"ރިޕޯޓާސް ވިތައުޓް ބޯޑާސް" ކޮންމެ އަހަރަކު އާންމު ކުރަމުން އަންނަ "ވޯލްޑް ޕްރެސް ފްރީޑަމް އިންޑެކްސް" ގައި ރާއްޖެ މިދިޔަ އަހަރަށް ވުރެ 15 ދަރަޖަ ފަހަތަށް ވެއްޓިއްޖެއެވެ.
ނޫސްވެރިކަމުގެ މިނިވަންކަމުގެ ބައިނަލްއަގްވާމީ ދުވަހާ ގުޅިގެން އެ ޖަމިއްޔާއިން އާންމުކުރި އިންޑެކްސްގައިވާ ގޮތުން، މި އަހަރު ރާއްޖެ އޮތީ 87 ވަނައިގައެވެ. މިދިޔަ އަހަރު އެ އިންޑެކްސްގައި ރާއްޖެ އޮތީ 72 ވަނައިގައެވެ. އެހެންކަމުން މިއީ 15 ދަރަޖައިގެ ވެއްޓުމެކެވެ. މިއީ ފާއިތުވި ހަތަރު އަހަރު ދުވަހަށް ބަލާނަމަ މި އިންޑެކްސްގައި ރާއްޖެ އެންމެ ފަހަތަށް ދިޔަ ފުރަތަމަ ފަހަރެވެ. އެ އިންޑެކްސްގައި 2018 ވަނަ އަހަރު ރާއްޖެ އޮތީ 120 ވަނައިގައެވެ. 2019 ވަނަ އަހަރު 98 ވަނައިގައި އޮތްއިރު 2020 ވަނަ އަހަރު އޮތީ 79 ވަނައިގައެވެ.
އަނެއްކޮޅުން މިއީ ނޫސްވެރިކަމުގެ މިނިވަންކަން ދަރަޖަކުރާ ބައިނަލްއަގްވާމީ މިންގަނޑުގައި ރާއްޖެ މިވެރިކަމުގައި މިހާ ބޮޑަށް ފަހަތަށް ޖެހުނު ފުރަތަމަ ފަހަރުވެސްމެއެވެ. މިސަރުކާރު އައީ ނޫސްވެރިކަމުގެ މިނިވަންކަމަށް ގޮވާލަމުންނެވެ. އަދި ތަކުރާރުކޮށް ނޫސްވެރިކަމުގެ މިނިވަންކަން ދީފައިވާކަމަށް ސަރުކާރުގެ އެކި ބޭފުޅުން ގެންދަވަނީ ވިދާޅުވަމުންނެވެ. ދުވަހުގެ މުނާސަބަތުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ދެއްވި ހިތާބުގައި ރާއްޖެއަކީ ދެކުނު އޭޝިޔާގެ ޤައުމުތަކުގެ ތެރެއިން، ނޫސްވެރިކަމުގެ މިނިވަންކަމުގެ ޙައްޤު އެންމެ ފުރިހަމައަށް ލިބިދީފައިވާ ޤައުމުކަން ފާހަގަކުރައްވައި މި ޙައްޤު ޙިމާޔަތްކޮށްދިނުމަށް ސަރުކާރުން ވެފައިވާ ވަޢުދާ އެއްގޮތަށް، ޚަބަރާއި މަޢުލޫމާތު ފެތުރުމުގެ ފުރިހަމަ މިނިވަންކަމާއި، މަޢުލޫމާތު ހޯދައި ލިބިގަތުމުގެ ޙައްޤު، ކުރިމަގުގައި ވެސް ދިވެހި ނޫސްވެރިންނަށާއި ދިވެހި ރައްޔިތުންނަށް ފުރިހަމައަށް ލިބިދޭނެކަމުގެ ޔަޤީންކަން އެ މަނިކުފާނު ދެއްވިއެވެ. އަދި އެ މަނިކުފާނު ރާއްޖޭގެ ވެރިކަމާ ހަވާލުވެވަޑައިގަތުމުގެ ކުރިން ހަރުކަށި ހިފެހެއްޓުމެއްގެ ތެރޭގައި އޮތް ނޫސްވެރިކަމަށް މިހާރު ފުރިހަމަ މިނިވަންކަމެއް ލިބިފައި ވާތީ އުފާފުޅު ކުރައްވާ ކަމަށް ވެސް ވިދާޅުވިއެވެ.
އިންޑެކްސްގައި ލިޔެފައިވާ ގޮތުން ރާއްޖެ ފަހަތަށް ވެއްޓުނީ ގާނޫނުއަސާސީން ނޫސްވެރިންނަށް ކަށަވަރުކޮށްދީފައިވާ މިނިވަންކަމުގެ ހައްގު ހަނިވާނެ ގޮތަށް ހެއްކާ ބެހޭ ބިލެއް ރައްޔިތުންގެ މަޖިލީހަށް މި ސަރުކާރުގައި ހުށަހަޅާފައި ވާތީއެވެ. އެއީ ނޫސްވެރިން ލިޔާ ޚަބަރުތައް ނުވަތަ ރިޕޯޓުތަކުގެ މަސްދަރު ހާމަކުރަން މަޖުބޫރު ކުރެވޭ ގޮތަށް އެ ބިލުގައި ހުށަހަޅާފައި ވާތީ ކަމަށް އިންޑެކްސްގައި ބުނެފައިވެއެވެ. މީގެއިތުރުން "މިހާރު" ނޫހުގައި މިދިޔަ އަހަރު ލިޔުނު ރިޕޯޓެއްގެ މަސްދަރު ހޯދަން ރައްޔިތުންގެ މަޖިލީހުގެ ކޮމިޓީއަކުން މަސައްކަތް ކުރި ކަމަށް ބުނެފައިވެއެވެ.
އަދި ހަރުކަށި ފިކުރާއި ގޭންގުތަކުގައި އުޅޭ ކުށްވެރިންގެ ފަރާތުން ނޫސްވެރިންނަށް ބިރު ދެއްކުމާއި ހަރުކަށި ފިކުރުގެ މީހުންގެ އަމާޒަކަށްވެ، "މިނިވަން" ނޫހުގެ ކުރީގެ ނޫސްވެރިޔާ އަހްމަދު ރިލްވާން ގެއްލުވާލުމާއި އޭނާގެ ގާތް އެކުވެރިޔާ އަދި ބްލޮގަރު ޔާމީން ރަޝީދު މަރާލި ހާދިސާ ފާހަގަކޮށްފައިވެއެވެ. މިއިން އެއްވެސް ހާދިސާއެއްގައި އެއްވެސް މީހަކަށް އެކަމުގެ ކުށުގައި އަދަބު ދީފައިނުވާކަމަށް ބުނެފައިވެއެވެ. މިމައްސަލަތައް ބެލުމަށް 2018 ވަނަ އަހަރު ކޮމިޝަނެއް އުފެއްދިނަމަވެސް މިއަދާ ހަމައަށް އައިއިރު މިމައްސަލަތަކުގައި ލިބިފައިވާ ކުރިއެރުމެއް އެކޮމިޝަނުން ހާމަކޮށްފައިނުވާކަމަށް ބުނެފައިވެއެވެ. މީގެއިތުރުން މަސައްކަތުގެ މާހައުލުގައި އަންހެން ނޫސްވެރިންނަށް ކުރިމަތިވާ ޖިންސީ ފުރައްސާރަކުރުން މަޑުމަޑުން އިތުރުވަމުންދާކަމަށް ރިޕޯޓްގައި ފާހަގަކޮށްފައިވެއެވެ.
މީގެއިތުރުން މީޑިޔާތަކަށް އިޝްތިހާރުތައް ދިނުމުގައި ދެފުށް ފެންނަ އަދި އެކަންކަން ބެލޭނެ ގޮތެއް ނޯންނަކަމަށް ފާހަގަކޮށްފައިވެއެވެ. ބައެއް މީޑިޔާތަކަށް ބޮޑެތި އަދަދުތަކުން ފައިސާ ލިބޭއިރު އެއީ އެހާ ގިނަބަޔަކު ކިޔާ ނޫސްތަކަށް ނުވާކަމަށާއި ސަރުކާރު ހިއްސާވާ ކުންފުނިތަކުން މިފަދަ ނޫސްތަކަށް ބޮޑެތި އަދަދުތަކުން އިޝްތިހާރުދޭކަމަށް ވަނީ ބުނެފައެވެ. އެކަމުގެ ސަބަބުން ބައެއް ކަހަލަ ލިޔުންތައް ނެގުމަށް އެޑިޓަރުންނަށް އަންގާކަމަށާއި އަދި ބައެއް ކަހަލަ ކަންކަން ކަވަރު ނުކުރުމަށް އަންގާކަމަށް އިންޑެކްސްގައި ރާއްޖެ ފަހަތަށް ދިޔަ ސަބަބުތަކުގެ ތެރޭގައި ފާހަގަކޮށްފައިވެއެވެ.
