބަހުސްގައި ބައިވެރިވުމަށް އެއްބަސްވެވަޑައިގެންފައިވާއިރު، ބަހުސް އޮންނާނެ ތާރީޚެއް ވަރަށް އަވަހަށް ހާމަކުރާނެއެވެ. މި ބަހުސް ރާއްޖެ ޓީވީން ގެނެސްދޭން ނިންމާފައިވަނީ، ދެ ކެންޑިޑޭޓުން އެއްތަނަކަށް ގެނެސް, ދެ ކެންޑިޑޭޓުންގެ ތަސައްވަރު ހާމަކޮށް, އާންމުން މިފަދަ ބަހުސްއެއް ބަލައިލަން ބޭނުންވާތީ އެ ފުރުސަތު ފަހިކޮށްދިނުމަށެވެ.

އެމްޑީޕީގެ އެތެރޭގެ އިންތިޚާބު ރޯދަމަހާ ދިމާވާތީ, ގައުމީ މަޖިލީހުގެ އަޣުލަބިއްޔަތުން އެ އިންތިޚާބު މި މަހުގެ 14 ވަނަ ދުވަހަށް ވަނީ ފަސްކޮށްފައެވެ. މެއި 14 ވާ ހޮނިހިރު ދުވަހު ބާއްވާ މި އިންތިޚާބަށް 2 ކެންޑިޑޭޓުން ވެސް އަންނަނީ ފޯރިއާއެކު ކެމްޕެއިން ކުރައްވަމުންނެވެ.