"ތަހުގީގަށް ބަޔާން ދީފައި، ޝަރީއަތުގައި ހަނދާން ނެތްކަމަށް ބުނުމަކީ ބަޔާނުގައިވާ ކަންކަން ތެދު ނުކުރުން"
މުޙައްމަދުު ފާރިޙުއާ މާރާމާރީ ހިންގައި، އޭނާގެ ބުރަކަށީގެ 11 ތަނަކަށް ވަޅިން ޙަމަލާ ދީފައިވާކަމަށް ދައުވާގައި ބުނޭ
ކްރިމިނަލް ކޯޓް
ތަހުގީގަށް ބަޔާން ދީފައި، ޝަރީއަތުގައި އެ ޙާދިސާއެއް ހަނދާން ނެތްކަމަށް ބުނުމަކީ ބަޔާނުގައިވާ ކަންކަން ތެދު ނުކުރުންކަމަށް ކްރިމިނަލް ކޯޓުގެ ގާޒީ ސޮފްވަތު ޙަބީބު ވިދާޅުވެއްޖެއެވެ.
ގާޒީ ސޮފްވަތު އެހެން ވިދާޅުވީ ދައުލަތުގެ ފަރާތުން ސ ފޭދޫ ހަވީރީނާޒް އިއުތިސާމް މުޙައްމަދުގެ މައްޗަށް އުފުލާފައިވާ މީހަކަށް ނުރައްކާތެރި ހާނީއްކައެއް ވާގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މަރާމާރީ ހިންގުމުގެ ކުށުގެ ދައުވާގެ ޙުކުމް ކުރެއްވުމަށް ބޭއްވި އަޑުއެހުމުގައެވެ.
މި ދައުވާގައި ބުނެފައިވަނީ އިއުތިސާމް ސ.ހިތަދޫ އިތާމުތްގެ މުޙައްމަދުު ފާރިޙުއާ މާރާމާރީ ހިންގައި، އޭނާގެ ބުރަކަށީގެ 11 ތަނަކަށް ވަޅިން ޙަމަލާ ދީފައިވާ ކަމަށެވެ. އެ ދައުވާ ސާބިތު ކުރުމަށް ދައުލަތުގެ ފަރާތުން 9 ޝަފަހީ ހެއްކަކާއި، 2 ކިތާބީ ހެއްކެއް ހުށައެޅިއެވެ.
މި ދައުވާއާ ގުޅިގެން މައިގަނޑު ގޮތެއްގައި އިއުތިސާމުގެ ފަރާތުން ވަނީ ދައުވާއަށް އިންކާރުކޮށް، ޙާދިސާ ހިނގި ތަނުގައި ނެތްކަމުގެ ދިފާއު ނަގާފައެވެ.
މި މައްސަލައިގައި ދައުލަތުން ހުށައަޅާފައިވާ ހެކިން ތަހުގީގަށް ބަޔާން ދީފައިވީނަމަވެސް، ހެކިބަސް ދިނުމަށް ހާޒިރު ކުރުމުން އޭގެ ތެރެއިން ގިނަ ހެކިން ވަނީ ޙާދިސާއާ ގުޅުންހުރި ކަންކަން މިހާރު ހަނދާނުގައި ނެތްކަަމަށް ބުނެފައެވެ. ބައެއް ހެކިންވަނީ އިއުތިސާމަކީ ކާކުކަންވެސް ހަނދާން ނެތްކަމަށާއި، ފުލުހުންނަށް ބަޔާނެއް ދެވުނުކަންވެސް ހަނދާނުގައި ނެތްކަމަށް ބުނެފައެވެ.
ބައެއް އެހެން ހެކިންވަނީ، ތަހުގީގަށް ބަޔާން ދީފައިވީނަމަވެސް، މިހާރު ޙާދިސާ ހަނދާނުގައި ނެތުމުން، ޝަރީއަތުގައި އެކަމާ ގުޅޭ ވާހަކައެއް ދެއްކެން ނެތްކަމަށް ބުނެފައެވެ.
މި މައްސަލައިގެ ޙުކުމް ކުރައްވަމުން ގާޒީ ސޮފްވަތު ޙަބީބު ވިދާޅުވީ، ތަހުގީގަށް ބަޔާން ދީފައި، ޝަރީއަތުގައި ހެކިބަސް ދެމުން ޙާދިސާ ހަނދާނުގައި ނެތްކަމަށް ބުނުމަކީ ބަޔާނުގައިވާ ކަންކަން ތެދު ނުކުރުންކަމަށް ޝަރީއަތަށް ބުރަވެވޭ ކަމަށެވެ.
ގާޒީ ސޮފްވަތު ޙަބީބު ވިދާޅުވި ގޮތުގައި، ހެކިބަހަކީ އެއާމެދު ޝަރީއަތުގެ މަޖިލީހުގައި ސުވާލު ކުރެވި، ސާފުކޮށް ޝަރީއަތަަށް ކަންވެފައިވާ ގޮތް ހާމަ ކުރެވެންޖެހޭ، އަދި ޝަރީއަތުގައި ދެވޭ ހެކިބަހަކަށް ވާން ޖެހޭނެކަމަށް ދިވެހިރާއްޖޭގެ ހައިކޯޓުން ނިންމާފައިވާ އަބްދުﷲ ލައިސް ނޫރީ ވ. ޕްރޮސެކިއުޓަރ ޖެނެރަލް ގަޒިއްޔާގައިވެސް ބަޔާން ކޮށްފައިވެއެވެ.
މި މައްސަލައިގައި ދައުލަތުން ހުށައެޅި ހެކި ޤަރީނާތަކުން އެކަށީގެންވާ ޝައްކެއް ނެތް މިންވަރަށް މި ދައުވާ ސާބިތު ނުކުރެވޭކަމަށް ގާޒީ ވަނީ ޙުކުމް ކުރައްވާފައެވެ.
