މަރުގެ މައްސަލައިގައި ހައްޔަރުކުރި އާބިދުގެ ބަންދަށް އިތުރު 15 ދުވަސް ޖަހައިފި
މިމައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރަމުންދޭ
ކްރިމިނަލް ކޯޓް- އާދިއްތަ ދުވަހު ކްރިމިނަލް ކޯޓުން ވަނީ އޭނާގެ ބަންދަށް އިތުރު 15 ދުވަސް ޖަހާފައި
ހުޅުމާލޭގެ ޚާންޖީ ރެސްޓޯރަންޓްގައި ބަންގްލަދޭޝްގެ ވެއިޓަރަކަށް ހަމަލާދީ މަރާލި ކަމަށް ތުހުމަތުކުރާ ޕާކިސްތާނުގެ ކައްކާ މުހައްމަދު އާބިދުގެ ބަންދަށް ކްރިމިނަލް ކޯޓުން 15 ދުވަސް ޖަހައިފިއެވެ.
އެންމެ ފުރަތަމަ އޭނާގެ ބަންދުގެ މުއްދަތު ޖަހާފައިވަނީ ހުޅުމާލެ މެޖިސްޓްރޭޓް ކޯޓުންނެވެ. އޭރު އޭނާ 15 ދުވަހަށް ބަންދު ކުރުމަށް އަމުރުކޮށްފައިވާއިރު، އެ މުއްދަތު ހަމަވުމުން، އާދިއްތަ ދުވަހު ކްރިމިނަލް ކޯޓުން ވަނީ އޭނާގެ ބަންދަށް އިތުރު 15 ދުވަސް ޖަހާފައެވެ. އެ މުއްދަތު ހަމަވާނީ 16 މެއި 2022 ގެ 11:54 އަށެވެ.
ކްރިމިނަލް ކޯޓުގައި މި އަމުރު ނެރުއްވީ ގާޒީ ހުސައިން ފާއިޒު ރަޝާދެވެ. ސަބަބެއްގެ ގޮތުގައި ފާހަގަ ކުރައްވާފައިވަނީ އޭނާ ބަންދުން ދޫކޮށްލައިފިނަމަ އެފަދަ އަމަލެއް ތަކުރާރު ކޮށްފާނެތީއާއި، އޭނާ ފިލައިގެން ހިނގައިދާނެކަމަށް ބަލައި، އަދި މުޖުތަމައުގެ ސަލާމަތަށް ނުރައްކާވެދާނެކަމަށް ބެލެވޭތީކަމަށެވެ.
އޭނާގެ ފަރާތުން ހެއްކަށް ނުފޫޒު ފޯރުވަފާނެ ކަމުގެ އިހުތިމާލު އޮތްކަންވެސް ގާޒީ ހުސައިން ފާއިޒު ރަޝާދު ނެރުއްވި އަމުރުގައި ފާހަގަ ކުރައްވާފައިވެއެވެ.
މަރާލާފައިވާ ބަންގްލަދޭޝް މީހާއަކީ ޚާންޖީ ކެފޭގައި ވެއިޓަރެއްގެ ގޮތުގައި މަސައްކަތްކުރަމުން އައި މީހެކެވެ. ބަންގްލަދޭޝް މީހާ މަރުވެފައިވަނީ ލިބިފައިވާ ޒަޚަމްތަކަށް ހޮސްޕިޓަލްގައި ފަރުވާދެމުން ދަނިކޮށެވެ. މައުލޫމާތު ލިބިފައިވާ ގޮތުގައި އާބިދު ބަންގްލަދޭޝް މީހާއަށް ހަމަލާދިނީ ހިނގި ދެބަސްވުމެއްގެ ތެރޭގައެވެ.
މިހާދިސާ އާއި ގުޅިގެން ރާއްޖޭގައި ދިރިއުޅޭ ބަންގްލަދޭޝްގެ ރައްޔިތުން ވަނީ ރާއްޖޭގައި ހުންނަ ބަންގްލަދޭޝްގެ އެމްބަސީ ކައިރިއަށް އެއްވެ މުޒާހަރާވެސް ކޮށްފައެވެ.
މިމައްސަލަ ސީރިއަސް މައްސަލައެއްގެ ގޮތުގައި ބަލަމުން އަންނަކަމަށް ފުލުހުން ވަނީ ބުނެފައެވެ.
